ខេត្តប៉ៃលិន ៖ គេសង្កេតឃើញសម្រាមជាច្រើនការ៉ុង ត្រូវបានអ្នករត់ម៉ូតូឌុបម្នាក់ស៊ីឈ្នួលអ្នកភូមិដឹកយកទៅចោលនៅក្បែរផ្លូវលំ បង្កឱ្យជះក្លិនយ៉ាងអាសោច៍ប៉ះពាល់ដល់ការរស់នៅរបស់ប្រជាពលរដ្ឋនៅក្បែរភូមិ និងអ្នករស់នៅក្បែរគំនរសម្រាម ដែលការដឹកសម្រាមយកទៅចោលយ៉ាងអនាធិបតេយ្យនេះ បានកើតឡើងជារៀងរាល់ថ្ងៃ ស្ថិតនៅក្បែរផ្លូវលំមួយកន្លែងក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីប្រជាពលរដ្ឋដែលរស់នៅក្បែរកន្លែងគំនរសម្រាមបានឱ្យអ្នកយកព័ត៌ មានកោះសន្តិភាពដឹងកាលពីរសៀលថ្ងៃទី២៦ ខែឧសភា ២០១៤ នេះថា ជារៀងរាល់ថ្ងៃគេសង្កេតឃើញអ្នករត់ម៉ូតូឌុបម្នាក់ មិនស្គាល់អត្តសញ្ញាណ បានជិះម៉ូតូឌុបសម្រាមយកទៅបោះចោលនៅក្បែរផ្លូវ ដែលប្រជាពលរដ្ឋធ្វើដំណើរឆ្លងកាត់ទៅមកជារៀងរាល់ថ្ងៃ ។ ប្រភពបន្តទៀតថានៅក្នុងការ៉ុង ឬថង់ទាំងនោះគេឃើញមានកំទេចកាកសំណល់ផ្ទះបាយ សំបកបន្លែ សំបកពងមាន់ ពងទា ស្រកាត្រី និងថង់ដែលមានក្លិនស្អុយស្ទើរតែទ្រាំមិនបាន ខណៈដែលជិះម៉ូតូ ឆ្លងកាត់កន្លែងចោលសម្រាមម្តងៗ ។
សម្រាមទាំងនេះគឺអ្នកម៉ូតូឌុបរូបនោះបានស៊ីឈ្នួលពីអ្នកភូមិប៉ាហ៊ីជើង ភូមិសួនអំពៅលិច ដោយឌុបទាំងការ៉ុៗ យកទៅចាក់ចោល ខណៈដែលស្ងាត់មនុស្ស ដោយមិនគិតខ្វល់ពីផលប៉ះពាល់ដល់បរិស្ថានអ្វីបន្តិចសោះឡើយ ។ ម្យ៉ាងវិញទៀត ជួនកាលគេសង្កេតឃើញសត្វសុនខ (ឆ្កែ) ពីរទៅបីក្បាលចេញមកពីក្នុងភូមិទៅដណ្តើមគ្នាហែកការ៉ុងស៊ីកាកសំណល់ទាំងនោះ យ៉ាងប្រសាច ហើយជួនកាលទៀតមានហ្វូងរុយបានហើរទៅចោមរោមយ៉ាងច្រើនដូចហ្វូងឃ្មុំ និងគួរឱ្យខ្ទើមឆ្អើមជាទីបំផុត ។ ទោះបីជាបែបនេះក្តីគេមិនឃើញមានខាងបរិស្ថាន ឬអាជ្ញាធរភូមិ សង្កាត់ណាម្នាក់ចុះទៅ ពិនិត្យមើលនោះឡើយ ដោយបណ្តោយឱ្យគេយកសម្រាមទៅចោលយ៉ាងគ្មានសណ្តាប់ធ្នាប់ ។
ទាក់ទិនទៅនឹងបញ្ហាអ្នករត់ម៉ូតូឌុបដឹកសម្រាមយកទៅចោលនៅខាងជើងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន នេះអ្នកយកព័ត៌មានមិនអាចទាក់ទងទៅលោកមេភូមិដើម្បីស្រាយបំភ្លឺ បានទេ ។
ចែករំលែកព័តមាននេះ