រាជធានីភ្នំពេញ ៖ លោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូនបានអះអាងថាលោកបានស្នើទីក្រសួងសេដ្ឋកិច្ចនិងហិរញ្ញវត្ថុ ដើម្បីទម្លាក់ថវិការក្នុងការផ្តល់អំណោយដល់ប្រជាពលរដ្ឋនូវការអនុញ្ញាតឲ្យម្ចាស់រថយន្តដែលផ្លាកលេខចាស់គ្មានQRកូដ មកដូរយកលេខថ្មីមានQR កូដ ប្រមាណ៣លានដុល្លារអាមេរិក។
នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក រយៈពេល១០ខែ កាលពីពេលថ្មីៗនេះនៅទីស្ដីការក្រសួងសាធារណការលោកស៊ុន ចាន់ថុល បានអះអាងលោកបានស្នើសុំថវិកាពីរាជរដ្ឋាភិបាលប្រមាណ៣លានដុល្លារអាមេរិក សម្រាប់ចំណាយជូនដល់ប្រជាពលរដ្ឋទាំងអស់ដែលមានស្លាកលេខយានយន្ដចាស់ ហើយគ្មាន QR កូដមកដូរយកស្លាកលេខថ្មី និងមាន QRកូដ ត្រឹមត្រូវដោយឥតគិតថ្លៃ ដើម្បីធានាសុវត្ថិភាព និងកុំឱ្យបន្ដមានការប្រើប្រាស់ស្លាកលេខក្លែងក្លាយនៅទូទាំងប្រទេសតទៅទៀត ។
លោក ស៊ុន ចាន់ថុល លោកបានបញ្ជាក់ថា ៖« ក្រសួងសាធារណការ និងដឹកជញ្ជូនបានធ្វើ លិខិតមួយផ្ញើជូនទៅក្រសួងសេដ្ឋកិច្ច និងហិរញ្ញវត្ថុ ដើម្បីស្នើសុំថវិកាប្រមាណ៣លានដុល្លារ សម្រាប់ការផ្ដល់ជូនដល់បងប្អូនប្រជាពលរដ្ឋទាំងអស់ដែលមានស្លាកលេខឡានចាស់ គ្មាន QR កូដ មកដូរយកស្លាកលេខថ្មី និងមាន QR កូដ ។ ជាមួយគ្នានោះដែរ លោកទេសរដ្ឋមន្ដ្រីបានឱ្យបងប្អូនប្រជាពលរដ្ឋទាំងអស់ដែលមានលេខស្លាកឡានចាស់ គ្មាន QR កូដ សូមអញ្ជើញទាំងអស់មកដូរយកស្លាកថ្មី ដែលមាន QR កូដ ។
ពេលមកដូរនោះត្រូវធ្វើបច្ចុប្បន្នភាពឈ្មោះផ្ទះកាត់នៅកន្លែងណាកាត់ឈ្មោះហើយ ប៉ុន្ដែអត់ យកលុយទេ ធ្វើឱ្យព្រីដែលរាជរដ្ឋាភិបាលយើងត្រូវចេញឲ្យប្រហែល៣លានដុល្លារអាមេរិក បង់ឲ្យតែក្រុមហ៊ុន KTS ដែលមកជាន់លេខទេ គឺធ្វើឱ្យទទេដល់បងប្អូនប្រជាពលរដ្ឋយើង ជា អំណោយរបស់រាជរដ្ឋាភិបាល ។ លោកបានបន្ថែមថា ពេលមកដូរយកស្លាកលេខថ្មីដែលមាន QR កូដនោះ ត្រូវធ្វើបច្ចុប្បន្នភាពអាសយដ្ឋាន ផ្ទះលេខប៉ុន្មាន និងទីកន្លែងរស់នៅរាជធានី ឬខេត្តដោយត្រូវធ្វើជាថ្មីឡើងវិញ និងកាត់ឈ្មោះឱ្យទៅម្ចាស់ដោយមិនគិតថ្លៃនោះទេ ។
ការធ្វើស្លាកលេខថ្មី ដែលមាន QR កូដ ជូនដល់ប្រជាពលរដ្ឋ គឺក្រសួងសាធារណការមិនយកលុយថ្លៃធ្វើនោះទេ គឺផ្ដល់ជូនដោយឥតគិតថ្លៃ ហើយត្រូវរៀបចំទិន្នន័យថ្មី ធ្វើស្លាកលេខថ្មី មាន QR កូដ មានទីលំនៅត្រឹមត្រូវកាត់ឈ្មោះត្រឹមត្រូវ ដើម្បីកុំឱ្យមានស្លាកលេខក្លែងក្លាយប្រើប្រាស់បន្ដទៀត ។ ការលើកឡើងរបស់លោក រដ្ឋមន្ដ្រីក្រសួងសាធារណការ និងដឹកជញ្ជូននេះ បន្ទាប់ពី ពេលថ្មីៗកន្លងមកនេះ សមត្ថកិច្ចក្រសួងមហាផ្ទៃបានរកឃើញ និងចាប់បានអ្នកធ្វើស្លាកលេខក្លែងក្លាយចំនួន៧កន្លែង ដែលជាកន្លែងធ្វើស្លាកលេខនគរបាល, លេខខ.ម, លេខកងរាជអាវុធហត្ថលេខភ្នំពេញ និងលេខខេត្ដដែលទាំង៧កន្លែងនេះ គឺជាកន្លែងជាន់លេខសេះហោះ ឬស្លាកលេខក្លែងក្លាយ ។
ជាមួយគ្នានេះលោក ស៊ុន ចាន់ថុល ក៏បានបន្ថែមថា ដើម្បីកុំឱ្យមានស្លាកលេខសោះហោះ ឬក្លែងក្លាយប្រើប្រាស់បន្ដទៀត នៅក្នុងប្រទេសកម្ពុជា គឺចាំបាច់ត្រូវប្ដូរមកលេខថ្មី ដែលមាន QR កូដ ដើម្បីផ្ដល់ឱ្យបងប្អូនប្រជាពលរដ្ឋប្រើប្រាស់ស្លាកលេខត្រឹមត្រូវ និងទទួលបាននូវទិន្នន័យល្អទាំងអស់សម្រាប់ការគ្រប់គ្រងស្លាកលេខយានយន្ដ ។ លោកថា គម្រោងស្នើសុំថវិកា និងរៀបចំប្ដូរស្លាកលេខចាស់ និងផ្ដល់ជូនប្រជាពលរដ្ឋដោយឥតគិតថ្លៃសម្រាប់ប្ដូរឱ្យមកប្រើប្រាស់ស្លាកលេខថ្មីដែលមាន QR កូដនេះក្រសួងសាធារណការ និងដឹកជញ្ជូនកំពុងតែធ្វើការងារជាមួយក្រសួងសេដ្ឋកិច្ច និងហិរញ្ញវត្ថុ ហើយលទ្ធផលយ៉ាងណានោះនៅមិនទាន់បានទទួលនៅឡើយ៕ កែសម្រួលដោយ ៖ សុឃាក់
ចែករំលែកព័តមាននេះ