ខេត្តព្រះសីហនុ ៖ ព្រឹត្តិការណ៍ប្រកួតកីឡាវាយសីដណ្តើមពានរង្វាន់លោកឧបនាយករដ្ឋមន្ត្រី ស ខេង លើកទី១០ ដែលរៀបចំឡើងដោយសមាគមកីឡាវាយសីក្រសួងមហាផ្ទៃ តាំងពីថ្ងៃទី២៣ ឧសភា បានបញ្ចប់ជាស្ថាពរហើយ។ ពិធីបិទការប្រកួតត្រូវបានគេរៀបចំធ្វើកាលពីព្រឹកថ្ងៃទី២៥ ឧសភា នៅក្នុងសាលាខេត្តព្រះសីហនុ ក្រោមអធិបតីភាពលោកឈិត សុខុន អភិបាលនៃគណៈអភិបាលខេត្តព្រះសីហនុ ដោយមានការចូលរួមពីលោកអភិបាលរងខេត្តបន្ទាយមានជ័យ អគ្គលេខាធិការនៃសមាគមកីឡាវាយសីកម្ពុជា-វៀតណាម ភ្ញៀវជាតិ អន្តរជាតិ និងកីឡាករ-កីឡាការិនីជាច្រើននាក់ ។
លោកឈិត សុខុន បានមានប្រសាសន៍ថា នេះជាកិត្តិយសមួយដែលសមាគមកីឡាវាយសីក្រសួងមហាផ្ទៃរៀបចំព្រឹត្តិការណ៍ប្រកួតកីឡាវាយសីជាលក្ខណៈមិត្តភាពអន្តរជាតិពោរពេញដោយភាពសប្បាយរីករាយ ទោះជាឈ្នះឬចាញ់ ក៏កីឡាករ-កីឡាការិនីទាំងអស់ ទាំងក្មេងទាំងចាស់បានខិតខំបញ្ចេញអស់ពីសមត្ថភាពពេលប្រកួត ជាពិសេសមានសេចក្តីថ្លៃថ្នូរសមជាអ្នកកីឡាពិតៗ ។ លោកបន្តថា កីឡាជាការទូតមួយមិនអាចខ្វះបានទេ ហើយធ្វើឱ្យយើងកាន់តែយល់ច្បាស់អំពីចំណងមិត្តភាព សាមគ្គីភាពរវាងកម្ពុជា និងវៀតណាមកាន់តែល្អប្រសើរថែមទៀត ។
មិនត្រឹមតែបុ៉ណ្ណោះ ខេត្តទាំងអស់នៃប្រទេសទាំងពីរ ក៏កាន់តែមានទំនាក់ទំនងល្អប្រសើរលើវិស័យផ្សេងៗទាំងសេដ្ឋកិច្ច សង្គម និងមានទស្សនៈទូលំទូលាយ ចេះជួយគ្នាយកអាសាគ្នាទៅវិញទៅមកផងដែរ ។ ចំពោះលទ្ធផលនៃការប្រកួតដែលមានតែកីឡាករកម្ពុជា និងកីឡាករវៀតណាមនោះ គឺវិញ្ញាសាវាយគូបុរស អាយុក្រោម៣០ឆ្នាំ លេខ១ បានទៅកីឡាករ Ha Ann និងកីឡាករ Tan មកពីទីក្រុងហាណូយ ប្រទេសវៀតណាម ។
វិញ្ញាសាវាយគូបុរស អាយុចន្លោះ៣០-៣៩ឆ្នាំ ចំណាត់ថ្នាក់លេខ១ បានទៅកីឡាករ Thang និងកីឡាករ Mann មកពីទីក្រុងកឺនថឺ ប្រទេសវៀតណាម ។
វិញ្ញាសាវាយគូបុរស អាយុចន្លោះ៤០-៤៩ឆ្នាំ លេខ១ បានទៅកីឡាករ Da និងកីឡាករ Tam មកពីទីក្រុងកឺនថឺដូចគ្នា ។ វិញ្ញាសាវាយគូបុរស អាយុ៥០-៥៩ឆ្នាំ លេខ១ បានទៅកីឡាករគង់ ផល្លី និងកីឡាករកែវ ឡាត់ មកពីខេត្តបន្ទាយមានជ័យ ។ វិញ្ញាសាវាយគូបុរស អាយុ៦០ឆ្នាំឡើង លេខ១ បានទៅកីឡាករខាន់ សុវណ្ណ និងកីឡាករលឹម ចាងអាវ នៅខេត្តព្រះសីហនុ និងវិញ្ញាសាវាយគូនារី មិនកំណត់អាយុ លេខ១ បានទៅកីឡាការិនី Thuy និងកីឡាការិនី Hoa មកពីទីក្រុងហូជីមិញ ប្រទេសវៀតណាម ។
សូមបញ្ជាក់ផងដែរថា សម្រាប់ការប្រកួតដែលបានគ្រោងទុកថា នឹងមាន៤ប្រទេសចូលរួម គឺវៀតណាម ឡាវ ថៃ និងកម្ពុជានោះ មិនមានវត្តមានគ្រប់ចំនួនឡើយ ដោយពេលប្រកួតមានតែក្រុមកីឡាវាយសី២ប្រទេសបុ៉ណ្ណោះ គឺកម្ពុជា និងវៀតណាម ដែលមានប្រតិភូ និងកីឡាករ-កីឡាការិនីចូលរួមសរុបទាំងអស់១២៨នាក់ ក្នុងនោះនារី៨នាក់ ៕
ចែករំលែកព័តមាននេះ