ខេត្តកំពត ៖ សេចក្តីរាយការណ៍បឋមបានឲ្យដឹងថា នៅថ្ងៃទី០៥ ខែធ្នូនេះ នៅសាលាខេត្តកំពត គណៈកម្មការអន្តរក្រសួងបានរៀបចំកិច្ចប្រជុំត្រៀមរៀបចំពិធីបុណ្យសមុទ្រ ក្រោមអធិបតីភាពលោករដ្ឋមន្ត្រី ថោង ខុន…
ខេត្តកំពត ៖ សេចក្តីរាយការណ៍បឋមបានឲ្យដឹងថា នៅថ្ងៃទី០៥ ខែធ្នូនេះ នៅសាលាខេត្តកំពត គណៈកម្មការអន្តរក្រសួងបានរៀបចំកិច្ចប្រជុំត្រៀមរៀបចំពិធីបុណ្យសមុទ្រ ក្រោមអធិបតីភាពលោករដ្ឋមន្ត្រី ថោង ខុន លោកអភិបាលខេត្តកំពត ព្រមទាំងមានការចូលរួមពីអនុប្រធាន សមាជិកគណៈកម្មការ និងមន្ត្រីរាជការពាក់ព័ន្ធ ។
លោករដ្ឋមន្ត្រីបានបញ្ជាក់ថា ពិធីបុណ្យសមុទ្រលើកទី៨ ជុំទី២ នៅខេត្តកំពតនឹងប្រារព្ធធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ ខែធ្នូ ឆ្នាំ២០១៩ រហូតមកដល់ពេលនេះដំណើរការរៀបចំកិច្ចការងារនានាសម្រេចបាន៩០%ហើយ ក្នុងនោះមានដូចជា កិច្ចការតុបតែងលម្អតាមទីសាធារណៈ សួនច្បារ ការជួសជុលហេដ្ឋារចនាសម្ពន្ធផ្លូវថ្នល់ ការបំពាក់ និងបន្ថែមភ្លើងបំភ្លឺ ក្នុងទីក្រុង ការរៀបចំវិថីម្ហូបអាហារ (Food Street) ការរៀបចំគោលដៅទេសចរណ៍នានាជុំវិញខេត្ត ពិសេសតាមព្រែកទឹកឈូ ឬព្រែកកំពង់បាយ ភ្នំបូកគោ ស្រែអំបិល តំបន់កសិទេសចរណ៍ចម្ការម្រេច តំបន់ទេសចរណ៍ប្រវត្តិសាស្ត្រ សហគមន៍ទេសចរណ៍មួយចំនួន ព្រមទាំងគោលដៅទេសចរណ៍នៅខេត្តកែបផងដែរ ។
បើតាមការរំពឹងទុករបស់លោករដ្ឋមន្ត្រី ថោង ខុន ភ្ញៀវទេសចរដែលនឹងមកចូលរួមលេងកម្សាន្តក្នុងពិធីបុណ្យសមុទ្រនៅខេត្តកំពតខាងមុខនេះនឹងមានចំនួនច្រើនកុះករជាងឆ្នាំកន្លងទៅ ខណៈប្រទេសជាតិកំពុងមានសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ រីឯប្រជាពលរដ្ឋក៏កាន់តែមានភាពជីវភាពធូរធារ និងចង់ចេញដើរកម្សាន្តកាន់តែច្រើនឡើងៗ ៕ កែសម្រួលដោយ ៖ សុឃាក់
ចែករំលែកព័តមាននេះ