រាជធានីភ្នំពេញ៖ ប្រជាកសិករដាំដុះម្រេចនៅតាមតំបន់មួយចំនួនក្រៅពីខេត្តកំពតបានកំពុងណែនាំគ្នា ឬប្រគោកប្រកាសហៅគ្នាសួរនាំអំពីតម្លៃម្រេចនៅលើទីផ្សារថាប្រែប្រួលដល់កម្រិតណាហើយ។ កសិករខ្លះប្រកាសថាតម្លៃម្រេចស្ងួតកាលពីថ្ងៃទី១ ខែធ្នូគឺមានតម្លៃ ៨.០០០រៀលក្នុងមួយគីឡូក្រាម ហើយម្រេចខ្ចីមកដល់ថ្ងៃទី២ ខែធ្នូ នេះគឺថ្លៃប្រមាណ៣.៥០០រៀលក្នុងមួយគីឡូក្រាម។
ខណៈតម្លៃម្រេចខ្ចីហាក់ពុំមានហាងឆេងនឹងនរ ហើយស្ថិតក្នុងដំណាក់កាលមិនច្បាស់លាស់បែបនេះ បានបណ្តាលឲ្យប្រជាកសិករមួយចំនួនបង្ខំចិត្តបេះម្រេចខ្ចីរបស់ខ្លួនលក់ឲ្យឈ្មួញនាំមកក្រុងភ្នំពេញ ខណៈកន្លងមកការប្រមូលផងម្រេចខ្ចីគឺលក់ទៅប្រទេសថៃ។ ដោយសារតែតម្លៃម្រេចទុំនិងម្រេចខ្ចីគឺនៅតែលើមាត់ឈ្មួញ ជាហេតុធ្វើឲ្យឆ្នាំខ្លះគឺប្រជាកសិករម្ចាស់ចំការម្រេចត្រូវខាត មិនចំណេញនោះទេ ពេលទូទាត់លើថ្លៃកម្លាំងពលកម្មនិងការថែទាំងនោះ ។
លោក ស៊ាន សម្បត្តិ ប្រជាកសិករដាំម្រេចនៅខេត្តត្បូងឃ្មុំបានឱ្យដឹងថា «មកដល់សព្វថ្ងៃនេះ ការបេះម្រេចខ្ចីលក់គឺល្អជាងការទុកឱ្យម្រេចទុំចាំប្រមូលផលលក់ទៅឱ្យឈ្មួញ។ ព្រោះការប្រមូលផលម្រេចខ្ចីលក់ គឺយើងចំណាយកំលាំងពលកម្មតិច ចំណេញពេលវេលា។ ជារួមតម្លៃម្រេចខ្ចីនិងម្រេចទុំតម្លៃប្រហាក់ប្រហែលគ្នា។ ដូចនេះការបេះម្រេចខ្ចីលក់ គឺជាជម្រើសល្អបំផុតសម្រាប់ប្រជាកសិករយើងនាពេលនេះ»។ លោកបានបន្តថា ផ្លែម្រេចខ្ចីកាលពីខែមុន គេទិញនាំចេញទៅប្រទេសថៃ ។ ប៉ុន្តែមកសព្វថ្ងៃនេះគេបេះនាំទៅលក់នៅក្រុងភ្នំពេញ ព្រោះនៅប្រទេសថៃគេដល់រដូវប្រមូល
ផល។ តម្លៃម្រេចខ្ចីបេះលក់គិតត្រឹមថ្ងៃទី២ខែធ្នូនេះ គឺមួយគីឡូក្រាមថ្លៃ ៣.៥០០រៀលហើយម្រេចស្ងួតលក់កាលពីថ្ងៃទី១ ខែធ្នូបានចំនួន ៨.០០០រៀល សម្រាប់ម្រេចល្អ តែបើមិនល្អទេ អាចលក់បានថ្លៃ៧.៥០០រៀលក្នុងមួយគីឡូក្រាម។
បើតាមកសិកររូបនេះឲ្យដឹងថា ម្រេចខ្ចីដែលកសិករក្នុងតំបន់កំពុងបេះនេះគឺពូជម្រេចនាំមកពីប្រទេសម៉ាឡេ ដែលកសិករហៅឈ្មោះ «ស៊ីឡន» ហើយពូជម្រេចនេះកសិករកំពុងងាកមកដាំដុះកាន់តែច្រើនជំនួសម្រេចខ្មែរដែលបានងាបនៅតាមជន្លង់។លោក ស៊ាន សម្បត្តិ បានឱ្យដឹងថា «កន្លងមកប្រជាកសិករក្នុងតំបន់ពួកគាត់ដាំម្រេចពូជបាយ(ពូជខ្មែរ)ដាំច្រើន តែនៅឆ្នាំបន្ទាប់ពូជម្រេចម៉ាឡេនេះនឹងកើនឡើងច្រើនជំនួសឱ្យម្រេចខ្មែរវិញ ខណៈបច្ចុប្បន្ននេះ កសិករខ្លះបានដាំបានពីរឬបីឆ្នាំប្រមូលផលបានតិចតួច តែនៅឆ្នាំក្រោយអាចនឹងប្រមូលផលម្រេចខ្ចីបានច្រើន»។
លោកបានបញ្ជាក់បន្ថែមថា «សព្វថ្ងៃនេះ ប្រជាកសិករជ្រើសរើសនិងបានដាំពូជម្រេចម៉ាឡេនេះមានប្រហែល ៥០% ស្ថិតនៅក្នុងតំបន់។ សម្រាប់ខ្ញុំក៏បានដាំបានប្រហែល២០០ជន្លង់ បន្ទាប់ពីពូជម្រេចរបស់ខ្មែរវាងាប់។ប៉ុន្តែនៅចំការមិត្តភក្តិខ្លះ គាត់បានដាំរហូតដល់ជាង២.០០០ឬទៅ៣.០០០ជន្លង់ទៅតាមកន្លែង បានដាំពូជនេះជំនួសវិញអស់ហើយ។ម្រេចពូជខ្មែរបើមិនងាប់ប្រជាកសិករបន្តនៅថែរក្សា តែបើវាងាប់ហើយកសិករមិនដាំវាទៀតទេ គឺយកពូជស៊ីឡន ឬពូជនាំមកពីប្រទេសម៉ាឡេដាំជំនួសវិញ»។
ចំណែកអ្នក ស្រី មុំ បានឱ្យដឹងថា មកដល់សព្វថ្ងៃនេះថៃលែងទិញម្រេចខ្ចីហើយ ព្រោះថៃគេដល់រដូវប្រមូលផលម្រេចគេដែរ។តម្លៃម្រេចខ្ចីឥលូវថ្លៃពី៣.៣០០ ទៅ ៣.៥០០រៀលក្នុងមួយគីឡូក្រាម ហើយទីផ្សារម្រេចខ្ចីដែលអ្នកស្រីលក់ទៅក្រុងភ្នំពេញក្នុងបរិមាណ១០០គីឡូក្រាមសព្វថ្ងៃនេះគឺអ្នកស្រីខិតខំរកដោយខ្លួនឯង។ បើតាមអ្នកស្រីមុំ បានបញ្ជាក់ថា «បើមានវិធីសាស្ត្រអាចធ្វើម្រេចផ្លែខុសរដូវបាន នោះខ្ញុំចង់ដាំដុះបែបនេះ ព្រោះការបេះម្រេចខ្ចីលក់វាមិនលំបាកដូចទុកឱ្យវាទុំ ហើយការធ្វើបែបនេះអាចបេះបានរហូត»។
អ្នកស្រី លី សុផាត ម្ចាស់ចំការម្រេចនៅខេត្តក្រចេះបានឱ្យដឹងថា សព្វថ្ងៃនេះអ្នកស្រីមានដីដាំម្រេចប្រមាណ២ហិកតា ចង់បេះម្រេចខ្ចីលក់ដែរ ព្រោះអស់លទ្ធភពក្នុងការថែទាំ បើទុកដល់វាទុំត្រូវការចំណាយច្រើនខណៈតម្លៃលក់ចេញបានថោក។ តាមអ្នកស្រី លីសុផាត ខណៈកំពុងប្រកាសរកឈ្មួញទិញម្រេចខ្ចី រូបនេះថា «សព្វថ្ងៃនេះមិនត្រឹមតែបារម្ភទេ គឺអស់ជំនឿហើយ។ នៅក្បែរៗនោះគេបោះបង់ចោលច្រើនហើយនេះខ្ញុំក៏ចង់បោះបង់ដែរ ព្រោះអត់លទ្ធភាពទេ បានផលមកទូទាត់ការចំណាយទៅវិញមិនគ្រាន់»៕
ចែករំលែកព័តមាននេះ