រាជធានីភ្នំពេញ ៖ បន្ទាប់ពីមានការរិះគន់ពីមហាជនពាក់ព័ន្ធនឹងអ្នកគ្រប់គ្រងកន្លែងថ្លឹងរថយន្តរដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថា ត្រូវធ្វើការផ្លាស់ប្តូរ ឬបង្វែរអ្នកគ្រប់គ្រងការថ្លឹងរថយន្តដោយមិនត្រូវទុកយូរឆ្នាំនោះទេ ។ ថ្លែងក្នុងកិច្ចប្រជុំបូកសរុបលទ្ធផលការងារចរាចរណ៍ផ្លូវគោក រយៈពេល១០ខែ ឆ្នាំ២០ ១៩ នារសៀលថ្ងៃទី០៣ ខែធ្នូនេះ នៅទីស្តីការក្រសួង ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រ សួងសាធារណៈការ និងដឹកជញ្ជូនបានលើកឡើងថា ត្រូវពង្រឹងការថ្លឹងរថយន្ត នេះបន្ថែមទៀត ។ ដូចជា ត្រូវមាននីតិវិធីប្តូរប្រធានគ្រប់គ្រងការងារថ្លឹងជញ្ជីងតាមផ្លូវដោយកុំដាក់នៅកន្លែងនឹង៥ ឬ១០ឆ្នាំ ដូចបច្ចុប្បន្ននេះ ។ ត្រូវដាក់តែ២ ឆ្នាំ ត្រូវបង្វិល ឬដូរចេញកុំទុកនៅយូរនាំឲ្យមានការរិះគន់ ។
លោកបន្តថា ជាក់ស្តែងបណ្តាញសង្គមហ្វេស ប៊ុក កាលពេលថ្មីៗនេះបានបង្ហោះច្រើនណាស់ចំពោះការដាក់ជញ្ជីងថ្លឹងរថយន្តថា កន្លែងមិនបានការ ហើយជាកន្លែងយកលុយដោយមិនបានថ្លឹងត្រឹមត្រូវនោះទេ ។ លោកបញ្ជាក់ថា «ករណីថ្លឹងរថយន្តនេះ យើងមិនអាចទទួលយកបានទេ ពីការរិះគន់ពីមហាជន គឺយើងត្រូវតែឲ្យមានការថ្លឹងរថយន្តឲ្យបានត្រឹមត្រូវ ។ ត្រូវផ្លាស់ប្តូរប្រធានគ្រប់គ្រងត្រូវតែប្តូរមិនត្រូវអនុញ្ញាតឲ្យធ្វើបែបនេះធ្វើឲ្យខូចមុនមាត់ក្រសួង និងរាជរដ្ឋាភិបាលនោះទេ ។ គ្រាន់តែថ្លឹងហើយ មិនដឹងអ្វីផងយកលុយហើយទៅបាត់រឿងនឹងមានច្រើន តែខ្ញុំមិនដឹងថា ការពិត ឬមិនការពិត ។ ដូច្នេះត្រូវតាមដានថែមទៀតចំពោះករណីនេះ» ។
លោកទេសរដ្ឋមន្ត្រី ក៏បានឲ្យដឹងថា ចំពោះជញ្ជីងថ្លឹងរថយន្តនេះដែលក្រសួងបានកំពុងតែរៀបចំបំពាក់ប្រព័ន្ធកាមេរ៉ា ថ្លឹងទម្ងន់ជាមុន មុននឹងដល់កន្លែងថ្លឹង ។ ពាក់ព័ន្ធនឹងជញ្ជីងថ្លឹងរថយន្តនេះដែរ លោករដ្ឋមន្ត្រីក៏បានស្នើឲ្យយកជញ្ជីងចល័តទៅដាក់នៅមុខរោងចក្រស៊ីម៉ង់ ដោយកុំឲ្យដឹងថា ហួសទម្ងន់ ។ លោករដ្ឋមន្ត្រីក៏បានលើកឡើងថា ត្រូវកោះអញ្ជើញក្រុមហ៊ុនដឹកស៊ីម៉ង់ទាំងអស់ មកជជែកគ្នាថា បើនៅតែដឹកលើកទម្ងន់ទៀតនឹងត្រូវបិទអាជ្ញាបណ្ណកុំរកស៊ីបាន ។ យើងនឹងពិភាក្សាជាមួយក្រសួងឧស្សាហកម្ម និងសិប្បកម្មក្រសួងរ៉ែ និងថាមពលដែលជាម្ចាស់គ្រប់គ្រងពីលើកថា រោងចក្រនេះមិនគោរពច្បាប់ទេ នៅតែដឹកលើកទម្ងន់ ។
លោកបញ្ជាក់ថា ៖«យើងដាក់ជញ្ជីងចល័តមួយខែនៅកន្លែងហ្នឹង ដើម្បីចាំចាប់ហើយអញ្ជើញក្រុមហ៊ុននឹងមកជជែកគ្នា ហើយនៅតែបន្តទៀត គឺយើងស្នើបិទអាជ្ញាបណ្ណតែម្តង ។ យើងមិនអាចធ្វើម្នាក់ឯងបានទេ រត់ចុះរត់ឡើងតែយើងទៅចាប់នៅគោលដៅតែម្តងទើបបាន» ៕ កែសម្រួលដោយ ៖ សុឃាក់
ចែករំលែកព័តមាននេះ