ខេត្តកំពង់ឆ្នាំង ៖ ដី៤០ហិកតានៅកំពង់ឆ្នាំងមិនមែនលក់ឲ្យជនជាតិបរទេសទេ គឺជាកិច្ចការរៀបចំអន្តោប្រវេសន៍ សូមពិនិត្យមើលច្បាប់នៅក្នុងរដ្ឋធម្មនុញ្ញ ។ នេះជាការលើកឡើងរបស់លោកសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ក្នុងកម្មវិធីបើកបវេសនកាលឆ្នាំសិក្សា២០១៩-២០២០ នៅវិទ្យាស្ថានបច្ចេកវិទ្យាបាត់ដំបង នាព្រឹកថ្ងៃទី៣០ វិច្ឆិកាកន្លងមកនេះ ដោយមានការចូលរួមពីលោកងួន រតនះ អភិបាលខេត្តបាត់ដំបង ជាមួយសិស្សានុសិស្សចំនួន៣២៨នាក់ក្នុងចំណោម៦៤៣នាក់ ។
ចំពោះសភាពការណ៍ថ្មីៗដែលកំពុងកើតមានការភ្ញាក់ផ្អើលយ៉ាងផុលផុសក្នុងបណ្តាញសង្គមហ្វេសប៊ុកនោះ លោកសន្តិបណ្ឌិតបានលើកឡើងថា ប្រទេសកម្ពុជាមហាសេរីក្នុងការប្រើប្រាស់បណ្តាញសង្គមហ្វេសប៊ុក ។ ចំពោះដី៤០ហិកតានៅខេត្តកំពង់ឆ្នាំង ដោយមានការចោទប្រកាន់ថា បានលក់ឲ្យបរទេស(យួន) ម្តេចក៏ងាយបំពុលម្ល៉េះ ? សូមពិនិត្យមើលតាមច្បាប់ដែលមានចែងនៅក្នុងរដ្ឋធម្មនុញ្ញ ចំពោះជនអន្តោប្រវេសន៍គឺ
មានសិទ្ធិតែជួលរស់នៅប៉ុណ្ណោះ គ្មានសិទ្ធិកាន់កាប់ទេ ហើយមុននិងជួលក៏ត្រូវពិនិត្យមើលដែរតើជននោះមានឯកសារត្រឹមត្រូវតាមច្បាប់ដែរឬទេ ? បើគ្មានទេគឺចាប់បញ្ជូនទៅស្រុកវិញអស់ហើយមិនទុកទេ ។
លោកថ្លែងថា មិនដូចការលើកឡើងពីចំនួនជនជាតិវៀតណាមប្រមាណ៥ម៉ឺននាក់ តែពេលចុះត្រួតពិនិត្យជាង២ម៉ឺននាក់ដែលភាគច្រើនមានច្បាប់អន្តោប្រវេស្តន៍សុំសិទ្ធិរស់នៅ អ្នកខ្លះមានកាតកាន់សុំរស់នៅតាំងពីឆ្នាំ១៩៥៦មកម្ល៉េះ ហើយបើពួកគេគ្មានអ្វីទេគឺចាប់បញ្ជូនទៅស្រុកគេវិញអស់ហើយ ។ ដូច្នោះការផ្សាយទាំងនោះសុទ្ធតែជាការបំផ្លើសទាំងអស់សូមកុំមានការយល់ច្រឡំ ហើយដីនោះជាដីរបស់ រដ្ឋសម្បទានទៅឲ្យឯកជនជួល សម្រាប់ជនអន្តោ ប្រវេស្តន៍ដែលត្រូវការរៀបចំការរស់នៅ កុំឱ្យប៉ះពាល់បរិស្ថានក្នុងទឹកទន្លេឲ្យមកឡើងគោកវិញ ។ ម្ល៉ោះហើយជនអន្តោប្រវេសន៍គ្មានសិទ្ធិអាចទិញដីនោះកាន់កាប់រស់នៅបានឡើយ ។
មុននេះអាជ្ញាធរខេត្តកំពង់ឆ្នាំង បានជម្រុញឲ្យក្រុមហ៊ុនម៉ៅការចាក់ដី ពន្លឿនការងាររបស់ខ្លួនដើម្បីរៀបចំហេដ្ឋារចនាសម្ព័ន្ធទីតាំងភូមិថ្មីមួយដែលស្ថិតនៅក្នុងឃុំស្វាយជ្រុំ ស្រុករលាប្អៀរ ដែលអាចអនុញ្ញាតឲ្យអ្នកដែលរស់នៅលើផ្ទះបណ្តែតទឹកអាចទៅរស់នៅបាន ។ ក៏ប៉ុន្តែការត្រៀមដី៤០ហិកតា សម្រាប់ទទួលអ្នករស់នៅលើផ្ទះបណ្តែតទឹក ដែលរួមមានជនជាតិវៀតណាម ខ្មែរឥស្លាម និងពលរដ្ឋខ្មែរខ្លះផងនោះបានរងនូវ ការរិះគន់ ថាអាជ្ញាធរខេត្តកំពង់ឆ្នាំងកាត់ដីឲ្យវៀត ណាម ។ ក៏ប៉ុន្តែការចោទប្រកាន់នេះត្រូវអាជ្ញាធរ
បដិសេធយ៉ាងដាច់អហង្ហារ ។ អភិបាលរងខេត្តកំពង់ឆ្នាំង លោកស៊ុន សុវណ្ណារិទ្ធ បានថ្លែងប្រាប់វិទ្យុបារាំង កាលពីថ្ងៃពុធសប្តាហ៍កន្លងទៅនេះថា ការរៀបចំបំលាស់ទីប្រជាជន ដែលរស់នៅលើផ្ទះបណ្តែតទឹកប្រមាណជាង៤ពាន់គ្រួសារ គឺជាការធ្វើឡើងដោយការស្ម័គ្រចិត្ត ។
អ្នកតាមដានសង្គមមួយចំនួន និងអ្នកដែលមាននិន្នាការប្រឆាំងនយោបាយរបស់រាជរដ្ឋាភិបាលកម្ពុជា បានធ្វើការរិះគន់និងចោទប្រកាន់ថាអាជ្ញាធរខេត្តកំពង់ឆ្នាំង បានកាត់ដីឲ្យវៀតណាម តាមរយៈការត្រៀមដីចំនួន៤០ហិចកតា នៅក្នុងខេត្តនេះសម្រាប់ឲ្យពលរដ្ឋ ដែលរស់នៅលើទឹក តាំងទីលំនៅថ្មីនៅលើគោក ។
លោកស៊ុន សុវណ្ណារិទ្ធ អភិបាលរងខេត្តកំពង់ឆ្នាំង ពន្យល់ថាការបំលាស់ទីអ្នករស់នៅលើផ្ទះបណ្តែតទឹកឲ្យទៅនៅលើគោក គឺជាការគិតគូរពី ហេតុផលបរិស្ថាន ភាពប្រសើឡើងនៃការរស់នៅរបស់មនុស្ស និងធ្វើទៅតាមច្បាប់ជាតិ និងអន្តរជាតិ ។ អភិបាលរង ដែលជាប្រធានគណៈកម្មការបំលាស់ទីប្រជាជនផ្ទះទឹក បញ្ជាក់ថាចំណាត់ការរបស់រដ្ឋបាលខេត្ត មិនមែនជាការកាត់ដីឲ្យយួននោះទេ ដោយហេតុថានៅលើគោកក៏ជាដីខ្មែរ និងនៅក្នុងទឹកក៏ជាដីខ្មែរដែរ ។
សូមបញ្ជាក់ថាវត្តមានរបស់ប្រជាជន ដែលរស់នៅលើផ្ទះបណ្តែតទឹក ដែលក្នុងនោះមានចំរុះជាជនជាតិវៀតណាម ខ្មែរឥស្លាម និងពលរដ្ឋខ្មែរដែរនោះ បានធ្វើឲ្យបរិស្ថានទឹកបឹងទន្លេសាប រងនូវការបំពុល និងគោករាក់ដោយសារតែការបន្ទោរបង់ ការបោះកាកសំណល់ចូលទៅក្នុងទឹកនិងការបង្ហូរប្រេងម៉ាស៊ីនចូលទៅក្នុងទឹកជាដើម ។ ស្ថានភាពបែបនេះ តម្រូវឲ្យមានការស្តារឡើងវិញនៃបរិស្ថានបឹងទន្លេសាប និងធ្វើឲ្យប្រសើរនូវកំណើនត្រីទឹកសាបឡើងវិញ ខណៈបឹងទន្លេងសាបជាជង្រុគត្រីដ៏សំខាន់បំផុតរបស់ប្រទេសកម្ពុជា ។
យោងតាមអ្នកនាំពាក្យសាលាខេត្តកំពង់ឆ្នាំង បានចេញសេចក្តីប្រកាសព័ត៌មានខាងលើដោយបានគូសបញ្ជាក់ថា ៖
១-នៅតាមទន្លេសាបក្នុងខេត្តកំពង់ឆ្នាំង កន្លងមកមានប្រជាពលរដ្ឋ ខ្មែរ-ខ្មែរឥស្លាម និងអន្តោប្រវេសន៍វៀតណាម រួមទាំងមូលដ្ឋានអាជីវកម្មផ្សេងៗមួយចំនួនផង មានប្រមាណ៣៨៥១ខ្នង
ផ្ទះស្មើនឹងប្រមាណ៤៥៦៣គ្រួសារ បានរស់នៅលើផ្ទៃទឹកទន្លេសាប ជាប្រភេទផ្ទះបណ្ដែតទឹក នៅក្នុងភូមិសាស្ត្រឃុំ-សង្កាត់ចំនួន៩ ។
២-យោងតាមច្បាប់ស្ដីពីការគ្រប់គ្រងរាជធានី ខេត្ត ក្រុង ខណ្ឌ និងដោយមានការឯកភាពពីថ្នាក់លើក្រុមប្រឹក្សាខេត្ត គណៈអភិបាលខេត្តកំពង់ឆ្នាំង បានដាក់ចេញផែនការរៀបចំឲ្យប្រជាពលរដ្ឋកំពុងរស់នៅលើផ្ទះបណ្ដែតទឹកទាំងអស់ បន្លាស់ទីមកតាំងទីលំនៅលើគោកវិញ គិតទាំងប្រជាពលរដ្ឋខ្មែរ-ខ្មែរឥស្លាម និងជនអន្តោប្រវេសន៍វៀតណាមផងដែរ ។ ក្នុងគោលបំណងថែរក្សាទន្លេសាប ថែរក្សាបរិស្ថានទឹក ថែរក្សា
ជីវចំរុះ និងធនធានធម្មជាតិ សម្រាប់កូនចៅជំនាន់ក្រោយ ។
៣-រដ្ឋបាលខេត្តកំពង់ឆ្នាំងក៏បានទទួលអនុសាសន៍ដឹកនាំដ៏ខ្ពង់ខ្ពស់ពីរដ្ឋាភិបាល និងក្រសួងមហាផ្ទៃឲ្យចាត់ចែងអនុវត្តផែនការនេះឱ្យបានហ្មត់ចត់ ទាន់ពេលវេលានិងប្រុងប្រយ័ត្នខ្ពស់ ស្របតាមច្បាប់ព្រះរាជាណាចក្រកម្ពុជា និងច្បាប់អន្តរជាតិផងដែរ ព្រមទាំងខិតខំដោះស្រាយសេវារដ្ឋបាលនៅកន្លែងថ្មីជូនប្រជាពលរដ្ឋឲ្យបានល្អ ។
៤-នៅពេលរដ្ឋបាលខេត្តចាប់ផ្ដើមអនុវត្តគម្រោងនេះ លោកស្រី រ៉ូណាស្មីត អ្នករាយការណ៍ពិសេសទទួលបន្ទុកសិទ្ធិមនុស្សនៃអង្គការសហប្រជាជាតិ និងក្រុមការងាររបស់លោកស្រី បានអញ្ជើញមកពិនិត្យតាមដាននិងឃ្លាំមើល ដោយយកចិត្តទុកដាក់បំផុត ជាពិសេសពាក់ព័ន្ធជាមួយកិច្ចការ ការពារសិទ្ធិមនុស្សជាសំខាន់។
ក្នុងពេលជួបធ្វើការជាមួយរដ្ឋបាលខេត្តកំពង់ឆ្នាំងលោកស្រី រ៉ូណាស្មីត បានសង្កត់ធ្ងន់ ឲ្យរដ្ឋបាល
ខេត្ត យកចិត្តទុកដាក់រៀបចំការងារនេះឲ្យបានល្អប្រសើរដូចជារៀបចំហេដ្ឋារចនាសម្ព័ន្ធទឹកស្អាត ភ្លើងអគ្គីសនី សាលារៀន សុខាភិបាលសន្តិសុខ និងគោរពទំនៀមទំលាប់ប្រពៃណី ។ល។
៥-លើកជាសំណួរថា៖ បើមិនឲ្យប្រជាពលរដ្ឋរស់នៅលើផ្ទះបណ្ដែតទឹក ដែលពួកគាត់កំពុងរស់នៅតើផែនការរដ្ឋបាលខេត្តឲ្យពួកគាត់រស់នៅឯណា ។ អ្នកនាំពាក្យរដ្ឋបាលខេត្តកំពង់ឆ្នាំងសូមបញ្ជាក់ជូនដូចតទៅ ចំពោះប្រជាពលរដ្ឋខ្មែរ និងខ្មែរឥស្លាមមួយចំនួន ពួកគាត់ត្រូវបន្លាស់ទីផ្ទះទឹករបស់គាត់ពីក្នុងទន្លេសាបឡើងមកតាំងទីលំនៅលើគោកវិញ ដែលស្ថិតនៅភូមិ ឃុំ ស្រុករបស់ពួកគាត់ ស្របតាមការរៀបចំរបស់អាជ្ញាធរមូលដ្ឋាន ។ អាជ្ញាធរមូលដ្ឋានមានភារកិច្ចរៀបចំហេដ្ឋារចនាសម្ព័ន្ធ និងការផ្ដល់សេវានានាជូនពួកគាត់ស្របតាមភូមិសាស្ត្រនីមួយៗ ។
ដោយឡែក ចំពោះអន្តោប្រវេសន៍វៀតណាម រួមជាមួយនឹងប្រជាពលរដ្ឋខ្មែរ និងខ្មែរឥស្លាមមួយចំនួនទៀតពួកគាត់ជួបការលំបាកក្នុងការរកកន្លែងរស់នៅលើគោក ។ ដូច្នេះដើម្បីសម្របសម្រួលដោះស្រាយ
ឲ្យដំណើរការល្អ រដ្ឋបាលខេត្តបានសហការជាដៃគូជាមួយវិស័យឯកជន ដែលមានដីស្រែឡើងទឹក នៅក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ ចំនួន៤០ហិកតា លើកសំណើជូនរាជរដ្ឋាភិបាល ស្របតាមនីតិវិធីធ្វើអនុបយោគ ដើម្បី អភិវឌ្ឍន៍ហេដ្ឋារចនាសម្ព័ន្ធឲ្យបានសមស្រប និងរៀបចំតំបន់នេះសម្រាប់ប្រជាពលរដ្ឋអាចរស់នៅបាន ។
ចំពោះការចូលមករស់នៅលើដីទីតាំង៤០ហិកតានេះ បើពួកគាត់ជាប្រជាពលរដ្ឋខ្មែរ ឬខ្មែរឥស្លាម គាត់ចង់មករស់នៅ ត្រូវទិញក្នុងតម្លៃសមរម្យ ។ ដោយឡែក ជនអន្តោប្រវេសន៍ វៀតណាមគាត់ត្រូវជួល ស្របតាមច្បាប់អន្តោប្រវេសន៍នៃព្រះរាជាណាចក្រកម្ពុជា ។ ការផ្ដល់សំណុំបែបបទនានាដល់អន្តោប្រវេសន៍វៀតណាមរដ្ឋបាលខេត្តអនុវត្តច្បាប់ និងគោលការណ៍ណែនាំ ។
៦-អ្នកនាំពាក្យរដ្ឋបាលខេត្តកំពង់ឆ្នាំង សូមបញ្ជាក់បន្ថែមថា រដ្ឋបាលខេត្តកំពង់ឆ្នាំង មិនអនុញ្ញាតឲ្យប្រជាពលរដ្ឋតាំងទីលំនៅអចិន្ត្រៃយ៍ ឬធ្វើមូលដ្ឋានអាជីវកម្មផ្សេងៗនៅផ្ទះបណ្ដែតទឹកទៀតទេ ។ អនុញ្ញាតឲ្យមានបែរចិញ្ចឹមត្រី ដោយមិនមានលំនៅដ្ឋានរស់នៅអចិន្ត្រៃយ៍ប៉ុន្តែត្រូវ រៀបចំតាមបច្ចេកទេសរបស់មន្ទីរកសិកម្មរុក្ខាប្រមាញ់និងនេសាទ ។ រដ្ឋបាលខេត្តបន្តជំរុញនិងរៀបចំផែនការបន្លាស់ទីផ្ទះបណ្ដែតទឹកយ៉ាងម៉ឹងម៉ាត់រហូតរួចរាល់ជាស្ថាពរ ។ រដ្ឋបាលខេត្តកំពង់ឆ្នាំងសូមអំពាវនាវបងប្អូនប្រជាពលរដ្ឋនិងស្ថាប័នពាក់ព័ន្ធចូលរួមជាមួយរដ្ឋបាលខេត្ត អនុវត្តគម្រោងការងារនេះឱ្យសម្រេចបានលទ្ធផលល្អ ដើម្បីរួមចំណែកការពារទន្លេសាប បរិស្ថានទឹក ជីវចំរុះ និងធនធានធម្មជាតិឲ្យបានល្អសម្រាប់កូនចៅជំនាន់ក្រោយ ។
៧-សេចក្តីសន្និដ្ឋានរួម ការបន្លាស់ទី ប្រជាពលរដ្ឋ រស់នៅផ្ទះបណ្ដែតទឹកឲ្យឡើងរស់នៅលើគោកគឺមានន័យថា យើងផ្លាស់ប្ដូរទីកន្លែងរស់នៅរបស់ពួកគាត់ដែលកំពុងរស់នៅ ហើយដែលបញ្ហានេះជាប់ពាក់ព័ន្ធយ៉ាងសំខាន់ដល់ជីវភាពរស់នៅប្រចាំថ្ងៃ មុខរបរ កូនចៅរៀនសូត្រ សុខភាពសារធារណៈ ស្ត្រីមានផ្ទៃពោះ និងតម្រូវការទឹកស្អាត អគ្គីសនី ។ល។ អាស្រ័យហេតុនេះហើយទើបរដ្ឋបាលខេត្តត្រូវចាត់វិធានការឲ្យបាន ត្រឹមត្រូវនិងដោយប្រុងប្រយ័ត្ន ស្របតាមច្បាប់នៃព្រះរាជាណាចក្រកម្ពុជា និងស្របតាមច្បាប់អន្តរ
ជាតិ ពិសេសច្បាប់ស្ដីពីសិទ្ធិមនុស្ស ។
ការចាត់វិធានការស្របតាមច្បាប់ជាតិនិងច្បាប់អន្តរជាតិគឺពិតជាបាន ចូលរួមចំណែកយ៉ាងធំធេងក្នុងការជួយឱ្យប្រទេសកម្ពុជាទទួលបានការគាំទ្រយ៉ាងធំធេងពីមជ្ឈដ្ឋានជាតិ និងសហគមន៍អន្តរជាតិ ។ បើមិនរៀបចំទីកន្លែងសមរម្យពួកគាត់នឹងបន្តរស់នៅផ្ទះបណ្ដែតទឹកដដែលទៀត ហើយបញ្ហានៅតែមាន ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ