រាជធានីភ្នំពេញ ៖ ដើម្បីចូលរួមក្នុងការអភិវឌ្ឍវិស័យឧស្សាហកម្ម និងសិប្បកម្មកម្ពុជា វិនិយោគិនជប៉ុននិងកម្ពុជាបានចាប់ដៃរួមគ្នាអភិវឌ្ឍន៍វិស័យមួយនេះបន្តទៀតតាមរយៈពិព័រណ៍ ការវិនិយោគខ្មែរជប៉ុន ស្វែងរកការវិនិយោគវិស័យនេះនៅកម្ពុជា ខណៈវាជាឆ្អឹងខ្នងដ៏សំខាន់សម្រាប់កំណើនសេដ្ឋកិច្ចជាតិ ។ …
រាជធានីភ្នំពេញ ៖ ដើម្បីចូលរួមក្នុងការអភិវឌ្ឍវិស័យឧស្សាហកម្ម និងសិប្បកម្មកម្ពុជា វិនិយោគិនជប៉ុននិងកម្ពុជាបានចាប់ដៃរួមគ្នាអភិវឌ្ឍន៍វិស័យមួយនេះបន្តទៀតតាមរយៈពិព័រណ៍ ការវិនិយោគខ្មែរជប៉ុន ស្វែងរកការវិនិយោគវិស័យនេះនៅកម្ពុជា ខណៈវាជាឆ្អឹងខ្នងដ៏សំខាន់សម្រាប់កំណើនសេដ្ឋកិច្ចជាតិ ។
លោកហេង សុគង់ រដ្ឋលេខាធិការក្រសួងឧស្សាហកម្មនិងសិប្បកម្មកម្ពុជា បានមានប្រសាសន៍ នៅក្នុងពិព័រណ៍ខ្មែរ-ជប៉ុន កាលពីថ្ងៃទី ៣០ វិច្ឆិកា នៅផ្សាររាត្រីភ្នំពេញ ថា ទំនាក់ទំនងការទូតរវាងកម្ពុជា និងជប៉ុនមានរយៈពេលជាង៦០ឆ្នាំមកហើយក៏ប៉ុន្តែបើនិយាយពីទំនាក់ទំនងប្រវត្តិសាស្ត្រគឺមានតាំងពីយូរលង់ណាស់មកហើយ ជាក់ស្ដែងតាមកំណត់ជីវតាក្វាន់ ជប៉ុនគឺជាអ្នករកឃើញអង្គរវត្តមុនគេ ដូច្នេះទំនាក់ទំនងរវាងប្រទេសទាំងពីរ គឺមានភាពស្អិតរមួតជាមួយគ្នាយូរមកហើយ ។ ការចូលមកបណ្ដាក់ទុនវិនិយោគរបស់ជនជាតិជប៉ុននៅកម្ពុជា និងបង្កើតនូវឱកាសការងារជាច្រើនដល់កម្ពុជា និងបានរួមចំណែកដល់ការកសាងសេដ្ឋកិច្ចកម្ពុជាផងដែរ ។
លោកបានបន្តថា នៅទីណាមានវិនិយោគិនជប៉ុនដាក់ទុនវិនិយោគ ទីនោះនឹងមានក្ដីសង្ឃឹម ព្រោះវិនិយោគិនជប៉ុនមុននឹងបណ្ដាក់ទុនវិនិយោគ គឺពួកគាត់មានគម្រោងផែនការច្បាស់លាស់និងសិក្សាលម្អិតពីទីផ្សារ និងសក្ដានុពលលើវិស័យដែលខ្លួនបំរុងនឹងបណ្ដាក់ទុន ។ លោកបានបន្តថា «បច្ចុប្បន្ននេះវិនិយោគិនជប៉ុនចូលមកកម្ពុជា កាន់តែច្រើនឡើងៗ ហើយអ្វីដែលសំខាន់សម្រាប់សម្រួលដល់ការវិនិយោគរបស់វិនិយោគិនជប៉ុន ក៏ដូចជាវិនិយោគិនដទៃទៀតនោះ គឺហេដ្ឋារចនាសម្ព័ន្ធ ដែលតម្រូវអោយយើងត្រូវអភិវឌ្ឍន៍ហេដ្ឋារចនាសម្ព័ន្ធដើម្បីទាក់ទាញវិនិយោគិនទាំងនោះមកកម្ពុជាកាន់តែច្រើនឡើងទៀត បើទោះ បីជាបច្ចុប្បន្ននេះរដ្ឋាភិបាលកំពុងអភិវឌ្ឍន៍នូវផ្លូវល្បឿនលឿន និងមានគម្រោងសាងសង់បន្តបន្ទាប់ទៀតផងដែរ » ។
លោកបានបន្ថែមថា កម្ពុជាប្រៀបដូចជាកូនក្រមុំដ៏ស្រស់ស្អាតមួយអញ្ចឹង ដែលមានទីតាំងនៅចំ ចំណុចកណ្ដាលអាស៊ាន ជាពិសេសនោះកម្ពុជាមិនដែលជួបគ្រោះធម្មជាតិដូចជាគ្រោះរញ្ជួយដី បាតុភូតស៊ូណាមិ និងខ្យល់ព្យុះធំៗនោះឡើយ ។ ចំណុចទាំងនេះហើយដែលវិនិយោគិនមកពីគ្រប់ទិសទី បានបេតីនិងចង់មកបណ្ដាក់ទុនវិនិយោគនៅក្នុងប្រទេសកម្ពុជា ។ ចំណែកកត្តាដែលពិសេសជាងគេមួយទៀតនោះ គឺកត្តាសុខសន្តិភាព ។ បើពុំមានកត្តានេះទេ គ្មានវិនិយោគិនណាហ៊ានយកលុយរាប់រយពាន់លានដុល្លារមកបោះទុននៅកម្ពុជាឡើយ ។
លោកឈួន រ៉េនឌី សហគ្រិនកម្ពុជាមួយរូបបាននិយាយថា ក្នុងនាមជាសហគ្រិនកម្ពុជាមួយរូប លោកពិតជាចង់បានដៃគូជប៉ុនដើម្បីដាក់ទុនវិនិយោគនិងធ្វើជំនួញរួមគ្នានៅកម្ពុជា ។ ហើយក្នុងនាមជាអ្នកវិនិយោគមួយរូបផងដែរនោះ លោកនឹងព្យាយាមទាក់ទាញវិនិយោគិន ទៅតាមសមត្ថភាពនិងលទ្ធភាព ដើម្បីអោយគេមកវិនិយោគនៅក្នុងប្រទេសកម្ពុជា ដើម្បីបង្កើតឱកាសការងារ ជូនពលរដ្ឋកម្ពុជា និងរួមចំណែកដល់ការអភិវឌ្ឍសេដ្ឋកិច្ចកម្ពុជា អោយសម្រេចបាននូវចក្ខុវិស័យឆ្នាំ ២០៣០ និងឆ្នាំ ២០៥០ ។
លោក Daiki Homa តំណាងវិនិយោគិនជប៉ុននៅកម្ពុជា ក៏បានមានប្រសាសន៍ផងដែរថា នៅក្នុងប្រទេសកម្ពុជា លោកសម្លឹងមើលឃើញថា មានសក្ដានុពលមួយចំនួនដែលអាចអោយវិនិយោគិនជប៉ុនបណ្ដាក់ទុនវិនិយោគនិងអាចរកផលចំណេញបានផងដែរ ។ លោក Daiki Homa បានបន្តថា «វិស័យដែលអាទិភាពសម្រាប់ពួកយើងអាចបណ្ដាក់ទុនបានរួមមានវិស័យអចលនទ្រព្យ និងសំណង់ វិស័យឧស្សាហកម្ម ជាដើម ដែលសុទ្ធសឹងតែជាវិស័យសំខាន់និងកំពុងត្រូវការអ្នកវិនិយោគ មកពីគ្រប់ទិសទី» ។
ដោយឡែកលោកបណ្ឌិត ឡី សុភាព ប្រធានសមាគមសហព័ន្ធវិនិយោគិនកម្ពុជា បានមានប្រសាសន៍ផងដែរថា ទោះបីជាបច្ចុប្បន្ននេះ កម្ពុជាកំពុងប្រឈមនឹងការដកប្រព័ន្ធអនុគ្រោះពន្ធទំនិញគ្រប់យ៉ាងលើកលែងតែអាវុធ ឬហៅថា EBA របស់សហភាពអឺរ៉ុបក្ដី ក៏វិស័យឧស្សាហកម្មនិងសិប្បកម្មមិនប្រឈមខ្ពស់ដែរ ព្រោះកម្ពុជាមានទីផ្សារកាន់តែទូលាយ ដោយមិនផ្ដោតទៅលើតែទីផ្សារសហគមន៍អឺរ៉ុបមួយនោះទេ ។ លោកបណ្ឌិត ឡី សុភាព បន្តថា « ការដកប្រព័ន្ធនេះ នឹងធ្វើអោយកម្ពុជាកាន់តែខ្លាំង និងអាចឈរដោយខ្លួនឯង ដោយមិនចាំបាច់ពឹងពាក់គេទៀតនោះទេ » ៕ កែសម្រួលដោយ ៖ សុឃាក់
ចែករំលែកព័តមាននេះ