រាជធានីភ្នំពេញ ៖ ជាមួយនឹងព្រឹត្តិការណ៍កាន់តែអស្ចារ្យបំផុតគិតមកដល់ឆ្នាំនេះ គឺជាឆ្នាំទី ៩ ហើយដែលក្រុមហ៊ុន i-Qlick បានរៀបចំឱ្យមាននូវការប្រកួតថតរូប Canon PhotoMarathon នៅលើទឹកដីនៃព្រះរាជាណាចក្រកម្ពុជាយើង ។ នៅក្នុងរយៈពេលចំនួន ៨ ឆ្នាំកន្លងមកនេះ ឃើញថា បេក្ខជន និងបក្ខនារី ដែលបានចុះឈ្មោះប្រកួតនៅក្នុងព្រឹត្តិការណ៍ដ៏ធំមួយនេះ គឺមានការយល់ដឹងកាន់តែច្រើនស្តីពីបទពិសោធន៍ និងគំនិតច្នៃប្រឌិតនៃការផលិតរូបភាពរបស់ខ្លួនតាមប្រធានបទដែលក្រុមហ៊ុន ក៏ដូចជាគណៈកម្មការ ដែលបានដាក់មក ។
នៅថ្ងៃនេះយោងតាមការបញ្ជាក់របស់ក្រុមហ៊ុន i-Qlick បានឱ្យដឹងថា នៅថ្ងៃទី៨ ខែធ្នូ ឆ្នាំ២០១៩ ខាងមុខនេះ ក្រុមហ៊ុន នឹងមានការរៀបចំឡើងនូវព្រឹត្តិការណ៍ការប្រកួត Canon PhotoMarathon លើកទី៩ នៅសាលាតិចណូ ដោយមានការរំពឹងថា នឹងមានការចូលពីសំណាក់បេក្ខជនចំនួនជាង ១០០០ នាក់ មកចូលរួមបង្ហាញថ្វីដៃ និងគំនិតច្នៃប្រឌិតរបស់ខ្លួន ពីព្រោះថាឆ្នាំនេះ គឺខុសពីឆ្នាំមុនៗដោយសារតែក្រុមហ៊ុនបាននាំមកនូវព្រឹត្តិការណ៍ថ្មីៗ ប្លែកៗ ដែលមានភាពសម្បូរបែប និងផ្តល់ចំណេះដឹង និងបទពិសោធន៍កាន់តែពិសេសជាងមុនសម្រាប់ភ្ញៀវទាំងអស់ ដែលបានចូលរួមនៅក្នុងកម្មវិធីនេះ ។
ក្រុមហ៊ុន i-Qlick បានឱ្យដឹងទៀតថា នៅក្នុងថ្ងៃនោះ បន្ទាប់ពីបើកសម្ពោធនូវប្រធានបទ ហើយក្រុមហ៊ុនបានរៀបចំនូវការប្រកួតហ្គេម Mobile Legend, ការច្នៃប្រឌិតនូវការផ្គុំរូបភាពសាងសង់អគារពី Lego, ការបង្ហាញនូវទេពកោសល្យនៃការរៀបចំខ្លួនជាមួយនឹងស្ទីលប្លែករបស់ Cosplay, ហើយក៏មានការ៉េមហ្វ្រីៗពីក្រុមហ៊ុន Wall’s កាដូពិសេសពី True Money ចំនួនមួយដុល្លារផងដែរ ។ អ្វីដែលកាន់តែពិសេសនោះ គឺនៅក្នុងព្រឹត្តិការណ៍នោះ ក៏នឹងមានការដាក់តាំង Fan gathering Star Wars ថែមទៀតផង ។
ក្រុមហ៊ុនបន្ថែមថា ព្រឹត្តការណ៍នេះ គឺអនុញាតឱ្យមានការចូលរួមដោយសេរី គ្រប់វ័យ គ្រប់ភេទ ហើយវិញ្ញាសារនឹងត្រូវបញ្ចេញនៅថ្ងៃប្រកួតតែម្តង ដែលបង្ហាញពីការប្រកួតដោយស្មើរភាពបំផុត ។ សម្រាប់លក្ខខណ្ឌ គឺមិនអនុញ្ញាតឲ្យថតរូបតាមទូរស័ព្ទស្មាតហ្វូន នឹងថាប់ប្លេតនោះទេ ប៉ុន្តែសម្រាប់កាមេរ៉ាគ្រប់ម៉ូដែល ហើយនិង Gopro គឺអាចចូលរួមបាន ។
ចំពោះរូបថតដែលចូលរួម គឺត្រូវតែថតក្នុងអំឡុងពេលប្រកួតប៉ុណ្ណោះ សម្រាប់រូបដែលមិនថតក្នុងអំឡុងពេលប្រកួតមិនអនុញ្ញាតឲ្យចូលរួមទេ អ្វីដែលពិសេសបំផុតនោះត្រូវតែជារូបដែលអ្នកថតដោយខ្លួនឯង ។ ជាមួយគ្នានេះ អ្នកអាចធ្វើការសម្រួលរូបថតខ្លះតែមិនត្រូវកាត់ត (edit) នោះទេ ។
ឧទាហរណ៍ អ្នកអាចសម្រួលពណ៌ក្នុងរូបថត តែអ្នកមិនអាចកាត់តបន្ថែម បន្ថយរូប នោះទេ ។ មួយវិញទៀត សម្រាប់ប្រធានបទមួយ ដាក់រូបបានតែមួយប៉ុណ្ណោះ ហើយត្រូវប្រាកដថា រូបដែលត្រូវផ្ញើជាជម្រើសល្អបំផុតរបស់អ្នក ។ សម្រាប់រូបដែលមិនត្រូវតាមលក្ខខណ្ឌការប្រកួត នឹងមិនអនុញ្ញាតឲ្យចូលរួមទេ ។
គួរបញ្ជាក់ថា កម្មវិធីប្រគួតថតរូបប្រចាំឆ្នាំ Canon PhotoMarathon នេះ ត្រូវបានបង្ហាញឱ្យឃើញថា បានស្វែងរកអ្នកថតរូប ដែលគ្មានអ្នកស្គាល់ឱ្យក្លាយជាអ្នកថតរូបដែលទីចាប់អារម្មណ៍ និងចាប់ផ្តើមសាងកេរ្តិ៍ឈ្មោះរបស់ខ្លួននៅក្នុងប្រទេសកម្ពុជា ។ តាមរយៈការប្រកួតប្រជែងនេះ យើងនឹងបានរកឃើញអ្នកថតរូបដែលមានទេពកោសល្យខ្ពស់ជាច្រើន ក្នុងប្រទេសកម្ពុជា ហើយក៏បានផ្តល់ឱ្យពួកគេនូវទំនុកចិត្ត ដើម្បីបំពេញក្តីសុបិនរបស់គ្រប់ៗគ្នា ។
កន្លងមក មានមនុស្សជាច្រើន បានខិតខំប្រឹងប្រែងយ៉ាងខ្លាំងរាងៗខ្លួនលើវិស័យថតរូបមួយនេះ ហើយជាមួយកម្មវិធីប្រកួតថតរូប Canon PhotoMarathon នេះ យើងនឹងនាំពួកគេឱ្យទៅដល់គោលដៅនៃចំណង់ចំណូលចិត្តដូចគ្នា រួមគ្នា, ការអភិវឌ្ឍសហគមន៍អ្នកថតរូប និងចំណងមិត្តភាព និងគាំទ្រគ្នាទៅវិញទៅមក ដែលជាទិសដៅដែលអាចអោយពួកគេអភិវឌ្ឍជំនាញរបស់ពួកគេបន្ថែមទៀត រួមទាំងការចាប់អារម្មណ៍របស់ពួកគេ និងការផ្លាស់ប្តូរគំនិតថ្មីអំពីការ ថតរូប ។
ក្រុមហ៊ុន i-Qlick បានបញ្ជាក់ឱយដឹងទៀតថា Canon PhotoMarathon លើកទី ៩ នេះ គឺមានការផ្តល់រង្វាន់កាន់តែធំ និងកាន់តែច្រើនជាងមុន ដែលមានរហូតដល់ទៅ ១៨ រង្វាន់ឯណោះដែលមានទឹកប្រាក់សរុប $12,420 ដោយមិនបូករួមទាំង រង្វាន់ដំណើរកម្សាន្តថតរូបនៅក្រៅប្រទសដូចមុនៗនោះទេ ។ ហើយជ័យលាភី នឹងមានឱកាសជួយជំរុញឱ្យអ្នកថតរូបវ័យក្មេងទាំងឡាយនៅកម្ពុជា ដើម្បីស្វែងយល់ពីជំនាញរបស់ពួកគេបន្ថែមទៀតផង ។
សូមជំរាបផងដែរ ការប្រកួត Canon PhotoMarathon លើកទី ៩ នៅថ្ងៃទី ៨ ខែធ្នូខាងមុខនេះ ក៏នឹងមានការចូលរួមតាំងបង្ហាញនូវផលិតផល អេឡិចត្រូនិក ដូចជាកាមេរ៉ា កុំព្យូទ័រ រួមជាមួយនឹងឧបករណ៍ និងសេវាកម្មផ្សេងជាង ១៨ ក្រុមហ៊ុនឯណោះ ដូច្នេះ សូមអញ្ជើញមកចូលរូមចុះឈ្មោះ និងទស្សនាឱ្យបានគ្រប់ៗគ្នា ដើម្បីទទួលបាននូវបទពិសោធន៍ថ្មីៗ រួមទារង្វាន់កាដូអនុស្សវរីយ៍ជាច្រើនទៀតផង ។
Canon PhotoMarathon 2019 បានចូលរួមសហការដោយ Canon, Canon Imaging Academy, Sennheiser, Soundstream, Wall’s, Cellcard, Grab, True Money, Jaikon, Gloria Jean’s, Samba, Davinci, Peacock, Clipper Tea, Gulai, Who’s Tea, Koh Santepheap, Sabay, Electronic World, Lumiere, Senze, MSI, Kilat Dark Fantasy, Westic and Legend Cinema ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ