រាជធានីភ្នំពេញ ៖ សម្តេច ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជាបានអះអាងថា ជោគជ័យ និងក្តីសប្បាយរីករាយបានមកដល់ថ្ងៃនេះមានប្រភពពីថ្ងៃ២ ធ្នូ និង៧មករា ឆ្នាំ១៩៩៧៩ ។ សម្តេច ហេង សំរិន បានថ្លែងក្នុងមិទ្ទីញអបអរសាទរខួបអនុស្សាវរីយ៍ លើកទី៤១ ឆ្នាំទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា នាព្រឹកថ្ងៃទី២ ធ្នូ ឆ្នាំ២០១៩ នៅសាលសន្និសីទចតុម្មុចយ៉ាងដូច្នេះថា ៖«យើងបានលុបបំបាត់នូវស្នាមបែកបាក់ប្រះឆាក្នុងសង្គមជាតិធ្វើឲ្យធ្លុងមហាសាមគ្គីផ្ទៃក្នុងជាតិកាន់តែរឹងមាំឡើង ។
មហាសាមគ្គីផ្ទៃក្នុងជាតិ ជាឧត្តមភាព និងជាមូលដ្ឋានគ្រឹះ ដើម្បីឈានទៅសម្រេចនូវគោលដៅចុងក្រោយ គឺការស្ថាបនាប្រទេសកម្ពុជាប្រកបដោយវឌ្ឍនភាពដែលប្រជាជនយើងរស់នៅសម្បូរសប្បាយក្នុងសន្តិភាព សេរីភាព យុត្តិធម៌ និងភាពថ្លៃថ្នូរជារៀងរហូតតទៅ» ។ សម្តេចប្រធានកិត្តិយសគណបក្សប្រជាជនក៏បានបន្តថា ដើម្បីសម្រេចគោលដៅនេះរណសិរ្សសាមគ្គី អភិវឌ្ឍន៍មាតុភូមិកម្ពុជាក៏ដូចជា គណបក្សប្រជាជនកម្ពុជាកើតចេញពីប្រជាជនជារបស់ប្រជាជន និងដើម្បីប្រជាជន និងបន្តគាំទ្រយ៉ាងពេញទំហឹងដល់ការអនុវត្តឲ្យបានជោគជ័យនូវគោលនយោបាយ អភិវឌ្ឍន៍របស់រាជរដ្ឋាភិបាល ។
សម្តេចបន្ថែមថា គោលដៅរបស់រាជរដ្ឋាភិបាលបានចេញជាយុទ្ធសាស្ត្រចំនួន៤ គឺ១. ធានាឲ្យបានកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់៧% ប្រកបដោយចីរភាព និងធន់នឹងវិបត្តិតាមរយៈការធ្វើពិពិកម្មមូលដ្ឋានសេដ្ឋកិច្ចថ្មីៗឲ្យទូលំទូលាយ និងមានភាពប្រកួតប្រជែងជាមួយនឹងការថែរក្សាស្ថិរភាពម៉ាក្រូសេដ្ឋកិច្ច តាមរយៈការគ្រប់គ្រងអតិផរណាឲ្យនៅទាប ការធានាស្ថិរភាព អត្រាប្តូប្រាក់ ការខិតខំបង្កើនទុនបម្រុងជាប្រចាំ និងការគ្រប់គ្រងបំណុលសាធារណៈដោតគត់មត់ ។
២. បង្កើតការងារឲ្យកាន់តែច្រើនទាំងបរិមាណ និងគុណភាពជូនដល់ប្រជាជនកម្ពុជា ពិសេសសម្រាប់ស្រទាប់យុវជនតាមរយៈការផ្តល់ជំនាញព័ត៌មាន ទីផ្សារការងារ ការកែលម្អខណ្ឌការងារ ការលើកកម្ពស់សកម្មភាធុរកិច្ច និងការជំរុញ ការវិនិយោគ ទាំងក្នុងប្រទេស និងក្រៅប្រទេស ។ ៣. សម្រេចឲ្យបាននូវគោលដៅកាត់បន្ថយភាពក្រីក្រឲ្យស្ថិតក្នុងអត្រាទាប ក្រោម១០% ការពារមិនឲ្យមានភាពក្រីក្រវិលត្រឡប់មកវិញ ដោយផ្តោតលើការលើកកម្ពស់ការចូលរួមក្នុងយន្តការទីផ្សារ ការអនុវត្តគោលនយោបាយគាំពារសង្គមការកាត់បន្ថយបន្ទុកជីវភាពរស់នៅ និងការផ្តល់សេវាសាធារណៈប្រកបដោយគុណភាព ។ ៤. បន្តពង្រឹងសមត្ថភាព និងអភិបាលកិច្ចនៃស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ដើម្បីធានាឲ្យបាននូវប្រសិទ្ធភាព នៃសេវាសាធារណៈ សំដៅបម្រើប្រជាជនឲ្យបានកាន់តែប្រសើរឡើង ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ