ខេត្តកំពត ៖ បើតាមសេចក្តីរាយការណ៍បឋមបានឱ្យដឹងថា យុវជនម្នាក់ រួមទាំងអ្នកភូមិផ្សេងទៀតចុះទៅក្នុងសមុទ្រដើម្បីស្វែងរកគ្រឿងសមុទ្រ តែពេលអ្នកភូមិឯទៀតៗមកដល់ផ្ទះវិញគ្រប់គ្នា តែបែរជាបាត់យុវជនរូបនេះមិនឃើញមកវិញនោះទេ លុះពេលទឹកចាប់ផ្តើមនាដ ក៏ឃើញស្បែកជើងយុវជនរូបនេះ ក្រោយមកស្រាប់តែប្រទះឃើញយុវជនរូបនេះអណ្តែតនៅជាប់កោះត្រល់តែម្តង នៅព្រឹកថ្ងៃទី២៩ ខែវិច្ឆិកា ឆ្នាំ២០១៩ តែក្រុមគ្រួសារអត់លទ្ធភាពដឹកជនរងគ្រោះមកផ្ទះទេ គឺបានត្រឹមតែធ្វើបុណ្យប៉ុណ្ណោះ។
សេចក្តីរាយការណ៍បន្តថា យុវជនរងគ្រោះខាងលើឈ្មោះ ចៀម សុចាន់ អាយុ18ឆ្នាំ រស់នៅភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប។
សេចក្តីរាយការណ៍បន្តថា មុនពេលកើតហេតុ យុវជនរងគ្រោះ រួមទាំងអ្នកភូមិកំពង់ត្រឡាចផ្សេងទៀត បានចុះទៅក្នុងសមុទ្រដើម្បីស្វែងរកគ្រឿងសមុទ្រ ដោយខ្លះកប់នៅក្នុងដី និងខ្លះទៀតរុញឈូចប្រមូលកូនបង្គារនៅក្នុងសមុទ្រ។ ក្រោយមកអ្នកភូមិឯទៀតៗបានត្រឡប់មកផ្ទះសម្បែងវិញគ្រប់ៗគ្នាក៏ដោយ ប៉ុន្តែយុវជនរងគ្រោះមិនឃើញត្រឡប់មកផ្ទះវិញនោះទេ។
សេចក្តីរាយការណ៍បន្តទៀតថា ទើបក្រុមគ្រួសារតាមរកយុវជនរងគ្រោះដែលបានបាត់ខ្លួនកាលពីថ្ងៃទី25 វិច្ឆិកានេះ នៅក្នុងផ្ទៃសមុទ្រ ប៉ុន្តែឃើញត្រឹមតែស្បែកជើងយុវជនរងគ្រោះប៉ុណ្ណោះ ខណៈពេលដែលទឹកចាប់ផ្តើមនាជ។ ទោះជាបែបណា ក្រុមសាច់ញាតិជនរងគ្រោះ និងអ្នកភូមិកំពង់ត្រឡាច មិនសង្ឃឹមឡើយថា ជនរងគ្រោះអាចនៅរស់រានមានជីវិតឡើយ។
សេចក្តីរាយការណ៍បន្តទៀតថា លុះនៅព្រឹកថ្ងៃទី29 វិច្ឆិកា ស្រាប់តែឃើញមនុស្សម្នាក់
អណ្តែតទឹកជាប់នៅកោះត្រល់ ដែលគេស្គាល់ច្បាស់ថា ពិតជាយុវជនរងគ្រោះដែលបាត់ខ្លួនពិតប្រាកដមែន ។
បើតាមការរៀបរាប់ពីបងស្រី ចៀម សុភាព អាយុ36ឆ្នាំ ត្រូវជាបងបង្កើតរបស់ជនរងគ្រោះបាននិយាយប្រាប់កាលពីថ្ងៃរសៀលថ្ងៃទី30 ខែវិច្ឆិកាថា ប្អូនប្រុសរបស់ខ្លួនមានសតិមិនល្អដូចគេឯងនោះទេ ប៉ុន្តែប្អូនប្រុសគាត់អាចធ្វើការបានជាធម្មតា ដោយបច្ចុប្បន្នប្អូនប្រុសរបស់គាត់រស់នៅជាមួយនឹងប្អូនស្រីម្នាក់ទៀត ហើយប្អូនប្រុសរបស់គាត់ដូចជាកំព្រាម្ដាយឪពុកក៏ថាបានដែរ ព្រោះម្ដាយបង្កើតទើបតែបាត់បង់ជីវិតបានតែ8ខែទេ រីឯឪពុកក៏មានប្រពន្ធចុងក្រោយទៀត។
បងស្រីជនរងគ្រោះបានចេញមកពីរោងបុណ្យហើយនិយាយទាំងអួលដើម.កថា ទោះជាគេប្រាប់ដំណឹងថា រកឃើញប្អូននៅកោះត្រល់ក៏ដោយ ក៏ក្រុមគ្រួសារមិនមានលទ្ធភាពដឹកប្អូនប្រុសមកផ្ទះបានទេ ដោយសារតែពួកគាត់ជាបងៗសុទ្ធតែមានជីវភាពក្រីក្រ ហើយការធ្វើបុណ្យឧទ្ទិសកុសលឱ្យប្អូន្រប្រុសនេះ បើគិតពីថ្ងៃទី25 មកដល់ថ្ងៃ30 ខែវិច្ឆិកានេះ គឺគម្រប់7ថ្ងៃហើយ។ បងស្រីរងគ្រោះនិយាយបន្តថា ការរៀបចំធ្វើបុណ្យគម្រប់7ថ្ងៃឱ្យប្អូនប្រុសនោះ ក៏ដោយសារអ្នកភូមិដែលបានជួយឧត្តម្ភដែរ។
បើតាមមន្ត្រីនគរបាលការពារដែនទឹកខេត្តកែប បាននិយាយប្រាប់ថា បន្ទាប់ពីបាត់ខ្លួនយុវជនរងគ្រោះ នគរបាលការពារដែនទឹកបានចេញរុករកដែរ ហើយអ្នកនេសាទក៏បានប្រទះឃើញមនុស្សអណ្តែតទឹកដែរ តែពេលទៅដល់រកមិនឃើញនោះទេ។ ទើបនៅថ្ងៃទី29 វិច្ឆិកានេះ ត្រូវបានគេប្រទះឃើញម្ដងទៀត គឺនៅកោះត្រល់នេះតែម្តង ។ នេះបើយោងតាមការអះអាងពីអាជ្ញាធរវៀតណាមជូនដំណឹងមកអាជ្ញាធរខ្មែរខេត្តកែប។ (កែសម្រួលដោយ ៖ បុប្ផា)
ចែករំលែកព័តមាននេះ