រាជធានីភ្នំពេញ ៖ កាលពីថ្ងៃទី៣០ វិច្ឆិកា ឆ្នាំ២០១៩ ការប្រកួតជ្រើសរើសជើងឯក នៅលើសង្វៀនទូរទស្សន៍ប៉ុស្តិ៍លេខ៥ មិនមានការប្រកួតជម្រុះ ឬដណ្ដើមប្រាក់រង្វាន់គ្នានោះទេ ដោយសារតែកម្មវិធីជម្រើសបានរួចមកហើយ នូវបេក្ខជន២រូបឡើងទៅប្រកួតវគ្គផ្ដាច់ព្រ័ត្រ ហើយតម្រូវឱ្យបេក្ខជនទាំងពីរសម្រាកមួយសប្ដាហ៍។
យ៉ាងណាមិញការប្រកួតរវាងកីឡាករជើងថ្មីគូបើកឆាក២រូប បានធ្វើអោយអ្នកគាំទ្រកោតសរសើរ ដោយសារតែម្នាក់ៗសុទ្ធតែស្ទុះស្ទារវាយស៊ូ ធ្វើអោយម្នាក់ៗលាន់មាត់ថា ចង់ឃើញគូប្រដាល់ទូទៅវាយអោយបានល្អបែបនេះ។
កីឡាករដែលបានទទួលការសរសើរនេះ ជួបគ្នាក្នុងកម្មវិធីប្រកួតកីឡាប្រដាល់កំពូលជើងឯក TV5 BOXING KNOCK OUT SERIES ;K-Cement នៅក្នុងសប្ដាហ៍តម្រូវអោយបេក្ខជនជើងឯកសម្រាកយកកម្លាំង។សម្រាប់ការប្រកួតជ្រើសរើសជើងឯករដូលកាលទី៦ ប្រភេទទម្ងន់៦០គីឡូក្រាម សល់ជើងខ្លាំង២គូ ដោយតម្រូវអោយសម្រាក ត្រៀមដណ្តើមពានសប្តាហ៍ក្រោយ។
គូប្រកួត ដែលទទួលការសរសើរនោះ គឺជាគូបើកឆាករវាងកីឡាករ វ៉ុន វ៉ន មកពីក្លិបអេភូថងកីឡា ប្រកួតជាមួយបង្គោលខៀវ ប៉ុក វិបុល មកពីក្លិបកងពលតូចទ័ពពិសេសឆ័ត្រយោង៩១១។
អ្នកទាំង២ មានប្រវត្តិប្រកួតល្អ មានបទពិសោធន៍ច្រើន ឯក្លិបហាត់ក៏ ជាក្លិបល្បីពេញពិភពប្រដាល់ដូចគ្នា។ បើការប្រយុទ្ធចាប់ពីទឹកដំបូងមក បងង្គោលក្រហមវ៉ុន វ៉ន មិនសូវជាវាយខ្លាំងប៉ុន្មាននោះទេ ដោយក្បាច់ចេញមកប្រហាក់ប្រហែលគ្នា មិនលើគ្នា។
ក្រោមសម្រែកអោយ ចូលវាយលុកពីមហាជន អ្នកទាំង២បានប្រតាយប្រតប់គ្នា ចាប់ពីទឹកទី៣។ ជាការមើលឃើញបង្គោលខៀវ ប៉ុក វិបុលថមថយកម្លាំង ធ្វើអោយដៃគូឆ្មក់ វាយចូលចំគោលដៅម្តងហើយម្តងទៀតរហូត បែកចិញ្ចើមខាងស្តាំហូរឈាម។ ដោយ២ទឹកចុងក្រោយបង្គោលខៀវនៅតែធ្វើមិនបានល្អ នាវិនាទីចុងក្រោយ បានប្រកាសអោយចាញ់ពិន្ទុបង្គោលក្រហម។(កែសម្រួលដោយ ៖ បុប្ផា)
ចែករំលែកព័តមាននេះ