ខេត្តក្រចេះ ៖ តាមសេចក្តីរាយការណ៍បឋមបានឱ្យដឹងថា មានករណីឪពុកមាបានផ្តល់ជម្រកឲ្យក្មួយស្នាក់នៅ លុះពេលពួកគេឈ្លោះប្តីប្រពន្ធ ស្រាប់តែដុតផ្ទះនោះចោលហើយនាំគ្នារត់គេចខ្លួនបាត់ ។ ហេតុការណ៍ខាងលើនេះបានកើតឡើងកាលពីវេលាម៉ោង៨និង១៥នាទីព្រឹកថ្ងៃទី២៩ ខែវិច្ឆិកា ឆ្នាំ២០១៩…
ខេត្តក្រចេះ ៖ តាមសេចក្តីរាយការណ៍បឋមបានឱ្យដឹងថា មានករណីឪពុកមាបានផ្តល់ជម្រកឲ្យក្មួយស្នាក់នៅ លុះពេលពួកគេឈ្លោះប្តីប្រពន្ធ ស្រាប់តែដុតផ្ទះនោះចោលហើយនាំគ្នារត់គេចខ្លួនបាត់ ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង១៥នាទីព្រឹកថ្ងៃទី២៩ ខែវិច្ឆិកា ឆ្នាំ២០១៩ នៅចំណុចដីសម្បទានសង្គមកិច្ច ក្នុងភូមិស្វាយជ្រុំ ឃុំថ្មី ស្រុកចិត្របុរី ខេត្តក្រចេះ ។
ឪពុកមាជាម្ចាស់ផ្ទះកើតហេតុឈ្មោះ ឡុញ វៀន អាយុ៤៧ឆ្នាំ និងប្រពន្ធឈ្មោះ ស៊ា នា អាយុ៣៨ឆ្នាំ ជាកសិករ រស់នៅភូមិឃុំកើតហេតុខាងលើ ។ ចំណែកក្មួយប្រុសឈ្មោះ វៀន ជីវ៉ា អាយុ៣២ឆ្នាំ មុខរបរកសិករ និងមានប្រពន្ធឈ្មោះ ភា ស៊ីណា អាយុ២៧ឆ្នាំ ។
តាមសេចក្តីរាយការណ៍បានឱ្យដឹងបន្តថា មួយរយៈកាលកន្លងមកនេះ ឪពុកមាបានឲ្យផ្ទះមានទំហំ៤ម៉ែត្រគុណ៥ម៉ែត្រ ដំបូលប្រក់ស័ង្កសី និងបាំងជញ្ជាំងក្ដារ ឲ្យទៅក្មួយប្រុស និងប្រពន្ធស្នាក់នៅបណ្ដោះអាសន្ន ចំណែកឪពុកមាបានទៅស្នាក់នៅខ្ទមចាំស្រែឆ្ងាយពីភូមិជាមួយប្រពន្ធ ។
តាមសេចក្តីរាយការណ៍បានឱ្យដឹងបន្តទៀតថា លុះនៅថ្ងៃកើតហេតុខាងលើ ស្រាប់តែក្មួយប្រុសមានទំនាស់ពាក្យសម្ដីគ្នាជាមួយប្រពន្ធឈ្មោះ ភា ស៊ីណា ហើយបានធ្វើសកម្មភាពដុតផ្ទះរបស់ឪពុកមា បណ្តាលឱ្យឆេះខ្ទេចអស់ទាំងស្រុងតែម្ដង រួចនាំគ្នារត់គេចខ្លួនបាត់ ។
ក្រោយពេលកើតហេតុ កម្លាំងសមត្ថកិច្ចជំនាញនៃអធិការដ្ឋាននគរស្រុក បានសហការជាមួយនគរបាលប៉ុស្តិ៍រដ្ឋបាលកំពុងធ្វើការស្រាវជ្រាវ និងតាមរកចាប់ខ្លួនក្មួយប្រុស និងប្រពន្ធ ដើម្បីយកមកចាត់ការតាមផ្លូវច្បាប់ហើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)
ចែករំលែកព័តមាននេះ