រាជធានីភ្នំពេញ ៖ ក្រុមអ្នកគាំទ្រ ដែលទទូចសុំឱ្យមានការដោះលែងជនជាប់ចោទ២៣នាក់ បាននាំគ្នាឈរខាងមុខរនាំងដែកបិទផ្លូវរបស់សមត្ថកិច្ចនៅក្បែរសាលាដំបូងរាជធានីភ្នំពេញ ខណៈតុលាការបន្តបើកសវនាការលើជនជាប់ចោទទាំង២៣នាក់ នៅព្រឹកថ្ងៃទី២១ ឧសភា ។ លើកំណាត់វិថីព្រះមុនីរ៉េត ក៏ដូចជាថ្ងៃ២០ ឧសភា ដែរ ដែលការធ្វើចរាចរណ៍ត្រូវបានបិទទាំងស្រុង ។
លោក វន់ ពៅ និងជនជាប់ចោទ២២នាក់ទៀត ត្រូវបានឆ្មាំពន្ធនាគារព្រៃស បញ្ជូនមកកាន់សាលាដំបូងរាជធានីភ្នំពេញ តាំងពីព្រលឹមដើម្បីបន្តសវនាការ ។ ដូចថ្ងៃទី១ដែរ សមត្ថកិច្ចបានបន្តបិទផ្លូវឆ្លងកាត់មុខសាលាដំបូង និងផ្លូវជុំវិញដោយការដាក់រនាំងដែកអមដោយរថយន្តបាញ់ទឹក៧គ្រឿង និងកងកម្លាំងនគរបាលបង្ក្រាបបាតុកម្មរាប់សិបនាក់ ក្នុងគោលបំណងរារាំងសកម្មភាពរបស់ក្រុមអ្នកគាំទ្រជនជាប់ចោទ កម្លាំងសន្តិសុខសណ្តាប់ធ្នាប់ខណ្ឌ បានចាប់យកមេក្រូរបស់ក្រុមអ្នកបឹងកក់មិនឱ្យស្រែកតវ៉ា និងចាប់ប្រមូលយកផ្កាឈូក ។ ជាមួយគ្នាដែរ គេបានឃើញក្រុមព្រះសង្ឃជាច្រើនអង្គបាននិមន្តហែជាក្បួននៅជុំវិញអគារតុលាការផងដែរ ដើម្បីបិណ្ឌបាតឱ្យដោះលែងជនទាំង២៣នាក់ ។
មន្ត្រីសង្កេតការណ៍សវនាការបានអះអាងថា ថ្ងៃនេះជាថ្ងៃដែលតុលាការសាកសួរដេញដោលលោក វន់ ពៅ បន្តពីម្សិលមិញ (២០ឧសភា) និងជាការសាកសួរជនជាប់ចោទចុងក្រោយបង្អស់ក្នុងសំណុំរឿងជនជាប់ចោទទាំង២៣នាក់ ។ នៅព្រឹកនោះដែរ តំណាងសហជីពបានព្រមានតុលាការថា នឹងធ្វើមហាបាតុកម្មទូទាំងប្រទេស ប្រសិនបើតុលាការកាត់ក្តីឱ្យលោក វន់ ពៅ និងជនសង្ស័យ២២នាក់ទៀត មានទោសនិងបន្តឃុំឃាំងនោះ ។ សាលាដំបូងរាជធានីភ្នំពេញបានបន្តសវនាការជំនុំជម្រះជនជាប់ចោទចំនួន២៣នាក់រួមទាំងលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធទៅតាមការគ្រោងទុក ។ ជនជាប់ចោទទាំងអស់ត្រូវបាននាំខ្លួនមកកាន់បន្ទប់សវនាការក្រោមការយាមកាមយ៉ាងតឹងតែងបំផុតពីក្រុមសមត្ថកិច្ច និងអាជ្ញាធរមានសមត្ថកិច្ច ។ សវនាការនេះបានឈានចូលដល់ថ្ងៃទី៤ ក្នុងការសួរដេញដោលលើជនជាប់ចោទ និងសាក្សីជនរងគ្រោះពីសំណាក់ចៅក្រម ព្រះរាជអាជ្ញា និងមេធាវីការពារក្តីជនជាប់ចោទ មេធាវីជនរងគ្រោះនៅក្នុងសំណុំរឿងស្តីពីបទចោទ «បំផ្លិចបំផ្លាញទ្រព្យសម្បត្តិ ញុះញង់ឱ្យប្រព្រឹត្តបទបំផ្លិចបំផ្លាញទ្រព្យសម្បត្តិ និងសមគំនិតក្នុងបទបំផ្លិចបំផ្លាញទ្រព្យសម្បត្តិ ។
នៅថ្ងៃទី២១ ឧសភា បន្ទប់សវនាការនៅតែដំណើរការ២បន្ទប់ដដែល ក្នុងនោះបន្ទប់ទី១ ដំណើរការដោយលោកចៅក្រម កែវ មុន្នី ព្រះរាជអាជ្ញារងចំនួនពីរនាក់ គឺលោក លី សុផាន់ណា និងលោក ជា ម៉េត និងមានមេធាវីការពារក្តីជនជាប់ចោទចំនួន៥នាក់ និងមេធាវីការពារក្តីជនរងគ្រោះ និងដើមបណ្តឹងចំនួន៣នាក់ មានជនជាប់ចោទចំនួន១០នាក់រួមទាំងលោក វន់ ពៅ ត្រូវបានជំនុំជម្រះក្នុងបន្ទប់សវនាការទី១ ។ រីឯបន្ទប់សវនាការទី២ មានជនជាប់ចោទចំនួន១៣នាក់ តែត្រូវបានសាកសួររួចរាល់ហើយ ។ ជនជាប់ចោទ វន់ ពៅ ជាអ្នកចុងក្រោយក្នុងចំណោមជនជាប់ចោទទាំង២៣នាក់ បាននិយាយថា គាត់បានប្រើប្រាស់មេក្រូស្រែកទៅកាន់ក្រុមបាតុករ និងក្រុមសមត្ថកិច្ចនៅពេលមានការប្រឈមមុខដាក់គ្នានៅមុខរោងចក្រយ៉ាកជីង កាលពីខែមករានោះ ។ អង្គការរបស់លោកមានភារកិច្ចជួយសម្របសម្រួលក្នុងការការពារសិទ្ធិកម្មករដែលពួកគាត់មិនស្ថិតនៅក្រោមច្បាប់ការងារនៃក្រសួងការងារ ឬក្រុមអ្នករត់ម៉ូតូឌុបនៅពេលដែលពួកគាត់មានបញ្ហាឬការរំលោភសិទ្ធិរបស់ពួកគាត់ ។
នៅពេលគាត់បានទៅដល់ខាងមុខតំបន់សេដ្ឋកិច្ចពិសេសតាមបណ្តោយផ្លូវជាតិលេខ៤ មានកម្មករម្នាក់បានមកប្រាប់គាត់ថា មានកម្មករ៣នាក់ត្រូវបានចាប់ខ្លួន និងសុំឱ្យមានការជួយពួកគេផង ។ ឆ្លើយតបនឹងសំនួររបស់ចៅក្រម និងព្រះរាជអាជ្ញាលោក វន់ ពៅ បាននិយាយទៀតថា នៅពេលនោះគាត់បាននាំព្រះសង្ឃដែលបានរួមដំណើរជាមួយគាត់ពីខាងមុខតំបន់សេដ្ឋកិច្ចពិសេសទៅកាន់មុខរោងចក្រយ៉ាកជីង ដែលនៅទីនោះមានក្រុមកម្មករប្រមាណ១០០នាក់ បានឈរស្រែកតវ៉ាថា ពួកគាត់សូមឱ្យដោះលែងតំណាងរបស់ពួកគេចំនួនបីនាក់ដែលទាហានចាប់យកទៅ និងទាមទារប្រាក់ខែគោល១៦០ដុល្លារអាមេរិក ។ តែលោកមិនបាននាំពួកអ្នកតវ៉ាទាំងនោះទៅកាន់រោងចក្រយ៉ាកជីងទេ ហើយពួកគេបានទៅទីនោះដោយខ្លួនពួកគេផ្ទាល់ ចំពោះលោកវិញបានទៅទីនោះគ្រាន់តែទៅមើលសភាពការណ៍ ថាតើវាមានអ្វីកើត ឡើង ។
គួរកត់សម្គាល់ថា កាលពីថ្ងៃទី២០ ឧសភា ការសួរដេញដោលក្នុងបន្ទប់សវនាការទី១ លើលោក វន់ ពៅ បានធ្វើឡើងយ៉ាងតឹងតែង ព្រោះមានរូបភាពវីដេអូឃ្លីបត្រូវបានចាក់នៅក្នុងបន្ទប់សវនាការតែម្តងបានធ្វើឱ្យលោក វន់ ពៅ ពិបាកក្នុងការទទួលស្គាល់ ព្រោះសំឡេងទាំងនោះ គឺជាសម្តីរបស់គាត់បានស្រែកទៅកាន់សមត្ថកិច្ច និងក្រុមអ្នកតវ៉ា ។ ចៅក្រមបានបញ្ជាក់ពីសម្តីរបស់លោក វន់ ពៅ ដែលធ្លាប់ប្រើប្រាស់កាលពីពេលកន្លងមក នៅពេលមានបាតុកម្មនានាដូចជានៅខាងមុខទីស្តីការគណៈរដ្ឋមន្ត្រី កាលពីថ្ងៃទី៣០ ធ្នូ ២០១៣ ជាដើម ។ លោកចៅក្រម បានសួរលោក វន់ ពៅ ថាបានដឹងថានៅលើរុឺម៉ករបស់លោក មានដាក់ដុំថ្មដែរឬទេ ? ព្រោះលោក វន់ ពៅ ឆ្លើយប្រាប់តុលាការថា គាត់បានទៅកាន់រោងចក្រយ៉ាកជីង និងមានរូបថតខ្លះ ត្រូវបានបង្ហាញពីរូបថតរុឺម៉កមានដុំថ្មជាច្រើន តែ វន់ ពៅ បដិសេធថាមិនបានដាក់ទេ ក៏ប៉ុន្តែទទួលស្គាល់ថា វាជារុឺម៉ករបស់គាត់ ។ នៅពេលមានការតវ៉ាលោកមិនបានដឹងថា អ្នកណាខ្លះស្ថិតក្រោមច្បាប់ការងារ និងអ្នកណាខ្លះមិនស្ថិតនៅក្រោមច្បាប់ការងារ ហើយមានកម្មករប្រមាណ១០០នាក់ ។
តុលាការបានសាកសួរលោក វន់ ពៅ ពេញមួយថ្ងៃ កាលពីថ្ងៃទី២១ ឧសភា លើសកម្មភាពទាំងឡាយរបស់គាត់ដែលមានវត្តមាននៅតំបន់សេដ្ឋកិច្ចពិសេសភ្នំពេញ មុខរោងចក្រវិលស៊ុន និងមុខរោងចក្រយ៉ាកជីង ទីដែលមានការប៉ះទង្គិចបានកើតឡើងរវាងសមត្ថកិច្ចនិងក្រុមអ្នកតវ៉ា ដែលតាមការអះអាងរបស់លោក វន់ ពៅ ថា ភាគច្រើននៃអ្នកតវ៉ាជាស្ត្រី ។ រាល់ការអះអាងនេះ គឺនៅពេលរូបលោកត្រូវបានចាប់ខ្លួនដោយក្រុមសមត្ថកិច្ចដែលគេស្គាល់ថា មកពីកងពលតូចឆត្រយោង៩១១ និងមានមនុស្សជាច្រើនបានចាប់ខ្លួនភ្លាមៗ បន្ទាប់ពីការបង្ក្រាបយ៉ាងចាស់ដៃរបស់សមត្ថកិច្ចទាំងនោះ ប្រដាប់ដោយខែល ដំបងដែក អាវុធ និងដែកទីប ។
លោកវន់ ពៅ បញ្ជាក់ថា មានការប្រើប្រាស់ពាក្យសម្តីមិនសមរម្យកើតឡើងរវាងកម្មករ និងសមត្ថកិច្ច ដែលពាក្យខ្លះពិបាកនឹងនិយាយព្រោះដោយសារតែភាពខឹងសម្បារសមត្ថកិច្ចបានស្រែកជេរកម្មការិនី ព្រះសង្ឃ និងមានអំពើហិង្សាផ្ទុះឡើងដូចជា ការគប់ដបទឹកបរិសុទ្ធដាក់កម្មករ និងមានការតបវិញដោយក្រុមកម្មករ ពេលនោះព្រះសង្ឃ និងរូបគាត់ (វន់ ពៅ) បានចូលខ្លួនសម្របសម្រួលក្នុងទិដ្ឋភាពហិង្សាបែបនេះ បើទោះជាព្រះសង្ឃបិណ្ឌបាត្រសុំឈប់ក៏ដោយ ក៏ភាគីទាំងសងខាងមិនស្តាប់ដែរ ។ មានការកត់សម្គាល់ថា នៅវេលាម៉ោង៣និង៣០នាទីរសៀល លោក វន់ ពៅ អះអាងថា ដោយសារបញ្ហាសុខភាព គឺពិបាកដកដង្ហើម និងមិនអាចបន្តសវនាការបាន លោកចៅក្រមបានប្រកាសពន្យារសវនាការទៅថ្ងៃទី២២ ឧសភា ព្រឹកនេះទៀត ។
ពេញមួយថ្ងៃទី២១ ឧសភា តុលាការបានសាកសួរតែលើជនជាប់ចោទ វន់ ពៅ ម្នាក់បុ៉ណ្ណោះ ជុំវិញសកម្មភាពរបស់គាត់នៅមុនពេលចាប់ខ្លួន និងមានរូបថតជាច្រើន និងវីដេអូឃ្លីបត្រូវដាក់បង្ហាញក្នុងពេលសវនាការ ព្រមទាំងមានសំឡេងលោក វន់ ពៅ ស្រែកតាមមេក្រូ ។ នៅក្នុងសវនាការ គេឃើញមានវត្តមានក្រុមអ្នកការទូត អង្គការសង្គមស៊ីវិល អង្គការការពារសិទ្ធិមនុស្ស និងអ្នកសារព័ត៌មានជាតិ និងអន្តរជាតិជាច្រើន ។ ដោយឡែក នៅបន្ទប់សវនាការទី២ តុលាការនៅតែបន្តតាមនីតិវិធីដល់វេលាល្ងាចទើបមានការនាំខ្លួនចេញពីអគារសាលាដំបូងឆ្ពោះទៅពន្ធនាគារវិញដោយសុវត្ថិភាព ៕
ចែករំលែកព័តមាននេះ