ដោយសារការជួយទាន់ពេល ស្ត្រីម្នាក់សម្រាលកូនកណ្តាលផ្លូវដោយសុវត្ថិភាព
- សៀមរាប
ខេត្តសៀមរាប ៖ លោក ស៊ីន ចាន់ថុល អភិបាលស្រុកពួកបានប្រាប់តាមទូរស័ព្ទនៅព្រឹកថ្ងៃទី២៩ ខែវិច្ឆិកា ឆ្នាំ២០១៩ នេះថា កាលពីវេលាម៉ោង១០និង៣០នាទីយប់ថ្ងៃទី២៧…
ខេត្តសៀមរាប ៖ លោក ស៊ីន ចាន់ថុល អភិបាលស្រុកពួកបានប្រាប់តាមទូរស័ព្ទនៅព្រឹកថ្ងៃទី២៩ ខែវិច្ឆិកា ឆ្នាំ២០១៩ នេះថា កាលពីវេលាម៉ោង១០និង៣០នាទីយប់ថ្ងៃទី២៧ វិច្ឆិកា ឆ្នាំ២០១៩ បុរសជាប្តីបានដឹកប្រពន្ធតាមម៉ូតូទៅកាន់មន្ទីរពេទ្យដើម្បីឆ្លងទន្លេ លុះពេលកំពុងធ្វើដំណើរ ស្រាប់តែស្ត្រីជាប្រពន្ធសម្រាលបានកូនស្រីម្នាក់នៅពាក់កណ្តាលផ្លូវត្រង់ចំណុចជ្រុងខាងជើង និងខាងកើតផ្សារពួក ស្ថិតក្នុងភូមិចំបក់ហែរ ឃុំពួក ស្រុកពួក បង្កការភ្ញាក់ផ្អើលដល់លោកអភិបាលស្រុកពួក និងលោកនាយប៉ុស្តិ៍នគរបាលស្រុកពួក ព្រមទាំងប្រជាការពារ ចុះទៅកាន់កន្លែងកើតហេតុ ព្រមទាំងជួយរករ៉ឺម៉កដឹកទៅកាន់មន្ទីរពេទ្យបង្អែកស្រុកពួក ។
លោកអភិបាលស្រុកបានបន្តថា បន្ទាប់មក លោក និងលោកនាយប៉ុស្តិ៍ ព្រមទាំងប្រជាការពារបានទៅកាន់មន្ទីរពេទ្យដើម្បីទំនាក់ទំនងជាមួយគ្រូពេទ្យធ្វើយ៉ាងណាជួយដល់ស្ត្រីដែលឆ្លងទន្លេកណ្តាលផ្លូវនោះឱ្យមានសុវត្ថិភាពទាំងម្តាយ និងកូន ព្រមទាំងបានជួយជាថវិកានិងសម្ភារមួយចំនួនជូនដល់ស្ត្រីសម្រាលកូនខាងលើនោះដែរ ហើយខាងមន្ទីរពេទ្យក៏មិនបានតម្រូវអោយស្ត្រីឆ្លងទន្លេខាងលើបង់ថ្លៃសេវានោះទេ ។ ពេលនេះស្ត្រីជាម្តាយ និងកូនស្រីមានសុវត្ថិភាពទាំងអស់គ្នា។
លោកអភិបាលស្រុកបានបន្តទៀតថា ប្តីប្រពន្ធទាំង២នាក់ខាងលើនេះ ប្តីឈ្មោះ អោក សាន អាយុ២៨ឆ្នាំ មុខរបរកម្មករសំណង់នៅប្រទេសថៃ ចំណែកប្រពន្ធឈ្មោះ ជឺន សាវើន អាយុ២៨ឆ្នាំ មុខរបរធ្វើស្រែ ។ គ្រួសារនេះរស់នៅភូមិព្រលឹត ឃុំរើល ស្រុកពួក ខេត្តសៀមរាប ។
តាមប្រភពពីប្តីរបស់ស្ត្រីឆ្លងទន្លេខាងលើបានរៀបរាប់ប្រាប់ឱ្យដឹងថា ប្រពន្ធគាត់ឈឺពោះឆ្លងទន្លេ និងបានប្រាប់គាត់ឲ្យជួយយកម៉ូតូដឹកជូនទៅមន្ទីរពេទ្យ ព្រោះឈឺពោះខ្លាំងណាស់ ។
តាមប្រភពដដែលរៀបរាប់បន្តថា ពេលនោះគាត់ក៏ប្រញាប់យកម៉ូតូដឹកប្រពន្ធចេញពីផ្ទះ ក្នុងគោលបំណងទៅកាន់មន្ទីរពេទ្យគន្ធបុប្ផា ក្នុងក្រុងសៀមរាប លុះធ្វើដំណើរមកដល់ពាក់ កណ្តាលផ្លូវ ស្រាប់តែប្រពន្ធឆ្លងទន្លេ បង្កការភ្ញាក់ផ្អើលដល់លោកអភិបាលស្រុក និងលោកនាយប៉ុស្តិ៍ ព្រមទាំងប្រជាការពារចុះមកជួយដឹកបញ្ជូនទៅកាន់មន្ទីរពេទ្យបង្អែកស្រុកពួក ។
ជំនួសមុខឲ្យក្រុមគ្រួសារ បុរសជាប្តីបានថ្លែងអំណរគុណដល់លោកអភិបាលស្រុក និងលោកនាយប៉ុស្តិ៍ ព្រមទាំងប្រជាការពារដែលបានជួយជ្រោមជ្រែងដល់គ្រួសាររបស់គាត់ និងសូមជូនពរដល់អស់លោកជួបប្រទះតែសេចក្តីសុខ ព្រមទាំងពុទ្ធពរទាំង៤ប្រការកុំបីឃ្លៀងឃ្លាតឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ