ទាត់ចោលការប្រឌិត បដិសេធព័ត៌មាន សម រង្ស៊ី ទូរស័ព្ទសួរសុខទុក្ខ កឹម សុខា
- ភ្នំពេញ
រាជធានីភ្នំពេញ ៖ មនុស្សជំនិតលោក កឹម សុខា គឺលោក មុត ចន្ថា បានបដិសេធចំពោះការផ្សាយថា លោក…
រាជធានីភ្នំពេញ ៖ មនុស្សជំនិតលោក កឹម សុខា គឺលោក មុត ចន្ថា បានបដិសេធចំពោះការផ្សាយថា លោក សម រង្ស៊ី បានទូរស័ព្ទមកកាន់លោក កឹម សុខា ដើម្បីសួរសុខទុក្ខនោះ គឺជារឿងមិនពិត ។ លោក មុត ចន្ថា បានបញ្ជាក់នៅថ្ងៃទី២៨ ខែវិច្ឆិកាថា ៖ «យើងច្រានចោលយ៉ាងដាច់អហង្ការចំពោះសាររបស់លោក Sok Paul Pen ដែលជាប្រធានចលនាយុវជននៃចលនាសង្គ្រោះជាតិមានមូលដ្ឋាននៅទីក្រុងឡូវែល (LOWELL) រដ្ឋម៉ាសាឈូសេត(Massachusetts) សហរដ្ឋអាមេរិក ដែលបានសរសេរបង្ហោះនៅលើគណនីហ្វេសប៊ុករបស់ខ្លួនក្នុងបំណងទុច្ចរិតដោយប្រឌិតព័ត៌មានថា «លោកទាំងពីរបានទូរស័ព្ទសួរសុខទុក្ខគ្នា» ដែលបុគ្គលនេះចង់សំដៅដល់លោក កឹម សុខា និងលោក សម រង្ស៊ី» ។
លោកបានគូសបញ្ជាក់ទៀតថា ៖ «យើងបដិសេធយ៉ាងដាច់ខាតចំពោះសារដែលឈ្មោះ Sok Paul Pen បានបង្ហោះនៅលើគណនីហ្វេសប៊ុករបស់ខ្លួននៅមុននេះបន្តិច ។ យើងចាត់ទុកថាទង្វើរបស់លោក Sok Paul Pen មានចេតនាទុច្ច រិតមកលើលោក កឹម សុខា ហើយយើងស្នើឲ្យធ្វើការកែតម្រូវជាបន្ទាន់» ។
ជាមួយគ្នានេះ លោក មុត ចន្ថា ក៏បានស្នើឲ្យអ្នកដែលនិយាយ គួរតែអានច្បាប់ឲ្យបានច្រើននិងយល់ឲ្យច្បាស់ផងដែរ ។
សូមជម្រាបថា ការបដិសេធនេះបន្ទាប់ពីលោក កឹម សុខា ត្រូវបានតុលាការបិទបញ្ចប់ការស៊ើបសួរលើសំណុំរឿងរបស់លោកកាលពេលកន្លងមក ។ ទោះបីជាតុលាការបានបញ្ចប់ការស៊ើបសួរយ៉ាងណាក្តី ក៏លោក កឹម សុខា មិនត្រូវបានអនុញ្ញាតឲ្យធ្វើសកម្មភាពនយោបាយទេ ។ ទោះជាយ៉ាងណាក្តី លោក កឹម សុខា បានទទួលជួបតំណាងស្ថានទូតនានាជាបន្តបន្ទាប់ ។ តាមរយៈលោក មុត ចន្ថា លោក កឹម សុខា បានប្រកាន់ជំហរថា ការងារទំនាក់ទំនងអន្តរជាតិ(ការទូត)របស់ខ្ញុំ ដើម្បីជាតិខ្ញុំ គឺដើម្បីប្រយោជន៍សម្រាប់ប្រទេសកម្ពុជា និងប្រជាពលរដ្ឋខ្មែរ ។
ជាមួយគ្នានេះ លោក មុត ចន្ថា ក៏បានឆ្លើយតបទៅលោក សម រង្ស៊ី ថា នៅកម្ពុជាបានបញ្ចប់នយោបាយហើយ គ្មានអ្វីថ្មីនោះទេគឺគ្រាន់តែនិយាយដដែលៗ បរាជ័យដដែលៗ សម្តីគ្មានឥទ្ធិពលអ្វីទៀតទេ កាន់តែបាត់បង់នូវជំនឿពីមហាជនជិតអស់ហើយ ។ លោកក៏បានហៅការលើកឡើងរបស់លោក សម រង្ស៊ី ថាការនិយាយនេះគ្រាន់តែកំដរអ្នកសារព័ត៌មានឲ្យមានរឿងសរសេរ កុំឲ្យភ្លេចឈ្មោះខ្លួនប៉ុណ្ណោះ ។ លោក មុត ចន្ថា បញ្ជាក់ថា ៖ «ថាអីថាទៅ ចាក់លោក កឹម សុខា មិនលោតតាម ព្រោះសំឡេងបក្សប្រឆាំងជាផ្លូវការ ទូតតំណាងប្រទេសនីមួយៗ គេមកនិយាយជាមួយលោក កឹម សុខាដល់ផ្ទះ ។ ឥឡូវបក្សកាន់អំណាចធីប(បិទ)ទៀត គេថាគេមិនខ្វល់ចាប់ទៀត ។ ឱកាសក៏បាត់បង់ នៅសល់តែនិយាយឡប់ឡែកំដរអ្នកទ័លច្រកខ្លះប៉ុណ្ណឹង» ។
ការចេញប្រតិកម្មទាត់ចោលភ្លាមៗរបស់មន្ត្រីជំនិតលោក កឹម សុខានេះ ត្រូវបានអ្នកវិភាគនយោបាយកម្ពុជា លោកបណ្ឌិត គិន ភា មើលឃើញនូវទិដ្ឋភាព២ ដែលត្រូវបានដកស្រង់សម្តីដោយវិទ្យុបារាំងអន្តរជាតិនៅថ្ងៃទី២៨ ខែវិច្ឆិកាថា ទី១-ការសរសេរថា លោក កឹម សុខា និងលោក សម រង្ស៊ី ទាក់ទងគ្នាតាមទូរស័ព្ទនេះ អាចជារូបភាពក្លែងក្លាយមួយក្នុងគោលបំណងចង់បង្ហាញឱ្យឃើញថា លោក កឹម សុខា និងលោក សម រង្ស៊ី នៅតែជាមនុស្សតែមួយ ។ តាមលោកបណ្ឌិត គិន ភា រូបភាពលោក កឹម សុខា និង លោក សម រង្ស៊ី ជាមនុស្សតែមួយនេះ គឺជានយោបាយឃោសនាដ៏សំខាន់បំផុតសម្រាប់ក្រុមអតីតគណបក្សប្រឆាំង ។
ចំណែកទិដ្ឋភាពទី២វិញ លោកបណ្ឌិត គិន ភាលើកឡើងថា ព័ត៌មាននេះអាចនឹងធ្វើឱ្យមានការយល់ច្រឡំគ្នារវាងលោក កឹម សុខា និងតុលាការដែលជាអ្នកឃ្លាំមើលសកម្មភាពរបស់លោក កឹម សុខា ។ ត្រង់ចំណុចនេះ លោកបណ្ឌិត គិន ភា បញ្ជាក់ថា តុលាការអាចនឹងគិតថា លោក កឹមសុខា អាចនឹងធ្វើសកម្មភាពនយោបាយដែលតុលាការហាមឃាត់ ព្រោះបើពួកគេទាក់ទងគ្នាមែន គឺគ្មាននិយាយអ្វីក្រៅពីនយោបាយឡើយ៕
ចែករំលែកព័តមាននេះ