រាជធានីភ្នំពេញ ៖ គ្រោងឆ្អឹង ស្បែក និងគ្រឿងក្នុងគោមួយក្បាលមានសភាពហើមស្អុយទៅហើយ ត្រូវបានបុរសជាអ្នកដាក់មងម្នាក់ប្រទះឃើញនៅក្នុងទឹកប្រឡាយមួយកន្លែងនៅក្នុងបរិវេណក្លឹបវាយកូនហ្គោលមួយកន្លែង ។ បន្ទាប់មកបុរសជាអ្នកដាក់មងបានរាយការណ៍ជូនលោកមេភូមិឲ្យចុះទៅពិនិត្យមើលកន្លែងកើតហេតុ ហើយគេសង្ស័យថាគោ១ក្បាលនេះត្រូវក្រុមជនសង្ស័យលួចដឹកចេញពីកន្លែងណាមួយរួចពន្លះយកសាច់ទៅលក់អស់រយៈពេលច្រើនថ្ងៃកន្លងមកហើយ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង៣០នាទីព្រឹកថ្ងៃទី២៨ ខែវិច្ឆិកា ឆ្នាំ២០១៩ នៅក្នុងបរិវេណក្លឹបវាយកូនហ្គោលរ៉ូយ៉ាល់ភ្នំពេញ ចម្ងាយពីមហាវិថីឈ្នះឈ្នះជិត១ពាន់ម៉ែត្រ ស្ថិតនៅក្នុងភូមិត្រពាំងធ្នង់ សង្កាត់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅវេលាព្រឹកកើតហេតុ មានបុរសម្នាក់មិនស្គាល់ឈ្មោះរស់នៅក្នុងភូមិគោកព្រិច សង្កាត់សំរោងក្រោម បានធ្វើដំណើរចេញពីផ្ទះទៅមើលមងដែលគាត់បានដាក់កាលពីវេលាល្ងាចថ្ងៃទី២៧ ខែវិច្ឆិកា ។ លុះពេលទៅដល់ត្រង់ចំណុចខាងលើ ក៏ធុំក្លិនស្អុយ ពេលនោះបុរសជាអ្នកដាក់មងបានដើររកមើល ស្រាប់តែប្រទះឃើញគ្រោងឆ្អឹង ស្បែក និងគ្រឿងក្នុងគោមួយក្បាលអណ្ដែតនៅក្នុងទឹកប្រឡាយ ដោយសង្ស័យថា ក្រុមជនសង្ស័យបានកាប់ពន្លះយកសាច់លក់រយៈពេលប្រហែល៥ថ្ងៃមុន ។ បន្ទាប់មក បុរសម្នាក់នោះក៏ត្រឡប់ទៅផ្ទះវិញ និងបានប្រាប់ដល់លោកមេភូមិគោកព្រិច ហើយលោកមេភូមិក៏បានប្រាប់បន្តទៅកាន់លោកមេភូមិត្រពាំងធ្នង់ឲ្យចុះទៅពិនិត្យមើលកន្លែងកើតហេតុជាក់ស្ដែង និងរាយការណ៍បន្តទៅកាន់លោកចៅសង្កាត់តែម្តង។
តាមប្រភពព័ត៌មានបានបន្តឱ្យដឹងថា អស់រយៈពេលប៉ុន្មានថ្ងៃកន្លងមកនេះ មិនមានព័ត៌មានណាមួយអំពីករណីបាត់គោរបស់អ្នកភូមិគោកព្រិច និងភូមិត្រពាំងធ្នង់ ឬអ្នកភូមិក្បែរៗនោះទេ ហើយគ្រោងឆ្អឹង ស្បែក និងគ្រឿងក្នុងគោមួយក្បាលដែលបុរសជាអ្នកដាក់មងប្រទះឃើញខាងលើនោះ តែគេពុំដឹងថាជាគោញី ឬក៏ជាគោឈ្មោលនៅឡើយដែរ ។ ដូច្នេះមិនទាន់ដឹងថាតើគោ១ក្បាលខាងលើនេះត្រូវក្រុមជនសង្ស័យលួចពីទីតាំងណាមួយទៅកាប់ពន្លះយកសាច់នៅទីនោះទេ ។ បើតាមការពិនិត្យមើលស្លាកស្នាម ក្រុមជនសង្ស័យបានពន្លះសាច់គោនៅក្រោមដើមឈើ១ដើមនៅក្បែរនោះ បន្ទាប់មកបានចោលឆ្អឹង ស្បែក និងគ្រឿងក្នុងគោទៅក្នុងទឹកប្រឡាយនោះ រួចទើបយកសាច់គេចខ្លួនបាត់ស្រមោលតែម្ដង៕ (កែសម្រួលដោយ ៖ ធីតា)
ចែករំលែកព័តមាននេះ