កាលពីចុងសប្ដាហ៍កន្លងទៅនេះ សិស្សានុសិស្សនៃវិទ្យាស្ថាន និងសាលារៀនអន្ដរទ្វីបអាមេរិកាំងបានផ្ដួចផ្ដើមគំនិតគ្នារៀបចំបង្កើតកម្មវិធីសម្ដែងទេពកោសល្យមួយដែលមានឈ្មោះថា «ទេពកោសល្យដើម្បីជំនួយឧបត្ថម្ភ» ដែលមានការអញ្ជើញចូលរួមទស្សនាយ៉ាងច្រើនកុះករពីសំណាក់សិស្សានុសិស្ស មាតាបិតា អ្នកអាណាព្យាបាល បុគ្គលិក សាស្ដ្រាចារ្យ ព្រមទាំងភ្ញៀវកិត្ដិយសសរុបជាង២០០០នាក់ ។
យុវសិស្សឡេង បុណ្ណារិទ្ធ ដែលជាប្រធានក្រុមបានឱ្យអ្នកយកព័ត៌មានយើងដឹងថា ដោយមើលឃើញនូវទុក្ខលំបាករបស់ប្រជាជនក្រីក្រនៅតាមទីជនបទដាច់ស្រយាលកំពុងជួបប្រទះនូវការខ្វះខាត ជាពិសេសកុមារកំព្រាដែលកំពុង ត្រូវការអ្នកជួយឧបត្ថម្ភគាំទ្រ និងដោយទទួលបាននូវអនុសាសន៍ណែនាំ និងការលើកទឹកចិត្ដជាប្រាក់ឧបត្ថម្ភដើម្បីធ្វើជាដើមទុនចំនួន១០០០ដុល្លារ ពីសំណាក់លោកឧកញ៉ាវេជ្ជបណ្ឌិត គួច ម៉េងលី ប្រធាននិងចាងហ្វាងនៃវិទ្យាស្ថាន និងសាលារៀនអន្ដរទ្វីបអាមេរិកាំង ទើបក្រុមរបស់ពួកគាត់បានផ្ដួចផ្ដើមគំនិតរៀបចំកម្មវិធីនេះឡើងដើម្បីរៃអង្គាសថវិកា សម្ភារសិក្សា គ្រឿងឧបភោគបរិភោគសម្រាប់ចូលរួមក្នុងមូលនិធិសប្បុរសធម៌ម៉េងលី ជេ. គួច ក្នុងទិសដៅសម្រាប់ឧបត្ថម្ភដល់កុមារកំព្រាវត្ដអារាម ចាស់ជរា និងជនក្រីក្រជាដើម ។
សកម្មភាពរៃអង្គាសថវិកា និងសម្ភារសប្បុរសធម៌នេះ បានធ្វើឡើងអស់រយៈពេលពីរសប្ដាហ៍ដោយពួកគាត់បានបែងចែកគ្នាជាក្រុមដូចជាក្រុមប្រគំតន្ដ្រី និងសម្ដែងទេពកោសល្យក្រុមលក់ផលិតផលសប្បុរសធម៌ក្រុមដើររៃអង្គាសថវិកាតាមបរិវេន សាលានិងថ្នាក់រៀន និងក្រុមស្វែងរកជំនួយឧបត្ថម្ភពីបណ្ដាក្រុមហ៊ុនសាកលវិទ្យាល័យ ធនាគារ និងបណ្ណាគារផ្សេងៗនៅក្នុងរាជធានីភ្នំពេញ ។ រហូតមកដល់ថ្ងៃទី២៥ ខែធ្នូ ឆ្នាំ២០១០ ជាថ្ងៃដែលវិទ្យាស្ថាន និងសាលារៀន អន្ដរទ្វីបអាមេរិកាំង ប្រារឰពិធីអបអរសាទរបុណ្យណូអ៊ែល និងបុណ្យចូលឆ្នាំថ្មី ឆ្នាំសាកល២០១១ ដែលមានការអញ្ជើញចូលរួមពីសិស្សា នុសិស្ស និងភ្ញៀវកិត្ដិយសយ៉ាងច្រើនកុះករនោះ ពួកគេទទួលបាននូវការឧបត្ថម្ភជាថវិកាយ៉ាងច្រើន និងការជួយទិញផលិតផលសប្បុរសធម៌យ៉ាងច្រើនពីសំណាក់អ្នកចូលរួមដែលសកម្មភាពទាំងមូលរកចំណូលបានថវិកាសរុបចំនួនគឺ ៤.២៣៦ដុល្លារ ។
ស្ថិតក្នុងឱកាសនោះ លោកឧកញ៉ាវេជ្ជបណ្ឌិត គួច ម៉េងលី បានសម្ដែងនូវការកោតសរសើរចំពោះសិស្សានុសិស្សវ័យក្មេងទាំងអស់ ដែលបានបញ្ចេញនូវសមត្ថភាពផ្ទាល់ខ្លួនដូចជាការច្រៀងចម្រៀង ការរាំចង្វាក់បុរាណ និងសម័យ ការសម្ដែងសៀករហ័សកម្ម ការសម្ដែងរឿងខ្លី និងការបញ្ចេញនូវសមត្ថភាពនិយាយភាសាអង់គ្លេស របស់ពួកគេបានយ៉ាងប៉ិនប្រសប់ និងគួរជាទីមោទនៈពីសំណាក់ទស្សនិកជនទាំងអស់ដែលបានចូលរួម ។ លោកបានបន្ថែម ឱ្យដឹងថាឆ្លងតាមបទពិសោធន៍នៃការរៀបចំនូវកម្មវិធីនេះសិស្សានុសិស្សទាំងអស់បានទទួលនូវចំណេះដឹងបន្ថែមយ៉ាងច្រើនដោយពួកគេយល់ដឹងអំពីអ្វីដែលហៅថាទំនួលខុសត្រូវក្នុងសង្គម ការចេះចែករំលែក ការជួយគ្នាក្នុងគ្រាក្រ និងម្យ៉ាងវិញទៀត ពួកគេបានចេះច្នៃប្រឌិតនូវគំនិតល្អៗ និងយល់កាន់តែស៊ីជំរៅអំពីតម្លៃនៃការសិក្សា ហើយជៀសផុតឆ្ងាយពីការសេពគ្រឿងញៀន ៕
ចែករំលែកព័តមាននេះ