ហ្វ៊ីលីពីន ៖ ក្រុមគោព្រៃកម្ពុជា ទទួលបានលទ្ធផលស្មើ១-១ជាមួយក្រុមម្ចាស់ផ្ទះហ្វ៊ីលីពីន
ក្នុងឱកាសប្រកួតបើកឆាកថ្ងៃដំបូងនៃកីឡាស៊ីហ្គេមលើកទី៣០ ឆ្នាំ២០១៩ នៅប្រទេសហ្វ៊ីលីពីន ដែលបានប្រព្រឹត្តទៅនៅកីឡដ្ឋាន Rizai Memoriai កាលពីយប់ថ្ងៃចន្ទទី២៥ ខែវិច្ឆិកា ។
សម្រាប់ការប្រកួតនៅក្នុងតង់ទី១ ក្រុមគោ ព្រៃកម្ពុជាពិតជាធ្វើបានល្អមែនទែន ដោយបានដាក់សម្ពាធទៅលើក្រុមជម្រើសជាតិអាយុក្រោម២២ឆ្នាំហ្វ៊ីលីពីនជាប់រហូត តាមរយៈការលេងបាល់ខ្លី ព្រមទាំងមានឱកាសស៊ុតបាល់បញ្ចូលទីជាច្រើនលើកច្រើនសាទៀតផង ប៉ុន្តែពុំមាន ឱកាសបំប៉ោងសំណាញ់ទីក្រុមម្ចាស់ផ្ទះបានសម្រេចឡើយ ។ លុះឈានចូលដល់នាទីទី៤១ទើបកីឡាករខ្សែប្រយុទ្ធឆ្នើមរបស់កម្ពុជា កែវ សុខផេង ស៊ុតបាល់បញ្ចូលទីនាំមុខក្រុមម្ចាស់ផ្ទះបាន១គ្រាប់មុន ។
ចូលដល់តង់ទី២ ក្រុមគោព្រៃកម្ពុជានៅតែរក្សាការលេងបានយ៉ាងល្អ ប៉ុន្តែមិនមានឱកាសលេងវាយសម្រុកទៅលើក្រុមម្ចាស់ផ្ទះទាំងស្រុងបានល្អដូចមុនទៀតឡើយ គឺបានត្រឹមតែ៥០+ ៥០ប៉ុណ្ណោះ ។ ម្យ៉ាងវិញទៀត រាល់ការបណ្ដើរ បាល់ទៅដល់តំបន់គ្រោះថ្នាក់ ត្រូវបានរារាំងដោយខ្សែការពាររបស់ក្រុមអាយុក្រោម២២ឆ្នាំហ្វ៊ីលីនជាប់រហូត ។
ទោះជាយ៉ាងណា ក្រុមគោ ព្រៃកម្ពុជានៅតែព្យាយាមលេងយកអស់ពីសមត្ថភាព បើទោះជាមានកីឡាករមួយចំនួនមានបញ្ហារមួលក្រពើក៏ដោយ ។ ប៉ុន្តែគួឱ្យសោកស្ដាយចូលដល់នាទីទី៩០+៣ក្នុងម៉ោងបន្ថែម ត្រូវក្រុមម្ចាស់ផ្ទះតាមសងបាន១គ្រាប់ស្មើវិញ ។ ចប់ការប្រកួត ក្រុមទាំង២បានត្រឹមចែក១ពិន្ទុម្នាក់ប៉ុណ្ណោះ។
លោក Goram Milojevic គ្រូបង្វឹកហ្វ៊ីលីពីន បានកោតសរសើរកូនក្រុមរបស់លោកដែលសហការគ្នាលេងបានយ៉ាងល្អ ទទួលបានលទ្ធផលជាវិជ្ជមាន ។ មិនតែប៉ុណ្ណោះ លោកគិតថា កូនក្រុមរបស់លោកសឹងតែឈ្នះការប្រកួតទៅហើយ តែទោះជាយ៉ាណាលោកក៏មានការរីក
រាយណាស់ដែរចំពោះលទ្ធផលនេះ ។
លោក Felix G. Delmas គ្របង្វឹកក្រុមគោព្រៃកម្ពុជា ក៏បានលើកឡើងដែរថា ហ្វ៊ីលីពីន មានកីឡាករដែលមានកាយសម្បទាល្អទាំងកម្ពស់ទាំងកម្លាំង ។ ចំណែកយើងក៏មានឱកាសរកបានគ្រាប់បាល់នាំមុខម្ចាស់ផ្ទះមែន តែគួរឱ្យសោកស្ដាយដែលមិនអាចនាំមុខរហូតដល់ចប់។
មិនតែប៉ុណ្ណោះ យើងមានសម្ពាធខ្លាំងពីក្រុមម្ចាស់ផ្ទះនៅតង់ទី២ ដែលពួកគេព្យាយាមលេងសម្រុករហូតដល់តាមរកគ្រាប់បាល់ស្មើ ។ ទោះ ជាយ៉ាងណា យើងនៅតែមានសង្ឃឹមសម្រាប់ការប្រកួតបន្តនាល្ងាចថ្ងៃទី២៧ ខែវិច្ឆិកា ជាមួយក្រុមទីម័រខាងកើត ៕ (កែសម្រួលដោយ ៖ បុប្ផា)
ចែករំលែកព័តមាននេះ