ខេត្តព្រៃវែង ៖ បច្ចុប្បន្ននេះ ប្រជាកសិករនៅខេត្តព្រៃវែងបានចាប់ផ្តើមច្រូតកាត់ប្រមូលផលស្រូវរដូវវស្សាជាបណ្តើរៗហើយ ចំណែកឯតម្លៃស្រូវនៅលើទីផ្សារក៏មានហាងឆេងល្អគួរសមដែរ គឺលក់បានក្នុង១គីឡូក្រាមតម្លៃ៩០០រៀលសំរាប់ស្រូវបាយរឹង និងស្រូវបាយទន់លក់ក្នុង១គីឡូក្រាមតម្លៃ១០០០រៀល ទៅ១២០០រៀល។
ទោះជាបែបនេះក្តី ក៏ប្រជាកសិករនៅតាមបណ្តាស្រុកមួយចំនួន ដូចជានៅស្រុកកញ្ជ្រៀច ស្រុកកំចាយមារ និងស្រុកមេសាងជាដើមបានអះអាងថា ពួកគាត់កំពុងតែជួបបញ្ហានោះគឺស្រូវទុំច្រូតកាត់បានហើយ តែបែរជាគ្មានឈ្មួញចុះមកប្រមូលទិញសោះ ដោយខុសពីឆ្នាំមុនៗ គ្រាន់តែស្រូវទុំភ្លាម គឺមានឈ្មួញចុះមកតថ្លៃសុំទិញដល់ស្រែ និងដល់ផ្ទះតែម្តង។
ផ្ទុយទៅវិញ នៅតាមបន្ទាត់ព្រំដែនមួយចំនួន ដូចជាច្រកកោះសំពៅ ច្រកស្វាយអាង៉ោង និងច្រកបន្ទាយចក្រីជាដើម គេឃើញទូកធំៗរបស់ឈ្មួញវៀតណាមបានមកចតត្រៀបត្រាពេញមាត់ច្រាំង រង់ចាំទទួលទិញស្រូវពីឈ្មួញខ្មែរ ប៉ុន្តែពុំមានស្រូវអោយទិញនោះទេ ពេលមានរថយន្តដឹកស្រូវមកដល់ម្តងៗ ម្ចាស់ទូករត់ប្រជែងដណ្តើមគ្នាទិញ ទូកខ្លះមកចតចាំទិញជាង១អាទិត្យទៅហើយ នៅតែទិញស្រូវមិនបានពេញទូកទៀត។
ដោយឡែកក្រុមឈ្មួញវៀតណាម ដែលមករង់ចាំទិញស្រូវនៅច្រកបន្ទាយចក្រី ក្នុងស្រុកព្រះស្តេច ខេត្តព្រៃវែង បាននិយាយថា ស្រូវដែលពួកគេទទួលទិញមានដូចជាស្រូវប្រឡាផ្តៅ ស្រូវផ្កាក្រសាំង និងស្រូវក្រសាំងទាបជាដើម ដែលស្រូវទាំងនេះជាប្រភេទស្រូវបាយរឹង តម្រូវតាមទីផ្សាររោងម៉ាស៊ីននៅវៀតណាម ដោយសារស្រូវពូជរបៀបនេះ វៀតណាមមិនមានធ្វើទេ។
ឈ្មួញទាំងនោះបានបន្ថែមទៀតថា ពួកគេចង់ទិញស្រូវណាស់ តែអត់មានរថយន្តដឹកស្រូវមកលក់ ទូកខ្លះដេកចាំមួយសប្តាហ៍មកហើយ ទិញស្រូវមិនបានពេញទូកទេ មួយទូកចាប់ពី១០០តោន ដេកចាំ២សប្តាហ៍មកហើយ ទិញស្រូវមិនគ្រប់សោះ ដូចនេះសូមឲ្យឈ្មួញខ្មែរដែលធ្លាប់ដើរទិញស្រូវតាមភូមិ ហើយដឹកយកមកលក់នៅព្រំដែន នាំគ្នាដើរប្រមូលទិញឲ្យបានច្រើន ដើម្បីមានស្រូវមកលក់នៅព្រំដែនឱ្យបានច្រើន ហើយពួកគេឆាប់បានទៅផ្ទះវិញ៕ (កែសម្រួលដោយ ៖ ធីតា)
ចែករំលែកព័តមាននេះ