ខេត្តបន្ទាយមានជ័យ ៖ បន្ទាប់ពីម៉ូតូជាច្រើនគ្រឿងបានបាត់ជាបន្តបន្ទាប់ ដោយសារចោរកាច់សោ.កយកទៅបាត់នាពេលកន្លងមកនោះ ពេលនេះសមត្ថកិច្ចចម្រុះរដ្ឋបាល និងព្រំដែនគោក បានរកឃើញទីតាំងលាក់ទុកមួយកន្លែង ហើយបានរឹបអូសម៉ូតូចម្រុះ8គ្រឿង ក្នុងនោះក៏ឃាត់បានជនសង្ស័យ៣នាក់ផងដែរ យកទៅសួរនាំកាលពីយប់ថ្ងៃទី25…
ខេត្តបន្ទាយមានជ័យ ៖ បន្ទាប់ពីម៉ូតូជាច្រើនគ្រឿងបានបាត់ជាបន្តបន្ទាប់ ដោយសារចោរកាច់សោ.កយកទៅបាត់នាពេលកន្លងមកនោះ ពេលនេះសមត្ថកិច្ចចម្រុះរដ្ឋបាល និងព្រំដែនគោក បានរកឃើញទីតាំងលាក់ទុកមួយកន្លែង ហើយបានរឹបអូសម៉ូតូចម្រុះ8គ្រឿង ក្នុងនោះក៏ឃាត់បានជនសង្ស័យ៣នាក់ផងដែរ យកទៅសួរនាំកាលពីយប់ថ្ងៃទី25 ខែវិច្ឆិកា ឆ្នាំ2019។
ទីតាំងលាក់ទុកម៉ូតូខាងលើនេះ គឺនៅខាងក្រោយផ្ទះមួយកន្លែង ស្ថិតក្នុងភូមិសាមគ្គីមានជ័យ សង្កាត់និងក្រុងប៉ោយប៉ែត។ ហើយក្នុងចំណោមម៉ូតូទាំងនេះ មានទាំងម៉ូតូកង់បី1គ្រឿងទៀតផង។ ចំណែកជនសង្ស័យទាំង3នាក់ខាងលើនេះ រួមមាន 1-ឈ្មោះ រន កក្កដា ភេទប្រុស អាយុ29ឆ្នាំ មានទីលំនៅមិនពិតប្រាកដ 2-ឈ្មោះ ចៅ សុខុម ភេទប្រុស អាយុ29ឆ្នាំ និង3-ឈ្មោះ ចៅ រិទ្ធី ភេទប្រុស អាយុ34ឆ្នាំ។
តាមប្រភពពីនគរបាលការពារព្រំដែនគោកលេខ911 បង្ហើបឲ្យដឹងថា ខណៈកម្លាំងចុះល្បាតការពារសន្តិសុខសណ្តាប់ធ្នាប់ក្នុងភូមិសាស្ត្រ ក៏មានពលរដ្ឋបានរាយការណ៍ថា មានម៉ូតូ1គ្រឿងប្លុងចោលក្នុងព្រៃក្រោយផ្ទះមួយកន្លែង ក្បែរចំណុចហ្គោលដឹនស្ទូចត្រី។ ក្រោយពីទទួលបានព័ត៌មានភ្លាម កម្លាំងសមត្ថកិច្ចក៏បានចុះពិនិត្យឃើញជាក់ស្តែង បន្ទាប់មកក៏ទំនាក់ទំនងសុំកម្លាំងអង្គភាពអធិការដ្ឋាននគរបាលក្រុង ដើម្បីពិនិត្យរួមគ្នា។
ជាក់ស្តែងនៅកន្លែងកើតហេតុ ម៉ូតូរកឃើញមិនមែន1គ្រឿងនោះទេ គឺមានរហូត8គ្រឿងឯណោះ ដែលគេគ្រប និងបិទបាំងដោយស័ង្កសី ហើយពេលនោះសមត្ថកិច្ចក៏បានរឹបអូសយកទៅរក្សាទុកនៅអធិការដ្ឋាននគរបាលក្រុង ដើម្បីប្រកាសរកម្ចាស់តែម្តង។
ទោះជាយ៉ាងណា ម៉ូតូទាំង8គ្រឿងនេះ សមត្ថកិច្ចមិនទាន់ប្រាប់ថា មានម៉ាកអ្វីខ្លះនៅឡើយនោះទេ។ ហើយទាក់ទិននឹងករណីនេះ លោកវរសេនីយ៍ ព្រំ ពិសិដ្ឋ អធិការរងទទួលផែនព្រហ្មទណ្ឌនៃអធិការដ្ឋាននគរបាលក្រុងប៉ោយប៉ែត បានប្រាប់តាមទូរស័ព្ទថា ករណីខាងលើនេះ ពិតជាកើតមានមែន ប៉ុន្តែពេលនេះទាំងវត្ថុតាង ទាំងជនសង្ស័យ កំពុងសាកសួរនៅប៉ុស្តិ៍រដ្ឋបាលសង្កាត់ប៉ោយប៉ែតនៅឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ