រាជធានីភ្នំពេញ ៖ ក្នុងមួយរយៈពេលចុងក្រោយនេះ កម្ពុជាហាក់ដូចជាមានទំនោរខ្លាំងទៅរកប្រទេសចិនទាំងទំនាក់ទំនងនយោបាយ និង ពាណិជ្ជកម្ម រហូតប្រមុខដឹកនាំនៃប្រទេសទាំងពីរបានអះអាងថាកម្ពុជា-ចិនបានឈានដល់កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ ។
ជាក់ស្ដែងកម្ពុជាបានទាញយកវិនិយោគិននិងទេសចរបានកាន់តែច្រើន ដែលធ្វើអោយចិនជាប់លេខ១ជាអ្នកវិនិយោគនិងទេសចរនៅកម្ពុជា ។ ថ្មីៗនេះដែរ កម្ពុជាក៏គ្រោងនឹងបើកកិច្ចចរចារមួយទៀតជាមួយចិន ស្ដីពីកិច្ចព្រមព្រៀងពាណិជ្ជកម្មសេរី ដែលអាចឲ្យទំនិញនៃប្រទេសទាំងពីរចូលទៅកាន់ទីផ្សារដោយសេរី តាមលក្ខខ័ណ្ឌដែលជជែកគ្នាខណៈអាមេរិកជាអ្នកបញ្ជាទិញធំជាងគេរបស់កម្ពុជាក្នុងពេលបច្ចុប្បន្ននេះ ។
បើតាមលោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មកម្ពុជា បានមានប្រសាសន៍ថា កម្ពុជាមិនមានការភ័យព្រួយចំពោះការបាត់បង់ការបញ្ជាទិញពីសហរដ្ឋអាមេរិកនោះទេ បើសិនជាកម្ពុជាសម្រេចនូវការចរចារកិច្ចព្រមព្រៀងពាណិជ្ជកម្មជាមួយចិន បើទោះបីប្រទេសមហាអំណាចទាំងពីរ កំពុងមានទំនាស់ពាណិជ្ជកម្មជាមួយគ្នាក៏ដោយ ។ លោកបានពោលបញ្ជាក់ថា «បើតាមការសង្កេតរបស់យើងនៅពេលនេះ ទំនាស់ពាណិជ្ជកម្មមរវាងចិននិងអាមេរិក កំពុងមានសភាពធូរស្រាលបន្តិចម្ដងៗឡើងវិញហើយ ដោយសារតែប្រទេសនេះត្រូវមានទំនាក់ទំនងជាមួយគ្នាក្នុងការធ្វើពាណិជ្ជកម្ម ដូច្នេះហើយនៅពេលខាងមុខនេះ ប្រទេសទាំងពីរអាចនឹងត្រូវរ៉ូវគ្នាវិញ ហើយបង្កើនការធ្វើពាណិជ្ជកម្មកាន់តែខ្លាំង» ។
លោកបានបន្តថា សង្គ្រាមពាណិជ្ជកម្មរវាងចិននិងអាមេរិក នាពេលបច្ចុប្បន្ននេះ មិនមែនដល់កម្រិតមួយដែលមិនអាចផ្សះផ្សាគ្នាបាននោះទេ ។ ជាទស្សនរបស់មជ្ឈដ្ឋានពាណិជ្ជកម្ម ក្រលេកឃើញថា អាមេរិកត្រូវការចិន ហើយចិនក៏ត្រូវការអាមេរិកដូចគ្នា ដូច្នេះបានជាមានការចរចារទៅវិញទៅមកជាច្រើនលើក ។ បើសិនជាម្នាក់ៗ ក្រវាត់ដៃមិនជជែកជាមួយគ្នា ពេលនោះទើបអាចនិយាយថាសង្គ្រាមនោះដល់កម្រិតមួយដែលមិនអាចផ្សះផ្សាបាន ។ សម្រាប់អ្នករងផលប៉ះពាល់ជាប្រទេសទី៣ តែសម្រាប់កម្ពុជាវិញ គេមើលឃើញថាមិនមានផលប៉ះពាល់អ្វីជាធំដុំនោះទេ ។
លោកបានបន្ថែមថា សម្រាប់ការនាំចេញពីកម្ពុជាទៅកាន់សហរដ្ឋអាមេរិក គឺស្ថិតនៅក្រោមបន្ទាត់បង់ពន្ធពេញលេញលើកលែងតែសម្ភារៈធ្វើដំណើរនោះទេ ដែលអាមេរិកលើកលែងការបង់ពន្ធ ក្រោមកម្មវិធី GSP ក្រៅពីនោះកម្ពុជាត្រូវបង់ពន្ធទាំងអស់ ។ ដូច្នេះ កិច្ចព្រមព្រៀងសេរីកម្ពុជា ចិនដូចជាមិនប៉ះពាល់អ្វីដល់ទំនាក់ទំនងអាមេរិក និងកម្ពុជាឡើយ ។
លោក ប៉ែន សុវិជាតិ បានបន្ថែមថា «ទីផ្សារនៅតែបើកចំហរចាំយើងជានិច្ចទាំងទីផ្សារអឺរ៉ុបនិងអាមេរិក គ្រាន់តែថាពីមុនយើងនាំចេញទៅទីផ្សារនោះអត់បង់ពន្ធ និងមកត្រូវបង់ពន្ធវិញប៉ុណ្ណោះ ក៏ប៉ុន្តែបើសិនជាយើងបន្ទាបថ្លៃដើមទំនិញរបស់យើង នោះអ្នកវិនិយោគនៅតែពេញចិត្តមកវិនិយោគនៅកម្ពុជាហើយនាំចេញទៅកាន់ទីផ្សារអឺរ៉ុប អាមេរិកដដែលនិងអាចរកប្រាក់ចំណេញសម្រាប់ពួកគេបានដដែលផងដែរ » ។
លោកក៏បានបញ្ជាក់ថា បច្ចុប្បន្នរាជរដ្ឋាភិបាលកម្ពុជាបានធ្វើរួចមកហើយនូវការកាត់បន្ថយការចំណាយរបស់អ្នកផលិតនៅកម្ពុជា ដូចជា ការកែសម្រួលកាតព្វកិច្ច ភារកិច្ចរបស់មន្ត្រីកាំកុងត្រូល ការដកចេញនូវប៉ុស្តិ៍ត្រួតពិនិត្យមួយចំនួន ការធ្វើកិច្ចសម្រួលពាណិជ្ជកម្មផ្សេង ដែលទាំងនេះនឹងជំរុញអោយការនាំចេញបានច្រើនជាងមុន ។
យោងតាមរបាយការណ៍របស់អាជ្ញាធរកម្ពុជាបានបង្ហាញផងដែរពីទំនាក់ទំនងពាណិជ្ជកម្មរវាងកម្ពុជា អាមេរិក និងកម្ពុជាចិន ។ ក្នុងឆ្នាំ ២០១៨ កន្លងទៅពាណិជ្ជកម្មទ្វេភាគីរវាងកម្ពុជា ចិន មានទំហំទឹកប្រាក់ប្រមាណ ៦៤០០លានដុល្លារអាមេរិក ក្នុងនោះ ចិននាំមកកម្ពុជាមានទឹកប្រាក់ជាង៥០០០លានដុល្លារអាមេរិក ហើយកម្ពុជានាំទៅចិនវិញ មានទឹកប្រាក់តែប្រមាណជាង១ពាន់លានដុល្លារអាមេរិកប៉ុណ្ណោះ ។ ដោយឡែកទំហំពាណិជ្ជកម្មរវាងកម្ពុជានិងអាមេរិក ក្នុងឆ្នាំ២០១៨ដូចគ្នា មានទំហំទឹកប្រាក់តែប្រមាណ ៣,៣២ពាន់លានដុល្លារអាមេរិកប៉ុណ្ណោះ ក៏ប៉ុន្តែកម្ពុជានាំចេញទៅអាមេរិកមានទឹកប្រាក់រហូតដល់ ៣,០៤ពាន់លានដុល្លារអាមេរិក។
ក្នុងនោះផងដែរ ឆ្នាំ ២០១៩ រយៈពេល៩ខែ ទំហំពាណិជ្ជកម្មកម្ពុជាអាមេរិក មាន៣,៥២ពាន់លានដុល្លារអាមេរិកកើនឡើង៥,៩១ភាគរយ ដែលការនាំចេញទំនិញទៅកាន់សហរដ្ឋអាមេរិកមានចំណែកដល់២៩ភាគរយនៃការនាំចេញសរុប ដែលធ្វើអោយអាមេរិកក្លាយជាទី១នៃការនាំចេញសរុបរបស់កម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ