រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីព្រឹកថ្ងៃទី៧ វិច្ឆិកា បានបញ្ជូនខ្លួនមនុស្សចំនួន១០នាក់ ទៅកាន់សាលាដំបូងរាជធានីភ្នំពេញ ពាក់ព័ន្ធអំពើរួមគំនិតក្បត់ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ដើម្បីឱ្យតំណាងអយ្យការធ្វើការសាកសួរ នឹងចោទប្រកាន់ជាផ្លូវការ នឹងចាត់បញ្ជូនទៅខាងចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
មនុស្ស១០នាក់នោះ ជាសកម្មជនអតីតៈគណប្សសង្គ្រោះជាតិ មាន១-ឈ្មោះ ជួន សុផល ភេទប្រុស អាយុ៦៧ឆ្នាំ ២-ឈ្មោះ ង៉ុក សំអូន ភេទប្រុស អាយុ៦១ឆ្នាំ ៣-ឈ្មោះ ហុក សំអាង ភេទប្រុស អាយុ៦០ឆ្នាំ ៤-ឈ្មោះ ថត ប៊ុនធឿន ហៅស្រ៊ុន ភេទប្រុស អាយុ៧០ឆ្នាំ ៥-ឈ្មោះ ស្រង់ ឡាយ ភេទប្រុស អាយុ៥១ឆ្នាំ ៦-ឈ្មោះ ពូក ចន្ទា ភេទប្រុស អាយុ៤៨ឆ្នាំ ៧-ឈ្មោះ ប៊ុន គឹមស៊ា ភេទប្រុស អាយុ៤៤ឆ្នាំ ៨-ឈ្មោះ សូ តារា ភេទប្រុស អាយុ៥០ឆ្នាំ ៩-ឈ្មោះ ទឹម សុមេធ ភេទប្រុស អាយុ៤៩ឆ្នាំ និង១០-ឈ្មោះ ស៊ី រ៉ាដា ភេទប្រុស អាយុ៤៥ឆ្នាំ ។
គួរបញ្ជាក់ថា មនុស្សចំនួន១០នាក់ នោះ ត្រូវបានកម្លាំងអាជ្ញាធរចម្រុះខណ្ឌមានជ័យ មាននគរបាល កម្លាំងកងរាជអាវុធហត្ថ និងកម្លាំងប្រជាការពារជាង១០០នាក់ ដឹកនាំដោយលោក ពេជ្រ កែវមុនី អភិបាលខណ្ឌមានជ័យ បានធ្វើការឃាត់ខ្លួន ។ ដែលការឃាត់ខ្លួននោះបានធ្វើឡើងក្នុងរង្វង់ចុះប្រតិបត្តិការត្រួតពិនិត្យរដ្ឋបាល នៅក្នុងផ្ទះលេខ៥៧៦ អតីតទីស្នាក់ការគណបក្សសង្គ្រេាះជាតិ ស្ថិតតាមបណ្តោយផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ កាលពីវេលាម៉ោង៣ រសៀលថ្ងៃទី៥ ខែវិច្ឆិកា ឆ្នាំ២០១៩ នេះ ។
ក្រោយពីឃាត់ខ្លួនមនុស្សទាំង១០ នាក់ ត្រូវបានបញ្ចូនទៅកាន់អធិការដ្ឋាននគរបាលខណ្ឌមានជ័យ ដើម្បីសាកសួរបឋម ដែលពួកគេត្រូវសមត្តកិច្ចចម្រុះ ប្រើខ្សែចងដៃទៅមុខរួចនាំឡើងរថយន្ត ។ ក្នុងនោះ អាជ្ញាធរសម្រេចដកហូតនូវសម្ភារៈជាដូចជា តុ ទូ កៅអី ម៉ាស៊ីនកំព្យូទ័រច្រើនគ្រឿង ម៉ូតូ៨គ្រឿង និងរថយន្ត១គ្រឿងផងដែរ ហើយមនុស្ស នឹងសម្ភារៈត្រូវបានបញ្ជូនបន្តទៅកាន់ស្នងការដ្ឋាននគរបាលរាជធានីភ្នំពេញ ។
ក្រោមការស៊ើបសួរដោយយកចិត្តទុកដាក់ពីសំណាក់កម្លាំងសមត្តកិច្ចជំនាញ មនុស្សទាំង១០ និងសម្ភារៈដូចបានរៀបរាប់ខាងលើ គឺពួកគេបានប្រមូលផ្តុំគ្នាជាប់ពាក់ក្នុងអំពើ.រួមគំនិតក្បត់ នឹងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលមានទណ្ឌិត សម រង្ស៊ី នៅពីក្រោយ ដូច្នោះទើបត្រូវសមត្តកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធីនោះ ៕
ចែករំលែកព័តមាននេះ