អាជ្ញាធរកំពុងរឹងបន្តឹងច្រកព្រំដែនថៃ ខេត្តប៉ៃលិន ចាំចាប់ក្រុមសមរង្ស៊ី (វីដេអូ)
- ប៉ៃលិន
ខេត្តប៉ៃលិន ៖ ដោយសារតែថ្ងៃសន្យារបស់លោក សម រង្ស៊ី មេបក្សប្រឆាំងថា នឹងចូលមកកាន់ប្រទេសកម្ពុជាវិញ នៅថ្ងៃទី០៩ ខែវិច្ឆិកា ២០១៩នេះ…
ខេត្តប៉ៃលិន ៖ ដោយសារតែថ្ងៃសន្យារបស់លោក សម រង្ស៊ី មេបក្សប្រឆាំងថា នឹងចូលមកកាន់ប្រទេសកម្ពុជាវិញ នៅថ្ងៃទី០៩ ខែវិច្ឆិកា ២០១៩នេះ ដើម្បីដឹកនាំធ្វើរដ្ឋប្រហារ កាន់តែកៀកឈានចូលមកដល់ ទើបកាលពីព្រឹកថ្ងៃទី០៥ ខែវិច្ឆិកានេះ អាជ្ញាធរខេត្តបានដឹកនាំកងកម្លាំងប្រដាប់អាវុធទាំង៣ប្រភេទ ដោយចុះល្បាត និងត្រួតពិនិត្យនៅតាមបន្ទាត់ព្រំដែនកម្ពុជា-ថៃ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា កាលពីព្រឹកថ្ងៃទី០៥ វិច្ឆិកា អាជ្ញាធរខេត្ត ដឹកនាំដោយលោក ផាន់ ចាន់ធុល អភិបាលខេត្តប៉ៃលិន បានចុះទៅត្រួតពិនិត្យនៅតាមបន្ទាត់ព្រំដែន ព្រោះថ្ងៃដែលលោក សម រង្ស៊ី មេបក្សប្រឆាំង ដែលកំពុងតែស្រែកនៅក្រៅប្រទេសថា នឹងត្រឡប់មកប្រទេសកម្ពុជាវិញ នាប៉ុន្មានថ្ងៃខាងមុខនេះ ។
ប្រភពបន្តទៀតថា ហេតុដូច្នេះហើយ ទើបកងកម្លាំងសមត្ថកិច្ចទាំង៣ប្រភេទរួមមាន កម្លាំងកងរាជអាវុធហត្ថ កម្លាំងយោធា និងកម្លាំងនគរបាលជាតិ បាននាំគ្នាយាមកាមយ៉ាងតឹងរឹង ដោយមិនអនុញ្ញាតិឱ្យក្រុមប្រឆាំងណាម្នាក់ចូលមករាតត្បាតក្នុងប្រទេសកម្ពុជា តាមទឹកដីខេត្តប៉ៃលិនបានឡើយ ។
បើតាមមន្ត្រីកងរាជអាវុធហត្ថម្នាក់ បានឱ្យដឹងថា កម្លាំងចម្រុះរបស់លោក បាននាំគ្នាចុះទៅយាមនៅព្រំដែនកម្ពុជា-ថៃ ក្នុងភូមិផ្សារព្រំ អស់រយ:ពេល៣-៤ថ្ងៃមកហើយ ដើម្បីទប់ស្កាត់មិនឱ្យក្រុមបក្សប្រឆាំងចូលមកក្នុងទឹកដីប្រទេសកម្ពុជា បានជាដាច់ខាត ។ ចំពោះការដកកម្លាំងវិញត្រូវទទួលបញ្ជាពីថ្នាក់លើ ទើបអាចដកថយត្រឡប់ក្រោយវិញបាន បើពុំដូច្នោះទេ គឺនៅតែបន្តដាក់វេនគ្នាចាំយាមរាល់ថ្ងៃតែម្តង ។
ពាក់ព័ន្ធនឹងបញ្ហានេះ លោក សុខ សាវុធ ប្រធានការិយាល័យច្រកចេញ-ចូលតែមួយ បានឱ្យដឹងថា រហូតមកដល់រសៀលថ្ងៃទី០៥ ខែវិច្ឆិកានេះ នៅច្រកទ្វារអន្តរជាតិព្រំ គឺមានសភាពស្ងប់ស្ងាត់ធម្មតា ដោយគ្មានអ្វីប្រែប្រួលនោះទេ ។
លោកបន្តទៀតថា តែប្រជាពលរដ្ឋរស់នៅក្នុងភូមិខាងលើ នាំគ្នារកស៊ីទទួលទានតាមធម្មតា ដោយគ្មានភាពច្របូកច្របល់ ឬវឹកវរណាមួយកើតឡើងនោះឡើយ ពោលគឺសុវត្ថិភាពក្នុងការធ្វើដំណើរ និងការប្រកបរបររកស៊ីទាំងការលក់ដូរនៅក្នុងស្រុក និងការឆ្លងដែនចេញ-ចូលទៅមកផងដែរ ។ (កែសម្រួលដោយ ៖ បុប្ផា)
ចែករំលែកព័តមាននេះ