ខេត្តកំពង់ឆ្នាំង ៖ លោកវេជ្ជបណ្ឌិត គង់ ច័ន្ទធា ប្រធានការិយាល័យបច្ចេកទេសនៃមន្ទីរសុខាភិបាលខេត្ត និងជាគ្រូពេទ្យព្យាបាលជំងឺផ្លូវចិត្តមន្ទីរពេទ្យខេត្ត កាលពីព្រឹកថ្ងៃទី៥ វិច្ឆិកា បាននាំយកថវិកាចំនួន២៧ម៉ឺនរៀល ដែលជាអំណោយសប្បុរសជនជាក្រុមគ្រួសាររបស់លោក ទៅផ្តល់ជូនលោកប៉ុន ធឿន អតីតគ្រូបង្រៀនដែលបានរងគ្រោះដោយដងពូថៅបុកត្រូវពោះបណ្តាលឱ្យដាច់ពោះវៀន ហើយត្រូវបានវះកាត់ និងកំពុងសំរាកព្យាបាលនៅក្នុងមន្ទីរពេទ្យខេត្ត។
លោកវេជ្ជបណ្ឌិតរូបនោះមានប្រសាសន៍ថា ក្រោយពីបានអានសារព័ត៌មានកោះសន្តិភាពដែលបានចេញផ្សាយថ្ងៃទី៥ វិច្ឆិកា ស្តីពីអតីតគ្រូបង្រៀនដែលបានចូលនិវត្តន៍បានរងគ្រោះដាច់ពោះវៀនត្រូវបានធ្វើការវះកាត់ និងកំពុងទទួលការសង្គ្រោះនៅក្នុងមន្ទីរពេទ្យ និងមានការខ្វះខាតក្នុងជីវភាពផងនោះ ក្រុមគ្រួសាររបស់លោកមានក្តីអាណិតអាសូរយ៉ាងខ្លាំង ហើយដោយទឹកចិត្តសប្បុរសក៏បានមូលមតិគ្នាប្រមូលបានថវិកាចំនួន២៧ម៉ឺនរៀល តាមរយៈលោកយកមកប្រគល់ជូននៅពេលនេះ ដែលក្នុងនោះអ្នកស្រីសឿន សាវី បុគ្គលិកមជ្ឈមណ្ឌលជាតិគាំពារមាតា និងទារកទឹកប្រាក់២០ម៉ឺនរៀល កញ្ញាងិន កេតពិសី ទឹកប្រាក់៥ម៉ឺនរៀល និងលោកជា ទីន ទឹកប្រាក់២ម៉ឺនរៀល ទាំងពីរនាក់ជាបុគ្គលិករោងចក្រ មិថុនា។ ដោយឡែកលោកអ៊ុក សំអាត និងអ្នកស្រីចេក សារ៉ាន់ រស់នៅក្រុងភ្នំពេញ បានជួយឧបត្ថម្ភចំនួន៥ម៉ឺនរៀល ផងដែរ សរុបជាប្រាក់អំណោយចំនួន៣២ម៉ឺនរៀល ត្រូវបានប្រគល់ជូនអតីតគ្រូបង្រៀនរូបនោះដល់ក្នុងមន្ទីរពេទ្យ។
ក្រោយពីបានទទួលនូវអំណោយដ៏ថ្លៃថ្លារបស់សប្បុរសជនតាមរយៈលោកវេជ្ជបណ្ឌិតក្នុងថ្ងៃនោះ លោកប៉ុន ធឿន និងភរិយាមានចិត្តរីករាយឥតឧបមា រកអ្វីមកប្រៀមផ្ទឹមមិនបានឡើយ ហើយបានប្រឹងលើកដៃសំពះថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ និងបានប្រសិទ្ធពរដោយសម្លេងអួលដើម.ក សូមឱ្យសប្បុរសជនទាំងអស់ និងក្រុមគ្រួសារជួបតែពុទ្ធ ពរទាំង៤ប្រការ គឺអាយុៈ វណ្ណៈ សុខៈ ពលៈ កុំបីឃ្លៀងឃ្លាតឡើយ។ គួរបញ្ជាក់ថា លោកប៉ុន ធឿន អតីតគ្រូបង្រៀនត្រូវបានវះកាត់តពោះវៀនកាលពីថ្ងៃទី១ វិច្ឆិកា ក្រោយពីត្រូវដងពូថៅបុកចំពោះបណ្តាលឱ្យដាក់ពោះវៀន ខណៈដែលគាត់ព្យាយាមពុះអុសហើយរបូតផ្លែពូថៅ។ សំរាប់ទីចាត់ការកោះសន្តិភាពក៏បានទទួលប្រាក់អំណោយត្រឹមថ្ងៃទី៥ វិច្ឆិកា ចំនួន២៥ម៉ឺនរៀល ដែលនឹងត្រូវបញ្ជូនទៅប្រគល់ឱ្យជាបន្តបន្ទាប់ទៀត។ សូមថ្លែងអំណរគុណចំពោះសប្បុរសជនទាំងអស់ដែលបានបរិច្ចាគជួយដល់ជនរួមជាតិដែលមានជីវភាពក្រីក្រលំបាក៕
ចែករំលែកព័តមាននេះ