រាជធានីភ្នំពេញ ៖ ក្រសួងសុខាភិបាលបានអះអាងថា ក្រសួងបានត្រៀមគ្រូពេទ្យចំនួន១០៦៥នាក់ដាក់ប៉ុស្តិ៍សុខភាពចំនួន១២គោលដៅ និងពង្រាយរថយន្តសង្គ្រោះចំនួន៦៥ គ្រឿង ដើម្បីត្រៀមផ្តល់សេវាសុខាភិបាលជូនប្រជាជនក្នុងព្រះរាជពិធីបុណ្យអុំទូកនៅរាជធានីភ្នំពេញ ។
លោក វេជ្ជបណ្ឌឹត ងី មានហេង ប្រធានមន្ទីរសុខាភិបាលរាជធានីភ្នំពេញបានឲ្យកោះសន្តិភាពដឹងថា សម្រាប់ព្រះរាជពិធីបុណ្យអុំទូកបណ្តែតប្រទីប អកអំបុក និងសំពះព្រះខែឆ្នាំនេះដោយមានការណែនាំពីក្រសួងសុខាភិបាល និងអភិបាលរាជធានីភ្នំពេញមន្ទីរសុខាភិបាលរាជធានីភ្នំពេញបានត្រៀមធ្វើការពង្រាយគោលដៅទីតាំងសេវាសុខាភិបាល (ស្តង់សុខាភិបាល) ដែលមានក្រុមគ្រូពេទ្យរង់ចាំជួយសង្គ្រោះប្រជាពលរដ្ឋមានចំនួន៧៣០នាក់ គឺស្តង់របស់មន្ទីរសុខាភិបាលចំនួន៨ មានរថយន្តសង្គ្រោះបន្ទាន់ចំនួន១៣គ្រឿង ក្នុងនោះ ក្រុមគ្រូពេទ្យចល័ត ដើម្បីអប់រំផ្សព្វផ្សាយអនាម័យចំណីអាហារ និងផ្សព្វផ្សាយទប់ស្កាត់ ជំងឺអេដស៍ ជាដើម ។
លោកបន្តថា ក្នុងរយៈពេលនៃព្រះរាជពិធីបុណ្យអុំទូកនោះក្រុមគ្រូពេទ្យត្រូវបានបែងចែកកំម្លាំងប្រចាំការ២៤ម៉ោងលើ២៤ម៉ោង ក្នុងនោះមានទាំងក្រុមប្រចាំការនៅស្តង់សុខាភិបាល និងក្រុមចល័តផងដែរ ដើម្បីត្រៀមជួយសង្គ្រោះប្រជាពលរដ្ឋដែលមានជំងឺផ្សេងៗជាពិសេសមានអាការៈឈឺក្បាល វិលមុខ និងរងរបួសជាដើម ។
គួររំលឹកថា ព្រះរាជពិធីបុណ្យអុំទូក កាលពីឆ្នាំ២០១៨ កន្លងមកក្នុងរយៈពេល៣ថ្ងៃ មហាជនដែលបានចូលរួម ហើយមានអាការៈឈឺក្បាល វិលមុខ និងរងរបួសផ្សេងៗដែលបានចូលទៅពិនិត្យ និងទទួលសេវាព្យាបាលនៅតាមស្តង់សុខាភិបាលរាប់ពាន់នាក់ ប៉ុន្តែមិនមានភាពធ្ងន់ធ្ងរនោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ