ខេត្តកំពង់ចាម ៖ អំបុកស្រូវថ្មីប្រភេទរំដួលកំពុងតែត្រូវប៉ាន់នៅលើទីផ្សារ ហើយថែមទាំងមានរសជាតិឆ្ងាញ់ ក្នុងនោះមាននៅឃុំជ្រៃវៀន និងឃុំបារាយណ៍ ស្រុកព្រៃឈរ មានកន្លែងធ្វើអំបុកសម្រាប់លក់ ដោយធ្វើពីដៃខ្លះ និងធ្វើពីម៉ាស៊ីនកែច្នៃខ្លះ…
ខេត្តកំពង់ចាម ៖ អំបុកស្រូវថ្មីប្រភេទរំដួលកំពុងតែត្រូវប៉ាន់នៅលើទីផ្សារ ហើយថែមទាំងមានរសជាតិឆ្ងាញ់ ក្នុងនោះមាននៅឃុំជ្រៃវៀន និងឃុំបារាយណ៍ ស្រុកព្រៃឈរ មានកន្លែងធ្វើអំបុកសម្រាប់លក់ ដោយធ្វើពីដៃខ្លះ និងធ្វើពីម៉ាស៊ីនកែច្នៃខ្លះ កំពុងតែញាប់ដៃញាប់ជើង ហើយការធ្វើអំបុកនេះមិនបានឈប់សម្រាកនោះទេដោយសារមានការកុំម្មង់ទិញពីប្រជាពលរដ្ឋ និងអ្នកនៅតំបន់ខាងក្រៅជាច្រើនទៀតផងដែរ។
អ្នកស្រីបាន អូន អាយុ៥៨ឆ្នាំ រស់នៅភូមិដូនដីឃុំជ្រៃវៀន បានប្រាប់ឲ្យដឹងនៅព្រឹកថ្ងៃទី៥ វិច្ឆិកា ឆ្នាំ២០១៩ ថា គាត់បានមកជួយរែងអំបុកដោយដៃឱ្យដន្លងស្រីរបស់គាត់ម្នាក់ឈ្មោះហៀង បើគិតពីរយៈពេលធ្វើមកដល់សព្វថ្ងៃនេះមានរយៈពេល៣ឆ្នាំហើយ។
អ្នកស្រីបានបន្តថា ចំពោះស្រូវរំដួលត្រូវបានប្រមូលទិញមកពីឡែង ដោយទិញម្ដងប្រមាណ១តោន ក្នុងគ្រាដំបូងពេលដែលធ្វើអំបុកគឺប្រើឧបករណ៍ធ្វើដោយដៃផ្ទាល់ក្នុងមួយថ្ងៃអស់ស្រូវប្រមាណជា៥០គីឡូក្រាម លក់១កំប៉ុងតម្លៃ១៥០០រៀល ហើយក្រោយមក ដន្លងស្រីរបស់គាត់បានកែច្នៃម៉ាស៊ីនដើម្បីធ្វើអំបុក ឃើញថាការផលិត អំបុកមានការកើនឡើងច្រើនដង។
អ្នកស្រីយិន ហៀង អាយុ៥៨ឆ្នាំ ជាអ្នកធ្វើអំបុកដោយប្រើម៉ាស៊ីនកែច្នៃបានប្រាប់ថា ក្នុងពេលដែលគាត់បានចាប់ផ្ដើមធ្វើអំបុកស្រូវរំដួលដោយប្រើកម្លាំងមនុស្សសុទ្ធសាធគឺមានការលំបាកច្រើន ។ ប៉ុន្តែក្នុងរយៈពេល២ឆ្នាំចុងក្រោយនេះ គាត់ក៏បានកែច្នៃម៉ាស៊ីនធ្វើអំបុក ឃើញថាក្នុងមួយថ្ងៃអាចធ្វើអំបុកអស់ស្រូវទម្ងន់ប្រមាណ១៥០គីឡូក្រាម ហើយចេញជាអំបុកបានប្រមាណជាង៦០គីឡូក្រាម។
អ្នកស្រីបានបន្តថា ដោយឡែកនៅថ្ងៃទី៩ វិច្ឆិកា ខាងមុខនេះ ក៏មានការកុំម្មង់ទិញអំបុកស្រូវថ្មីរហូតដល់៣០០គីឡូក្រាម គាត់មិនមានការលំបាកធ្វើនោះទេគឺគាត់អាចធ្វើឱ្យគេទាន់សម្រាប់យកទៅពិសារក្នុងកម្មវិធី ។ ការធ្វើអំបុកត្រូវងើបឡើងធ្វើពីព្រឹករហូតដល់ល្ងាចគឺឈប់សម្រាក។
អ្នកស្ត្រីឈ្មោះអ៊ន់ ស្រី អាយុ៥០ឆ្នាំ អ្នកធ្វើអំបុកដោយដៃនៅភូមិត្រពាំងបេង ឃុំបារាយណ៍ ស្រុកព្រៃឈរ បានប្រាប់ថា គាត់បានចាប់ផ្ដើមធ្វើអំបុកដោយមានខ្ទះចំនួន២ រួមជាមួយប្ដីនិងកូនប្រុសម្នាក់ ដោយបាននាំគ្នាធ្វើអំបុកស្រូវថ្មីប្រភេទរំដួលតាំងតែពីព្រឹករហូតដល់ពេលល្ងាចទើបនាំគ្នាឈប់សម្រាក។ ក្នុងមួយថ្ងៃគាត់អាចធ្វើអស់ស្រូវប្រមាណ៥០ទៅ៦០គីឡូក្រាម ពេលដែលចេញជាអំបុកបានជាង១០០កំប៉ុង ដោយលក់បានក្នុងមួយកំប៉ុងតម្លៃ១៥០០រៀល។
អ្នកស្រីបន្តថា អំបុកដែលគាត់ធ្វើបានមិនដែលសល់នោះទេ ដោយអ្នកភូមិផងរបងជាមួយមកទិញយកទៅហូបអស់ៗ ។ ដោយឡែកសម្រាប់ថ្ងៃទី៩ វិច្ឆិកា ឆ្នាំ២០១៩ ខាងមុខនេះអ្នកភូមិបានមកកុំម្មង់ទិញក្នុងមួយគ្រួសារៗចំនួន១០កំប៉ុង ដែលអាចរកប្រាក់ចំណូលបានក្នុងមួយថ្ងៃជាង១០ម៉ឺនរៀលសម្រាប់ដោះស្រាយជីវភាពគ្រួសារ។
អ្នកស្រីបន្តថា គាត់ក៏មានគំនិតចង់បង្កើតម៉ាស៊ីនកែច្នៃធ្វើអំបុកដូចនៅកន្លែងផ្សេងទៀតក្នុងស្រុកព្រៃឈរដែរ ប៉ុន្តែដោយសារខ្វះខាតថវិកា ទើបចេះតែនាំគ្នាធ្វើអំបុកដោយដៃផ្ទាល់ ។
លោកអ៊ុន ចាន់ដា អភិបាលខេត្តកំពង់ចាមបានមានប្រសាសន៍ឱ្យដឹងនៅរសៀលថ្ងៃទី៥ វិច្ឆិកា ឆ្នាំ២០១៩ នេះថា តាមការអំពាវនាវរបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋបាលខេត្តបានរៀបចំពិធីពិសាអំបុកសាមគ្គីដោយធ្វើឡើងនៅសួនច្បារមុខសាលាខេត្ត រួមជាមួយនឹងសាលាក្រុងកំពង់ចាម ហើយក្រៅពីនេះរដ្ឋបាលស្រុកចំនួន៩ទៀតត្រូវបានរៀបចំឡើងធ្វើនៅតាមទីសាធារណៈនិងតាមសាលាស្រុកនីមួយៗ ទីវត្តអារាម និងសាលាឃុំ ដោយមានភាពអធឹកអធ័មនិងសប្បាយរីករាយ៕ (កែសម្រួលដោយ ៖ ធីតា)
ចែករំលែកព័តមាននេះ