រាជធានីភ្នំពេញ ៖ កូនប្រសាស្រីទើបរៀបការថ្មីថ្មោង ដែលបានបាត់ខ្លួនកាលពីប៉ុន្មានថ្ងៃមុននេះ ហើយត្រូវបានក្រុមគ្រួសារ ជាពិសេសឪពុកក្មេកមានការព្រួយបារម្ភ និងកាន់រូបថតនាងតាមរកគ្រប់ច្រកល្ហកនោះ ពេលនេះបានទទួលដំណឹងហើយគឺនាងបានវេចបង្វេចរត់ទៅតាមប្រុសថ្មីបាត់ ដោយមិនអាឡោះអាល័យឡើយ។ នេះបើតាមការអោយដឹងពីឪពុកក្មេក…
រាជធានីភ្នំពេញ ៖ កូនប្រសាស្រីទើបរៀបការថ្មីថ្មោង ដែលបានបាត់ខ្លួនកាលពីប៉ុន្មានថ្ងៃមុននេះ ហើយត្រូវបានក្រុមគ្រួសារ ជាពិសេសឪពុកក្មេកមានការព្រួយបារម្ភ និងកាន់រូបថតនាងតាមរកគ្រប់ច្រកល្ហកនោះ ពេលនេះបានទទួលដំណឹងហើយគឺនាងបានវេចបង្វេចរត់ទៅតាមប្រុសថ្មីបាត់ ដោយមិនអាឡោះអាល័យឡើយ។ នេះបើតាមការអោយដឹងពីឪពុកក្មេក និងបុរសអភ័ព្វស្នេហ៍ដែលជាប្តីរបស់នាង។ គួររំលឹកថា ខណៈរកនាងមិនទាន់ឃើញ ប្តីអះអាងថាសង្ស័យប្រពន្ធរត់តាមប្រុសថ្មីបាត់
ទន្ទឹមនឹងនោះ បុរសជាប្តីស្ទើរកកឈាម បន្ទាប់ពីទទួលបានដំណឹងដ៏សែនឈឺចាប់នេះ ។ បុរសជាប្តីក៏បានពោលពាក្យយ៉ាងកំសត់ថា «តើបងខុសអីបានជាអូនរត់ចោលបងបែបនេះ?»។
កូនប្រសាស្រីខាងលើនេះឈ្មោះថន ដាវីអាយុ២០ឆ្នាំ ជាកម្មាការីនីកាត់ដេរ ស្នាក់នៅបន្ទប់ជួលក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ ចំណែកប្តីឈ្មោះឈាត ឆើត អាយុ២០ឆ្នាំ ជាជាងអគ្គីសនីបម្រើការនៅខេត្តព្រះសីហនុ ។ ប្តីប្រពន្ធទាំង២នាក់នេះគឺត្រូវជាបងប្អូនជីទួតមួយនឹងគ្នា ហើយអ្នកទាំង២មានស្រុកកំណើរនៅភូមិធ្លក ឃុំស្ពឺ ស្រុកបាភ្នំ ខេត្តព្រៃវែង។
តាមប្រភពពីឪពុកក្មេកឈ្មោះឈួន ឈាត អាយុ៤០ឆ្នាំ ជាកសិករ បានអោយដឹងតាមទូរស័ព្ទថា កូនប្រសាស្រីដែលបាត់ខ្លួនខាងលើនេះ គាត់បានទទួលដំណឹងហើយ គឺដោយសារកូនប្រសាស្រីនោះបានទូរស័ព្ទប្រាប់ម្តាយបង្កើតរបស់នាងកាលពីល្ងាចថ្ងៃទី៤ ខែវិច្ឆិកា ថា កុំអោយបារម្ភ ហើយម្តាយក៏បានយកដំណឹងនេះមកប្រាប់គាត់ជាដន្លងនៅព្រឹកថ្ងៃទី៥ ខែវិច្ឆិកា នេះ។
តាមប្រភពដដែលបានបញ្ជាក់អោយដឹងថា កូនប្រសាស្រីរបស់គាត់ដែលបានបាត់ខ្លួននោះ គឺបានវេចបង្វេចចុះចោលផ្ទះរត់តាមប្រុសថ្មីបាត់ទៅហើយ ។ នៅមុនពេលបាត់ខ្លួន ដោយមានបាត់បង្វេចខោអាវ ហើយគាត់ក៏មានការសង្ស័យដែរ តែមិនហ៊ាននិយាយ ។ ចំពោះរឿងហេតុបែបនេះ គាត់នឹងទាមទារប្រាក់បណ្ណាការចំនួន១៦០០ដុល្លារ ព្រោះទើបតែរៀបការថ្មី ស្រាប់តែខាងស្រីរត់ចោលប្តីបាត់។
តាមប្រភពដដែលបានបន្តអោយដឹងទៀតថា ក្រុមគ្រួសារខាងស្រីត្រូវជាបងប្អូនដីដូនមួយនឹងគ្នា មិនទាន់ដឹងថា គិតយ៉ាងណានោះទេ។
ជួបជាមួយបុរសអភ័ព្វស្នេហ៍ដែលប្រពន្ធរត់ចោលបានអោយដឹងតាមទូរស័ព្ទថា គាត់មានការសង្ស័យថា ប្រពន្ធរបស់គាត់បានស្រលាញ់គ្នាជាមួយបុរសម្នាក់នោះតាំងពីមុនពេលរៀបការមកម្ល៉េះ បានជានៅសុខៗ នាងវេចបង្វេចចុះចោលផ្ទះបែបនេះ។
បុរសជាប្តីបានពោលយ៉ាងកម្សត់ថា «បើអូនស្រលាញ់គេហើយ ហេតុអីក៏មករៀបការជាមួយបងធ្វើអ្វី? ។ រៀបការបាន៤ខែ ហេតុអីអូនប្រាប់ម៉ែថា រត់ប្រុសទៅវិញ? តើបងខុស អីបានជាអូន រត់ចោលបងបែបនេះ ឬមួយបងក្រ គេមានលុយ? មួយរយៈពេលដែលយើងរស់នៅជាមួយគ្នា ល្អូកល្អឺនណាស់ ហេតុអ្វីក៏អូនទៅដោយមិនអាឡោះអាល័យ…បងមិនអស់ចិត្តសោះ»។
គួរបញ្ជាក់ថា កាលពីព្រឹកថ្ងៃទី១ ខែវិច្ឆិកា ឆ្នាំ២០១៩ មិនឃើញកូនប្រសាស្រីទៅធ្វើការឡើយ ទើបមានការភ្ញាក់ផ្អើលថាបាត់នាង ។ បន្ទាប់ពីបាត់ខ្លួនកូនប្រសាស្រី បុរសជាឪពុកក្មេកបានកាន់រូបថតតាមរកគ្រប់ច្រកល្ហក ព្រមទាំងទៅប្តឹងនគរបាលប៉ុស្តិ៍ទួលសង្កែទី១កាលពីព្រឹកថ្ងៃទី២ ខែវិច្ឆិកា ឆ្នាំ២០១៩ ដើម្បីអោយជួយតាមរក បន្ទាប់ពីឪពុកក្មេកបានរកគ្រូទាយថា កូនប្រសាស្រីនៅម្តុំខាងជើងរង្វង់មូលគួចកាណុង ។
ចំណែកបុរសជាប្តីដែលធ្វើការនៅខេត្តព្រះសីហនុក៏បានធ្វើដំណើរមកទាំងអន្ទះសារ ដើម្បីតាមរកប្រពន្ធជាទីស្រលាញ់ផងដែរ ។ រីឯឪពុកម្តាយបង្កើតរបស់នាងដែលមានការព្រួយបារម្ភក៏បានដេកយំរាល់ថ្ងៃ ដោយសារបាត់កូនស្រីសំណព្វចិត្ត តែទីបំផុតបែរជាកូនស្រីផ្តល់ដំណឹងដ៏សែនឈឺចាប់ និងអាម៉ាស់ប្រាប់ថា នាងរត់ទៅជាមួយប្រុសផ្សេងទៅវិញ៕ (កែសម្រួលដោយ ៖ ធីតា)
ចែករំលែកព័តមាននេះ