ខេត្តសៀមរាប ៖ ដើម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងឈានចូលមកដល់នាពេលដ៏ខ្លីខាងមុខនេះ នាល្ងាចថ្ងៃទី២ ខែវិច្ឆិកា ថ្នាក់ដឹកនាំខេត្តដឹកនាំដោយលោក…
ខេត្តសៀមរាប ៖ ដើម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងឈានចូលមកដល់នាពេលដ៏ខ្លីខាងមុខនេះ នាល្ងាចថ្ងៃទី២ ខែវិច្ឆិកា ថ្នាក់ដឹកនាំខេត្តដឹកនាំដោយលោក អុឹងហឿន ប្រធានក្រុមប្រឹក្សាខេត្ត និងលោក ទៀ សីហា អភិបាលខេត្ត បានចុះពិនិត្យទីតាំងដើម្បីរៀបចំព្រះរាជពិធីបុណ្យនៅតាមដងស្ទឹងសៀមរាប ។
លោក ទៀ សីហា អភិបាលខេត្ត បានណែនាំដល់គ្រប់អនុគណៈកម្មការទាំងអស់ ត្រូវយកចិត្តទុកដាក់រៀបចំសោភ័ណភាពក្រុងឱ្យមានភាពទាក់ទាញដល់ភ្ញៀវទេសចរជាតិ-អន្តរជាតិមកទស្សនាកម្សាន្តឱ្យបានច្រើនកុះករ ។ លោកអភិបាលខេត្ត ថ្លែងថា ក្នុងឆ្នាំនេះ អាជ្ញាធរខេត្តនឹងរៀបចំព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក ក្នុងខេត្តសៀមរាប រយៈពេល៤ថ្ងៃ ចាប់ពីថ្ងៃ ទី៩រហូតដល់ថ្ងៃទី១២ ខែវិច្ឆិកា ឆ្នាំ២០១៩ តាមបណ្តោយដងស្ទឹងសៀមរាប ចាប់ពីស្ពានអតីតមន្ទីរទេសចរណ៍រហូតដល់ស្ពានវត្ត រាជបូព៌ ។
ទន្ទឹមនឹងនេះ អាជ្ញាធរខេត្តក៏សូមធ្វើការអំពាវនាវដល់បងប្អូនទាំងអស់ ដែលបានចូលរួមក្នុងព្រះរាជពិធីនេះ សូមចូលរួមក្នុងការសម្អាតបរិស្ថាន ដោយចោលសំរាមទៅក្នុងធុងសំរាមតាមកន្លែងកំណត់របស់អាជ្ញាធរ ចៀសវាងចោល ពាសវាលពាសកាល ដែលធ្វើឱ្យបាត់បង់នូវបរិស្ថានស្អាតរបស់ក្រុងរបស់យើង ។
ម្យ៉ាងទៀត ចំពោះការធ្វើចរាចរណ៍ សូមបង ប្អូនគោរពច្បាប់ចរាចរណ៍ និងមានការយោគយល់គ្នាទៅវិញទៅមកក្នុងការបើកបរ ចៀសវាងមានគ្រោះថ្នាក់ចរាចរណ៍ ហើយសូមចៀសឱ្យឆ្ងាយពីគ្រឿងញៀន ព្រោះគ្រឿងញៀនបំផ្លាញជីវិតរបស់អ្នក គ្រួសារអ្នក និងសង្គមផងដែរ ៕
ចែករំលែកព័តមាននេះ