ខេត្តកណ្តាល ៖ កាលពីល្ងាចថ្ងៃទី៣ ខែវិច្ឆិកា ឆ្នាំ២០១៩ លោក ហុក វ៉ាន់ធីណា ប្រធានសាលាដំបូងខេត្តកណ្តាល និងជាចៅក្រមស៊ើបសួរបានសម្រេចចេញដីការឃុំខ្លួនបុរសម្នាក់ខឹងសង្សារសុំបែកយករូបអាក្រាតរបស់នារីរងគ្រោះទៅបង្ហោះចែកចាយក្នុងបណ្តាញសង្គមហ្វេសប៊ុក…
ខេត្តកណ្តាល ៖ កាលពីល្ងាចថ្ងៃទី៣ ខែវិច្ឆិកា ឆ្នាំ២០១៩ លោក ហុក វ៉ាន់ធីណា ប្រធានសាលាដំបូងខេត្តកណ្តាល និងជាចៅក្រមស៊ើបសួរបានសម្រេចចេញដីការឃុំខ្លួនបុរសម្នាក់ខឹងសង្សារសុំបែកយករូបអាក្រាតរបស់នារីរងគ្រោះទៅបង្ហោះចែកចាយក្នុងបណ្តាញសង្គមហ្វេសប៊ុក ដាក់ពន្ធនាគារបណ្តោះអាសន្នពីបទ «គំរាមកំហែងហែកកេរ្តិ៍ និងចែកចាយរូបភាពអាសអាភាស» តាមមាត្រា៣៧២ ៣៧៤ នៃក្រមព្រហ្មទណ្ឌ និងមាត្រា៣៩ កថាខណ្ឌទី៣ នៃច្បាប់ស្តីពីការបង្ក្រាបការជួញដូរមនុស្ស និងអំពើរធ្វើអាជីវកម្មផ្លូវភេទ ជនសង្ស័យបានប្រព្រឹត្តនៅស្រុកកោះធំ ខេត្តកណ្តាល កាលពីអំឡុងខែមេសា ឆ្នាំ២០១៩ ។
ជនត្រូវចោទឈ្មោះលឹម សេងហៀង ភេទប្រុស អាយុ២៧ឆ្នាំ មានទីលំនៅភូមិឯកភាព ឃុំថ្មពួក ស្រុកថ្មពួក ខេត្ដបន្ទាយមានជ័យ ។ ចំណែកនារីរងគ្រោះ មានអាយុ២០ឆ្នាំ មុខរបរបុគ្គលិកកាស៊ីណូ មានទីលំនៅស្រុកកោះធំ ខេត្តកណ្តាល ។
លោក ឡាក់ ម៉េងធី នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាលបានប្រាប់អោយដឹងនៅថ្ងៃទី៤ វិច្ឆិកា នេះថា បន្ទាប់ពីទទួលបានពាក្យបណ្តឹងភ្លាម លោកបានដឹកនាំកម្លាំងចុះស្រាវជ្រាវដោយប្រើរយៈពេល៣ថ្ងៃ រហូតកំណត់មុខសញ្ញាបាន និងសហការជាមួយនគរបាលខេត្តបន្ទាយមានជ័យចុះធ្វើការឃាត់ខ្លួនជនសង្ស័យបានតែម្តង។
គួររំលឹកថា កាលពីអំឡុងខែកញ្ញា ឆ្នាំ២០១៨ សង្ស័យមានទំនាក់ទំនងគ្នាជាមួយនារីរងគ្រោះ និងបានរស់នៅជាមួយគ្នាបានរយៈពេលប្រហែល៣ខែ ។ រហូតដល់អំឡុងខែមេសា ឆ្នាំ២០១៩ នារីរងគ្រោះបានសុំផ្តាច់ទំនាក់ទំនងស្នេហាជាមួយជនសង្ស័យ ព្រោះនាងមានបំណងរៀបការជាមួយអ្នកផ្សេង ប៉ុន្ដែជនសង្ស័យមិនព្រមបែកគ្នានោះទេ ហើយបានគំរាមកំហែងនារីរងគ្រោះថានឹងយករូបដែលខ្លួនថតទុកនោះបង្ហោះតាមបណ្តាញសង្គមហ្វេសប៊ុក ហើយឲ្យគេឯងមើលទៀតផង ។
បន្ទាប់មកជនសង្ស័យក៏បានផ្ញើរូបអាក្រាតកាយរបស់នារីរងគ្រោះទៅឲ្យបងប្អូន និងមិត្តភក្តិរបស់នាងមើល រួមទាំងរូបរបស់អ្នកទាំងពីរធ្លាប់ដេកជាមួយគ្នាទៀត ហើយជនសង្ស័យនៅតែបន្ដចែកចាយរូបអាក្រាតកាយរបស់នារីរងគ្រោះតាមរយៈឆាតក្នុងគ្រុបផ្សេងៗជាច្រើនទៀត ។
តាមចម្លើយសារភាពរបស់ជនសង្ស័យបានឲ្យដឹងថា ខ្លួនពិតជាបានស្រឡាញ់ និងរស់នៅជាមួយនារីរងគ្រោះ ព្រមទាំងបានថតរូបអាក្រាតកាយរបស់នារីរងគ្រោះទុកជាច្រើន ។ ដោយសារនារីរងគ្រោះព្យាយាមសុំបែកគ្នា ទើបខ្លួនសម្រេចចិត្ដផ្ញើរូបអាក្រាតកាយរបស់នារីរងគ្រោះទៅឲ្យបងប្អូនមិត្ដភក្តិនៅក្នុងគ្រុបផ្សេងៗទៀតមើល ក្នុងបំណងឲ្យនារីរងគ្រោះខូចកិត្ដិយស ដើម្បីឲ្យនារីរងគ្រោះមករស់នៅជាមួយខ្លួនវិញ ៕(កែសម្រួលដោយ ៖ ធីតា)
ចែករំលែកព័តមាននេះ