រាជធានីភ្នំពេញ ៖ សមាជិករដ្ឋសភាចំនួន១១០រូប បានលើកដៃអនុម័តលើសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមជាឯកច្ឆន្ទ ។ ការអនុម័តសេចក្តីព្រាងច្បាប់ធ្វើឡើងក្នុងសម័យប្រជុំលើកទី៣ នីតិកាលទី៦…
រាជធានីភ្នំពេញ ៖ សមាជិករដ្ឋសភាចំនួន១១០រូប បានលើកដៃអនុម័តលើសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមជាឯកច្ឆន្ទ ។ ការអនុម័តសេចក្តីព្រាងច្បាប់ធ្វើឡើងក្នុងសម័យប្រជុំលើកទី៣ នីតិកាលទី៦ នៃរដ្ឋសភា ក្រោមអធីបតីភាពសម្តេចហេង សំរិន ប្រធានរដ្ឋសភា នាព្រឹកថ្ងៃទី០៤ ខែវិច្ឆិកានេះ ។
ខ្លឹមសារនៃសេចក្តីព្រាងនេះត្រូវសម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋ និងជាមន្ត្រីក្រសួងការពារជាតិតំណាងរាជរដ្ឋាភិបាលលើកឡើងថា រាជរដ្ឋាភិបាលកម្ពុជាបានប្តេជ្ញាចិត្តដ៏មោះមុតក្នុងសុឆន្ទៈ ដើម្បីសម្រេចបានព្រំដែនកម្ពុជាជាមួយប្រទេសជិតខាងដោយឈរលើមូលដ្ឋា នគោរពឯករាជ្យ អធិបតេយ្យភាព និងបូរណភាពដែនដីរវាងព្រះរាជាណាចក្រកម្ពុជា និង សាធារណរដ្ឋសង្គមនិយមវៀតណាម ដើម្បីសុភមង្គល និងភាពរុងរឿងរបស់ប្រជាជាតិ និងប្រជាជននៃប្រទេសទាំងពីរ និងដើម្បីបង្កើនទំនាក់ទំនងជិតខាងល្អសាមគ្គីភាពជាប្រពៃណីដែលនាំមកនូវព្រំដែនសន្តិភាព ស្ថិរភាព មិត្តភាព សហប្រតិបត្តិការ និងអភិវឌ្ឍន៍រឹងមាំស្របតាមគោលការណ៍ច្បាប់ និងការអនុវត្តជាអន្តរជាតិស្តីពីខ្សែព្រំដែនមិនកែប្រែនៅពេលដែលកម្ពុជាបានឯករាជ្យ ។
សម្តេចបន្តថា រាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាមបានចុះហត្ថលេខាលើសន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ នៅរដ្ឋធានី ហាណូយនៃសាធារណរដ្ឋសង្គមនិយមវៀតណាមនាថ្ងៃទី១០ ខែតុលា ឆ្នាំ២០០៥ ។ ឈរលើមូលដ្ឋាននៃសន្ធិសញ្ញាបំពេញបន្ថែមខាងលើប្រទេសទាំងពីរ កម្ពុជា និងវៀតណាមបានដំណើរការចុះបោះបង្គោល និងខណ្ឌសីមាព្រំដែនគោកនៅលើដីជាក់ស្តែងពីខេត្តរតនគិរី ដល់ខេត្តកំពត ចាប់ពី ខែមិថុនា ឆ្នាំ២០០៦ ដល់ខែកក្កដា ឆ្នាំ២០១៩ សម្រេចបានលទ្ធផល៨៤% នៃបង្គោលព្រំដែនធំដែលមានចំនួន៣៧៥ បង្គោល លើដីជាក់ស្តែងដែលបានបោះនៅតាមបណ្តោយខ្សែព្រំដែនរួមរវាងប្រទេសទាំងពីរ ដែលមានប្រវែងប្រមាណជាង១ ២៧០ គីឡូម៉ែត្រ ។
លទ្ធផលដែលសម្រេចបានមានដូចខាងក្រោម ៖ បង្គោលព្រំដែនធំចំនួន៣១៥ បង្គោល ស្មើនឹង៨៤% នៃបង្គោលព្រំដែនសរុបចំនួន៣៧៥ បង្គោល ។ បង្គោលខណ្ឌសីមាព្រំដែនចំនួន១ ៥១១ ស្មើនឹង៩៩, ៩% បើបង្គោល១ ៥១២ នៃផែនការ (ក្នុងនោះកម្ពុជាបោះលេខសេសចំនួន៧៩១ វៀតណាមបោះលេខតូចំនួន៧២១ បង្គោល) ។ បង្គោលតម្រុយព្រំដែនចំនួន២២១ ស្មើនឹង១០០% នៃផែនការ( ក្នុងនោះកម្ពុជាបោះលេខសេសចំនួន១២៦ បង្គាលវៀតណាមបោះលេខចំនួន៩៥ បង្គោល) ចំណុចពិសេសចំនួន១០០០ ។
សន្ធិសញ្ញាបំពេញបន្ថែមឆ្នាំ២០១៩នេះ មានគោលបំណង និងផលប្រយោជន៍ គឺដើម្បីរក្សាការគ្រប់គ្រង ដដែលលើដីធ្លីស្រែចម្ការរបស់ប្រជាពលរដ្ឋដែលបាន និងកំពុងរស់នៅដាំដុះបង្កបង្កើនផលក្នុងគោលដៅធានាបានស្ថិរភាពរបស់ប្រជាជននៅតាមតំបន់ព្រំដែននៃប្រទេសទាំងពីរ និងដើម្បីរួមចំណែកអភិវឌ្ឍសេដ្ឋកិច្ចសង្គមលុបបំបាត់ភាពអត់ឃ្លាន កាត់បន្ថយភាពក្រីក្ររបស់ប្រជាពលរដ្ឋ និងប្រែក្លាយតំបន់ព្រំដែនឱ្យទៅជាតំបន់សន្តិភាព មិត្តភាព សហប្រតិបត្តិ ការលើគ្រប់វិស័យ និងដើម្បីជម្នះធ្វើបញ្ចប់ការងារខណ្ឌសីមា និងបោះបង្គោលព្រំដែនគោកឱ្យបានឆាប់រវាងប្រទេសទាំងពីររដ្ឋាភិបាលនៃប្រទេសទាំងពីរកម្ពុជា និងវៀតណាម បានឯកភាពកែសម្រួលខ្សែព្រំដែនពីផែនទីបោនខ្នាត ១/១០០ ០០០ បោះពុម្ភដោយក្រុមភូមិសាស្ត្រឥណ្ឌូ ចិន មកតាមការគ្រប់គ្រងកាន់កាប់ជាក់ស្តែងរបស់ប្រជាពលរដ្ឋទាំងសងខាងខ្សែព្រំដែន ដើម្បីបង្កលក្ខណៈងាយស្រួល និងផ្តល់ភាពសុខសាន្តដល់ប្រជាពលរដ្ឋដែលរស់នៅតាមបណ្តោយព្រំដែននៃប្រទេសទាំងពីរឱ្យបន្តគ្រប់គ្រង លើដីធ្លីស្រែចំការដែលបាន និងកំពុងអាស្រ័យផលទាំងនោះជាបន្តទៀត ។
សន្ធិសញ្ញាបំពេញបន្ថែមឆ្នាំ២០១៩នេះ ត្រូវបានរៀបចំធ្វើឡើងជាទ្វេភាគី តាមរយៈ កិច្ចប្រជុំពិភាក្សា ប្តូរវេនចំនួន៥ដង តាមរយៈការផ្លាស់ប្តូរឯកសារតាម កំណត់ទូតចំនួន៤ដង និងតាមរយៈលិខិតឆ្លើយឆ្លងបញ្ជាក់ពីជំហររបស់ភាគីនីមួយៗនូវចំណុចមិនឯកភាពគ្នាចំនួន៣ដង ។ ក្រៅពីការតាក់តែងរួមគ្នាភាគីទាំងពីរក៏បានសិក្សា និងដកពិសោធន៍ពីសន្ធិសញ្ញាព្រំដែនដែលវៀតណាមបានធ្វើជាមួយចិន និងឡាវផងដែរ ។ សន្ធិសញ្ញាបំពេញបន្ថែមឆ្នាំ២០១៩នេះ នឹងត្រូវផ្តល់សច្ចាប័ន និងចូលជាធរមានបន្ទាប់ពីផ្លាស់ប្តូរ លិខិតូបករណ៍សច្ចាប័ន និងធ្វើជាបីច្បាប់ ជាបីភាសា គឺភាសាខ្មែរ ភាសាវៀតណាម និងភាសាបារាំង ។
ក្នុងករណីមានការបកស្រាយខុសគ្នា អត្ថបទជាភាសាបារាំងត្រូវយកមកធ្វើជាឯកសារគោល ។ លោក ហ៊ុនណេង ប្រធានគណៈកម្មការទី៥ នៃរដ្ឋសភាបានលើកឡើងថា សន្ធិសញ្ញាបំពេញបន្ថែមឆ្នាំ២០១៩នេះ គឺជាឯកសារផ្លូវច្បាប់ប្រវត្តិសាស្ត្រដ៏មានសារៈសំខាន់បំផុតក្នុងការទទួលយកសមិទ្ធផលដែលប្រទេសទាំងពីរសម្រេចបានមកដល់បច្ចុប្បន្នគឺមាន៨៤% ហើយក៏ជាឯកសារគ្រឹះការពារបានបូរណភាពទឹកដីកម្ពុជា ដោយមានខ្សែព្រំដែនមិនឱ្យប្រែប្រួលថែរក្សាបាននូវព្រំដែនសុខសន្តិភាព ស្ថិរភាព មិត្តភាព សហប្រតិបត្តិការ និងការអភិឌ្ឍលើគ្រប់វិស័យ ដើម្បីភាពសុខសាន្តរបស់ប្រជាពលរដ្ឋកម្ពុជាតរៀងទៅ ៕ កែសម្រួលដោយ ៖ សុឃាក់
ចែករំលែកព័តមាននេះ