ប្រទេសស៊ីរី ៖ មនុស្សយ៉ាងតិច១៣នាក់បានត្រូវស្លាប់កាលពីថ្ងៃទី២វិច្ឆិកា ក្នុងការផ្ទុះរថយន្តផ្ទុកគ្រឿងផ្ទុះ១គ្រឿង ក្នុងទីក្រុងតាល់អាប់យ៉ាតជាទីក្រុងមួយនៅភាគខាងជើងស៊ីរី ត្រួតត្រាដោយកងទ័ពតួកគី។ ចំណែកមនុស្សច្រើនពាន់នាក់បានលើកគ្នាធ្វើបាតុកម្ម ក្នុងទីក្រុងមានពួកឃើតភាគច្រើននេះប្រឆាំងតួកគី។
ស្ថិតនៅព្រំដែនជាមួយតួកគី ក្រុងតាល់អាប់យ៉ា ត្រូវបានកងទ័ពតួកគីនិងពួកឧទ្ទាមស៊ីរីជាសម្ព័ន្ធមិត្ត វាយដណ្ដើមយកបានក្នុងការវាយលុកមួយចាប់ផ្ដើមពីថ្ងៃទី៩តុលាមក ប្រឆាំងពួកជីវពលឃើត។ យោងតាមក្រសួងការពារប្រទេសតួកគីថា ការផ្ទុះកើតមានក្នុងផ្សារមួយបណ្ដាលឲ្យជនសីុវិលស្លាប់១៣នាក់ហើយមនុស្ស២០នាក់រងរបួស។
ចំណែកអង្គការសិទ្ធិមនុស្សស៊ីរីOSDHមានប្រភពព័ត៌មានច្រើនក្នុងប្រទេសប្រកាសថា មនុស្សដល់១៤នាក់បានត្រូវស្លាប់ដែលក្នុងចំណោមជនរងគ្រោះទាំងនេះមានជនស៊ីវិលនិងពួកឧទ្ទាមគាំទ្រដោយតួកគី៕ (កែសម្រួលដោយ ៖ បុប្ផា)
ចែករំលែកព័តមាននេះ