រាជធានីភ្នំពេញ ៖ នាព្រឹកថ្ងៃទី១ ខែវិច្ឆិកា ដូចគ្រឹះស្ថានសិក្សាឯទៀតៗដែរ សាលាបឋមសិក្សាជ័យជំនះ បានធ្វើពិធីបើកបវេសនកាលឆ្នាំសិក្សាថ្មី២០១៩-២០២០ ដោយមានការចូលរួមជាអធិបតីភាពពីលោកចៅសង្កាត់បឹងកេងកងទី៣ និងតំណាងអង្គការជាដៃគូ ព្រមទាំងមាតា…
រាជធានីភ្នំពេញ ៖ នាព្រឹកថ្ងៃទី១ ខែវិច្ឆិកា ដូចគ្រឹះស្ថានសិក្សាឯទៀតៗដែរ សាលាបឋមសិក្សាជ័យជំនះ បានធ្វើពិធីបើកបវេសនកាលឆ្នាំសិក្សាថ្មី២០១៩-២០២០ ដោយមានការចូលរួមជាអធិបតីភាពពីលោកចៅសង្កាត់បឹងកេងកងទី៣ និងតំណាងអង្គការជាដៃគូ ព្រមទាំងមាតា បិតាសិស្ស និងសិស្សានុសិស្សយ៉ាងច្រើនកុះករ ។
យោងតាមរបាយការណ៍របស់លោកស្រី ទឹម សុខា នាយិកាសាលាបានឱ្យដឹងថា នេះគឺជាឆ្នាំ ដំបូងហើយដែលការប្រារព្ធពិធីបើកបវេសនកាលថ្មី ខណៈមានការបែងចែករដ្ឋបាលគ្រប់គ្រង ដែលមុននេះសាលាបឋមសិក្សាជ័យជំនះស្ថិតក្នុងខណ្ខចំការមន និងបានផ្ទេរមកខណ្ឌបឹងកេងកង ដែលជាខណ្ឌបង្កើតថ្មីក្នុងរាជធានីភ្នំពេញ ។ លោកស្រីបន្តថា ក្នុងឆ្នាំសិក្សាកន្លងមកនេះ សាលាមានបុគ្គលិកសិក្សា៥១នាក់ ក្នុងនោះអ្នកគ្រូ៤១នាក់ មានសិស្សសរុប៧៩៥នាក់(ស្រី៣៨០នាក់) ។ លទ្ធផលសិក្សាឆ្នាំ២០១៨-២០១៩ ពីថ្នាក់ទី១ដល់ ទី៦ សិស្សជាប់ជាមធ្យមភាគបាន៩២,៤៥%។ ដោយឡែក សម្រាប់ឆ្នាំសិក្សាថ្មីនេះទទួលចុះឈ្មោះសិស្សថ្មីបាន១៥៨នាក់(ស្រី៨៣នាក់) ។
ក្នុងឱកាសនោះដែរ លោក ព្រំ សុខឿន ចៅសង្កាត់បឹងកេងទី៣ បានឡើងអានសារលិខិត សម្តេចតេជោនាយករដ្ឋមន្ត្រី ហ៊ុន សែន ក្នុងថ្ងៃបើកបវេសនកាលថ្មីនេះ ដែលសម្តេចបានជំរុញ
ឲ្យលោកគ្រូ-អ្នកគ្រូ ត្រូវរួមគ្នាបន្តដើរតួជាបុគ្គលគំរូ ជាឪពុកម្តាយ អ្នកស្រាវជ្រាវ ជាទីប្រឹក្សា និងជាអ្នកនាំមកនូវគំនិតច្នៃប្រឌិតតាមរយៈការខិតខំប្រឹងប្រែងអភិវឌ្ឍសមត្ថភាព ខ្លួនជាប្រចាំ ដើម្បីយកចំណេះដឹងថ្មីៗមកបង្ហាត់ បង្រៀនសិស្សានុសិស្សឲ្យមានចំណេះដឹងទូលំ ទូលាយ អភិវឌ្ឍខ្លួនទៅជាពលរដ្ឋសកល និងជាអ្នកបន្តវេនសម្រាប់ថ្ងៃអនាគត ។
សម្ដេចតេជោ ហ៊ុន សែន ក៏បានមានប្រសាសន៍ប្រាប់ដល់ក្មួយៗជាសិស្សានុសិស្ស និងយុវជនយុវនារីទាំងអស់ ត្រូវខិតខំរៀនសូត្រឲ្យ បានខ្ជាប់ខ្លួន ត្រូវចូលរួមឲ្យបានគ្រប់សកម្មភាព ដើម្បីគាំទ្រដំណើរការអភិវឌ្ឍន៍សាលារៀន និងសង្គមជាតិយើង ។
ជាមួយគ្នានេះ សម្ដេចតេជោ ហ៊ុន សែន ក៏បានណែនាំដល់គ្រឹះស្ថានសិក្សាគ្រប់កម្រិត រួមទាំងទីវត្តអារាម ត្រូវផ្តល់លទ្ធភាពក្នុងការអប់រំពេញលេញនិងមានគុណភាព តាមរយៈការបង្កើនការផ្សព្វផ្សាយ ការធ្វើយុទ្ធនាការប្រមូលកុមារចូលរៀន និងត្រៀមលក្ខណៈតាមគ្រប់រូបភាព ដូចជាអាកាសធាតុក្តៅហួតហែង ទឹកជំនន់ ខ្យល់កន្ត្រាក់ជាដើម ។
ក្នុងពិធីនេះ ក៏មានការប្រគល់រង្វាន់ដល់សិស្សពូកែប្រចាំឆ្នាំពីលេខ១ដល់លេខ៣ និងមាន ការផ្តល់ប័ណ្ណសរសើរអមដោយថវិកាដល់លោកគ្រូអ្នកគ្រូ ដែលបានទទួលជ័យលាភីក្នុងឆ្នាំសិក្សា
២០១៨-២០១៩ កន្លងមកចំនួន៦រូប ។ សាលាបានទទួល ការឧបត្ថម្ភគាំទ្រទាំងស្មារតីនិង
សម្ភារ ពីអាជ្ញាធរ និងអង្គការជាដៃគូផងដែរសម្រាប់ធ្វើជាវិភាគទានជួយដល់សិស្សក្រីក្រ ៕
ចែករំលែកព័តមាននេះ