ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ជនរងគ្រោះម្នាក់ ត្រូវបានគេប្រទះឃើញនៅលើផ្លូវរថភ្លើង ដោយត្រូវរថភ្លើងកិនពីលើ បណ្តាលឱ្យដាច់ក្បាល និងដាច់ជើងទាំងសងខាង បណ្តាលឱ្យស្លាប់ភ្លាមៗនៅនឹងកើតហេតុ បង្កឱ្យមានការភ្ញាក់ផ្អើលកាលពីម៉ោង៨និង៣០នាទីព្រឹក ថ្ងៃទី០២ ខែវិច្ឆិកា ឆ្នាំ២០១៩ ស្ថិតក្នុងភូមិគោកទំលាប់ ឃុំបន្ទាយនាង ស្រុកមង្គលបូរី។
បើតាមមន្ត្រីនគរបាលចរាចរណ៍ស្រុកមង្គលបូរី ប្រាប់ថា ក្រោយពេលទទួលបានព័ត៌មានភ្លាម មន្ត្រីជំនាញចុះទៅពិនិត្យឃើញជនរងគ្រោះម្នាក់មិនទាន់អត្តសញ្ញាណ ភេទប្រុស អាយុប្រហែលជាង២០ឆ្នាំ សម្បុរសណ្តែកបាយ កម្ពស់១,៦០ម៉ែត្រ ពាក់អាវយឺតដៃវែងពណ៌ក្រហម ខោខៅប៊ូវជើងវែង និងខោក្នុងពណ៌ខៀវឆ្នូតក្រហម។
មន្ត្រីនគរបាលបានបញ្ជាក់ថា នៅមុនពេលគ្រោះថ្នាក់កើតឡើង គឺជនរងគ្រោះអាចដេកដោយយកក្បាលកើយលើផ្លូវដែកខាងកើត និងយកជើងទាំងពីរដាក់គងលើផ្លូវដែកខាងលិច ស្របពេលពេលនោះរថភ្លើងធ្វើដំណើរចេញពីក្រុងសិរីសោភ័ណ ខេត្តបន្ទាយមានជ័យ ទិសដៅទៅខេត្តបាត់ដំបង លុះមកដល់ចំណុចកើតហេតុ ស្រាប់តែរថភ្លើងកិនជនរងគ្រោះដែលដេកនៅទីនោះ បណ្តាលឱ្យដាច់ក្បាល និងដាច់ជើងទាំងសងខាង ស្លាប់ភ្លាមៗនឹងកន្លែងកើតហេតុតែម្តង។
មន្ត្រីនគរបាលបានបញ្ជាក់ថា ជនរងគ្រោះដែលត្រូវរថភ្លើងកិនស្លាប់ អាចជាមនុស្សសតិមិនគ្រប់ ឬវិកលចរិក។ ក្រោយពេលពិនិត្យហើយ រកសាច់ញាតិមិនឃើញ អធិការនគរបាលស្រុកមង្គលបូរី បានចេញថវិកាឱ្យបញ្ចុះសពនៅវត្តពោធិ៍រាង ហើយទុកធាតុ ក្រែងមានសាច់ញាតិមកសួររក ដើម្បីប្រគល់ជូន។ (កែសម្រួលដោយ ៖ បុប្ផា)
ចែករំលែកព័តមាននេះ