រាជធានីភ្នំពេញ ៖ ក្រុមនិស្សិតមកពីសាកលវិទ្យាល័យនានានៅក្នុងប្រទេសកម្ពុជា និងបណ្តាសង្គមស៊ីវិលបានបើកិច្ចពិភាក្សាលើវិស័យថាមពលស្អាតនៅក្នុងប្រទេសកម្ពុជា ដើម្បីពួកគេស្វែងយល់ពីអាជីព និងអនាគតក្នុងវិស័យថាមពលនេះ ។ ការពិភាក្សាធ្វើឡើងក្នុងកម្មវិធី «សប្ដាហ៍ថាមពលស្អាត២០១៩» ដែលទទួលបានសមិទ្ធផលវិស័យថាមពលស្អាតនៅកម្ពុជាក្នុងរយៈពេលមួយឆ្នាំកន្លងទៅកាលពីពេលកន្លងមកនេះ ។
តំណាងអ្នករៀបចំកម្មវិធីបានលើកឡើងថា កម្មវិធីនេះចូលរួមអបអរ និងផ្ដល់ឱកាសក្នុងការបង្ហាញអំពីសក្ដានុពលនៃការប្រើប្រាស់ថាមពលស្អាតនៅកម្ពុជា ។ ក្នុងនាមជាការជួបជុំផ្នែកថាមពលស្អាតធំជាងគេនៅកម្ពុជា កម្មវិធីនេះមានព្រឹត្តិការណ៍ចំណុះជាង៣០នៅទូទាំងរាជធានីភ្នំពេញ ដែលប្រព្រឹត្តទៅចាប់ពីថ្ងៃទី១ ដល់ថ្ងៃទី៧ ខែវិច្ឆិកា ។
សកម្មភាពទាំងនេះនឹងបិទបញ្ចប់ដោយរាត្រី ព្រឹត្តិការណ៍ពិព័រណ៍ និងកម្សាន្តសប្ដាហ៍ថាមពល ស្អាតដែលនឹងមានការចូលរួមពីក្រុមហ៊ុនថាមពលចំនួន១៥ ។ យើងសូមអំពាវនាវដល់សាធារ ណជន មេត្តាចូលរួមគាំទ្រសមិទ្ធផលក្នុងការប្រើប្រាស់ថាមពលស្អាតនៅកម្ពុជា ។ ការងាកមកប្រើថាមពលស្អាត និងមិនអាចសម្រេចបានឡើយ ប្រសិនបើគ្មានការចូលរួមចំណែកពីទាំងអស់គ្នា ដូច្នេះយើងម្នាក់ៗគួរចូលរួមឲ្យបានគ្រប់ៗគ្នា ។
គួរកត់សម្គាល់ថា ក្នុងរយៈពេលមួយឆ្នាំកន្លងទៅនេះ កម្ពុជាបានងាកទៅរកប្រភពថាមពលស្អាត ដើម្បីឆ្លើយតបនឹងតម្រូវការអគ្គិសនីរបស់ខ្លួន ។ បច្ចុប្បន្នកម្ពុជាបានអនុម័តគម្រោងរោងចក្រអគ្គិសនីដើរដោយពន្លឺព្រះអាទិត្យធំៗចំនួនពីរ គម្រោងថាមពលអគ្គិសនីដើរដោយពន្លឺព្រះអាទ្យិដែលមានអានុភាពផ្គត់ផ្គង់សរុបជាង ៤១០មេហ្កាវ៉ាត់ និងគម្រោងថាមពលខ្យល់ដែលមានអានុភាពផ្គត់ផ្គង់សរុបជាង៨០មេហ្កាវ៉ាត់ ។
អាជ្ញាធរអគ្គិសនីកម្ពុជាក៏បានចេញសេចក្ដីព្រាងអត្រាថ្លៃអគ្គិសនីថ្មីដែលនឹងជំរុញឲ្យមានការកាត់បន្ថយថ្លៃថាមពលតាមរយៈការគ្រប់គ្រងតម្រូវការ និងរយៈពេលមានតម្រូវការគំហុក និងតាមរយៈការបើកផ្លូវប្រសើរជាងមុនឱ្យថាមពលពន្លឺព្រះអាទិត្យចូលរួមបង្កើនសមាមាត្រថាមពលបៃតងក្នុងវិស័យថាមពលរបស់នៅកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ