ប្រសិនបើអ្នកបូកទ្រព្យសម្បត្តិរបស់មនុស្សដែលមានទ្រព្យសម្បត្តិច្រើនជាងគេទាំង ៥០ របស់កូរ៉េខាងត្បូង អ្នកនឹងទទួលបាន ១១០ប៊ីលានដុល្លារ។ ចំនួននេះអាចនឹងច្រើនសម្រាប់អ្នក តែបើធៀបនឹងឆ្នាំ ២០១៨ ចំនួននេះបានធ្លាក់ចុះដល់ទៅ ១៧% ព្រោះតែឥទ្ធិពលពីសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិន ដែលបង្កឲ្យមហាសេដ្ឋីធំៗមើលឃើញទ្រព្យសម្បត្តិខ្លួនធ្លាក់ចុះ។ប៉ុន្តែតើនរណាខ្លះជាមហាសេដ្ឋីដែលមានទ្រព្យសម្បត្តិច្រើនជាងគេក្នុងកូរ៉េខាងត្បូង?
១. លោក លី គុនហ៊ី
លោក លី គុនហ៊ី (Lee Kun-hee) គឺជាបុរសដែលល្បីឈ្មោះ និងមានឥទ្ធិពលច្រើនជាងគេក្នុងកូរ៉េខាងត្បូងដែលមានទ្រព្យសម្បត្តិប្រមាណ១៦.៨ប៊ីលានដុល្លារ។ លោកជាអគ្គនាយកជំនាន់ទី៣របស់ក្រុមហ៊ុន Samsung Group ដែលតំណាង ២០%នៃសេដ្ឋកិច្ចរបស់ប្រទេសទាំងមូល។ នៅឆ្នាំ ២០១៨ ក្រុមហ៊ុននេះរកប្រាក់ចំណូលបាន ២១៨ប៊ីលានដុល្លារ និងប្រាក់ចំណេញប្រមាណ៥០ប៊ីលានដុល្លារផងដែរ។ ពាក្យចចាមអារ៉ាមទាក់ទិននឹងមូលនិធិសម្ងាត់បានធ្វើឲ្យលោកចុះចេញពីតំណែងក្នុងកំឡុងឆ្នាំ ២០០៨ ទៅ ២០១០ ហើយនៅឆ្នាំ ២០១៤ លោកត្រូវបានបញ្ជូនទៅមន្ទីរពេទ្យនិងបន្តការស្នាក់នៅទីនោះបន្ទាប់ពីមានជម្ងឺគាំងបេះដូង។
២. លោក សូ ជុងជីន
លោក លោក សូ ជុងជីន (Seo Jung-jin) មើលឃើញទ្រព្យសម្បត្តិធ្លាក់ចុះពី១១ប៊ីលានដុល្លារមក ៧.៤ប៊ីលានដុល្លារក្នុងឆ្នាំនេះ។ លោកជាស្ថាបនិក និងនាយកប្រតិបត្តិរបស់ក្រុមហ៊ុន Celltrion គ្រប់គ្រង Celltrion Healthcare ដែលផលិតឱសថសម្រាប់ជម្ងឺសាច់ដុះ មហារីកសុដន់ និងមេរោគគ្រុនផ្តាសាយធំជាដើម ។
៣. លោក គីម ជុងជូ
លោកគីម ជុងជូ (Kim Jung-ju) ជាសហគ្រិន វិនិយោគិន និងស្ថាបនិកក្រុមហ៊ុនបង្កើតហ្គេម Nexon។ សព្វថ្ងៃលោកមានតំណែងជានាយកប្រតិបត្តិរបស់ក្រុមហ៊ុន NXC Corporation និងមានទ្រព្យសម្បត្តិប្រមាណ ៦.៣ប៊ីលានដុល្លារ។
៤. លោក ជេយ លី
លោកជេយ លី (Jay Y. Lee) ជាកូនប្រុសតែមួយគត់របស់លោកលី គុនហ៊ី ដែលបកស្រាយពីទ្រព្យសម្បត្តិសរុបប្រមាណ៦.១ប៊ីលានដុល្លាររបស់លោក។ លោកត្រូវបានហ្វឹកហាត់តាំងពីតូចដើម្បីបន្តតំណែងជាអគ្គនាយកក្រុមហ៊ុន Samsung ហើយលោកបានកាន់តំណែងជាអនុប្រធានក្រុមហ៊ុន Samsung Electronics តាំងពីឆ្នាំ ២០១៣។ នៅឆ្នាំ ២០១៧ លោកត្រូវជាប់ពន្ធនាគារព្រោះតែការសូកប៉ាន់ តែត្រូវបានចេញពីពន្ធនាគារវិញនៅខែកុម្ភៈឆ្នាំ ២០១៨ ៕ កែសម្រួលដោយ ៖ សុឃាក់
ចែករំលែកព័តមាននេះ