រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា កម្មករឃ្លាំងអេតចាយ២នាក់ បានបង្កើតការភ្ញាក់ផ្អើលមួយដោយបានដឹកសំរាមយកទៅដុតក្បែរភូមិមួយ បង្កឲ្យមានផ្សែងហុយឡើងលើខ្មួលខ្មាញ់ ហើយមើលពីចម្ងាយទៅហាក់បីដូចជាផ្សែងភ្លើងកំពុងតែឆេះផ្ទះអញ្ចឹង ។ ហេតុការណ៍នេះបានកើតឡើងកាលពីម៉ោង៨និង១០នាទីព្រឹក ថ្ងៃទី១ ខែវិច្ឆិកា ឆ្នាំ២០១៩ នៅតាមផ្លូវរថភ្លើងខ្សែភ្នំពេញ-កំពត ស្ថិតនៅក្បែរភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ ។
សេចក្តីរាយការណ៍បន្តថា ក្មេងប្រុសទាំង២នាក់ខាងលើនេះ មិនត្រូវបានឱ្យស្គាល់ឈ្មោះនោះទេ គ្រាន់តែដឹងថា ជាកម្មករឃ្លាំងអេតចាយនៅជិតនោះផងដែរ។
បើតាមនគរបាលប៉ុស្តិ៍សំរោងក្រោម និយាយថា មុនពេលកើតហេតុ នៅព្រឹកថ្ងៃទី១ ខែវិច្ឆិកា នេះ ខណៈនៅសុខៗស្រាប់តែមានផ្សែងហ៊ុយយ៉ាងខ្មួលខ្មាញ់នៅត្រង់ចំណុចក្បែរភូមិចែងម៉ែង សង្កាត់សំរោងក្រោម ដែលមើលពីចម្ងាយមិនបានដឹងថា ជាផ្សែងឆេះអ្វីឲ្យពិតប្រាកដឡើយ។ ពេលនោះបានធ្វើឲ្យមានការព្រួយបារម្ភបំផុត ខ្លាចជាឧប្បត្តិហេតុឆេះផ្ទះ ឬទីតាំងក្រុមហ៊ុន រោងចក្រ សហគ្រាស ក៏មានស្រែកប្រកាសតាមវិទ្យុទាក់ទងសុំឲ្យកម្លាំងនគរបាលដែលនៅជិតនោះ ចុះទៅពិនិត្យមើលភ្លាមៗដែរ។
ប្រភពដដែលបន្តថា លុះពេលកម្លាំងទៅដល់ ស្រាប់តែបានឃើញមានកម្មករឃ្លាំងអេតចាយ២នាក់ កំពុងនាំគ្នាដុតសំរាមសោះ ហើយពេលនោះនគរបាលរូបនេះ ក៏បានរាយការណ៍ជូនទៅថ្នាក់លើរបស់ខ្លួនទៅតាមទិដ្ឋភាពជាក់ស្ដែង។
ប្រភពខាងលើបានបន្តថា សំរាមដែលអ្នកទាំង២នាក់ កំពុងដុតនោះរួមមាន ស្នោរ កម្ទេចកម្ទីរជ័រ និងធុងប្រេង ដែលបានដឹកយកចេញពីទីតាំងឃ្លាំងអេតចាយមួយកន្លែង ដើម្បីយកទៅដុតចោលនៅទីនោះ ដោយពួកគេមិនបានគរទុកម្ដុំ រង់ចាំរថយន្តដឹកសំរាមទៅប្រមូលដកចេញនោះឡើយ។ បន្ទាប់ពីឃើញបែបនេះ នគរបាលមិនបានឃាត់ខ្លួនអ្នកទាំង២នាក់នេះទេ គឺគ្រាន់តែឲ្យពួកគេឈប់ដុត និងធ្វើការអប់រំ ថ្ងៃក្រោយមិនឲ្យដុតសំរាមផ្ដេសផ្ដាសបែបនេះទៀតឡើយ។
នគរបាលប៉ុស្តិ៍សំរោងក្រោម បានបញ្ជាក់ថា សព្វថ្ងៃនេះ អាជ្ញាធរ និងសមត្ថកិច្ចមូលដ្ឋានមានការចាប់អារម្មណ៍ខ្លាំងណាស់ និងត្រៀមអន្តរាគមន៍ទប់ស្កាត់ ព្រមទាំងដាស់តឿននិងផ្សព្វផ្សាយឲ្យប្រជាពលរដ្ឋ និងបណ្ដាក្រុមហ៊ុនរោងចក្រសហគ្រាសទាំងឡាយបង្កើនការប្រុងប្រយ័ត្នខ្ពស់បំផុត ចំពោះគ្រោះអគ្គិភ័យដែលតែងកើតឡើងជាយថាហេតុ។
ជាពិសេសមានការចាប់អារម្មណ៍បំផុតនៅពេលបានឃើញមានផ្សែងហុយចេញពីកន្លែងណាមួយ អាជ្ញាធរ និងសមត្ថកិច្ចបានសម្រុកទៅទាល់តែដល់គោលដៅនោះ និងពិនិត្យមើលឲ្យឃើញជាក់ស្ដែងទើបអស់ចិត្ត ព្រោះខ្លាចជាផ្សែងភ្លើងដែលឆាបឆេះផ្ទះសម្បែងប្រជាពលរដ្ឋ ឬក្រុមហ៊ុន រោងចក្រ សហគ្រាសផ្សេងៗ។ (កែសម្រួលដោយ ៖ បុប្ផា)
ចែករំលែកព័តមាននេះ