ខេត្តកែប ៖ អាជ្ញាធរខេត្តកែបមានមន្ត្រីនគរបាលទេសចរណ៍ មានមន្ត្រីនគរបាលប្រចាំការផ្សារក្ដាម និងមន្ត្រីមកពីឧស្សាហកម្ម និងសិប្បកម្មខេត្តកែប កាលពីព្រឹកថ្ងៃទី៣០ ខែតុលានេះ ចុះមកប្រកាសប្រាប់អាជីវកលក់ដូរគ្រឿងសមុទ្រនៅផ្សារក្ដាមទាំងអស់ ប្រមូលជញ្ជីងយកមកធ្វើការត្រួតពិនិត្យសារជាថ្មី…
ខេត្តកែប ៖ អាជ្ញាធរខេត្តកែបមានមន្ត្រីនគរបាលទេសចរណ៍ មានមន្ត្រីនគរបាលប្រចាំការផ្សារក្ដាម និងមន្ត្រីមកពីឧស្សាហកម្ម និងសិប្បកម្មខេត្តកែប កាលពីព្រឹកថ្ងៃទី៣០ ខែតុលានេះ ចុះមកប្រកាសប្រាប់អាជីវកលក់ដូរគ្រឿងសមុទ្រនៅផ្សារក្ដាមទាំងអស់ ប្រមូលជញ្ជីងយកមកធ្វើការត្រួតពិនិត្យសារជាថ្មី បន្ទាប់ពីមានភ្ញៀវជាតិ និងអន្តរជាតិចូលទៅទិញគ្រឿងសមុទ្រ ហើយអ្នកលក់បានថ្លឹងបង្គា ក្ដាម មិនបានគ្រប់ភ្នែកជញ្ជីង ឬគ្រប់គីឡូ ។
លោកប៊ុន យោង ប្រធានមន្ទីរឧស្សាហកម្ម និងសិប្បកម្មខេត្តកែបបាននិយាយប្រាប់ឲ្យដឹងថា ការប្រមូលជញ្ជីងអ្នកលក់ដូរនៅក្នុងផ្សារក្ដាមទាំងអស់ឲ្យពួកគាត់រួតរះប្រញាប់យកមកធ្វើការពិនិត្យឲ្យបានត្រឹមត្រូវ ចៀសវាងថ្លឹងគ្រឿងសមុទ្រដូចជា ត្រី បង្គា ក្ដាម លក់ឲ្យភ្ញៀវហើយមិនគ្រប់គីឡូធ្វើឲ្យជះឥទ្ធិពលដ៏អាក្រក់សម្រាប់ខេត្តកែប ។
លោកបាននិយាយប្រាប់ឲ្យដឹងថា កន្លងមកពិតជាមានរឿងនេះកើតមែន ប៉ុន្តែមិនជាទូទៅទេ ព្រោះអ្នកលក់ខ្លះមានគំនិតមិនល្អ ។ លោកប៊ុន យោង ប្រធានមន្ទីរឧស្សាហកម្ម និងសិប្បកម្មបានប្រាប់ឲ្យដឹងទៀតថា ចាប់ពីពេលនេះទៅ មានមន្ត្រីជំនាញរបស់មន្ទីរសហការជាមួយនគរបាលក្រុងចាប់ត្រួតពិនិត្យជញ្ជីង និងបិតសញ្ញាសម្គាល់ជញ្ជីងណា ដែលបានពិនិត្យរួចហើយ និងហាមយកជញ្ជីងតូចយួរដៃមិនឲ្យមានប្រើឡើយនៅផ្សារក្ដាម ។
ខណៈពេលកំពុងប្រកាសហៅអាជីវកលក់ដូរនៅផ្សារក្ដាមឲ្យយកជញ្ជីងមកពិនិត្យ ស្រាប់តែជនជាតិចិនម្នាក់ទិញបង្គាមួយគីឡូមកស្ងោរ ស្រាប់តែស្ងោរហើយបាត់អស់កន្លះគីឡូ តែភ្លាមៗនោះលោកប្រធានមន្ទីរ និងនគរបាលបានជួបជនជាតិចិនរូបនោះទៅដល់កន្លែងលក់ និងដកហូតជញ្ជីងអ្នកលក់បង្គានោះឡើង ។
អាជីវកម្នាក់ឈ្មោះ អាល់ហ្វា ភេទប្រុស អាយុ៣១ឆ្នាំ ខ្មែរអីស្លាមលក់បង្គា ត្រី និងក្ដាមនិយាយប្រាប់ឲ្យដឹង នៅព្រឹកថ្ងៃទី៣០ ខែតុលានេះថា ការចុះត្រួតពិនិត្យជញ្ជីងថ្លឹងគ្រឿងសមុទ្រនៅផ្សារក្ដាមពិតជាមានសារៈសំខាន់ណាស់ ទី១- ឲ្យអ្នកលក់ដូរផ្សេងៗថ្លឹងរបស់ឲ្យភ្ញៀវបានគ្រប់គីឡូ ។
អាជីវករលក់គ្រឿងសមុទ្រនៅផ្សារក្ដាមនិយាយថា ខ្លួនគាត់ជាអ្នកត្រឹមត្រូវតាមតម្លៃ តែមិនសូវដាច់ តែអ្នកផ្សេងលក់ដាច់ជាងគាត់ ដោយសាតែក្ដាមមួយគីឡូគេស៊ីភ្នែកជញ្ជីងអស់៤ខាំរួចទៅហើយ ។ អាជីវករូបនេះសំណូមពរឲ្យមន្ទីរជំនាញ និងនគរបាលខេត្ត និងក្រុងបន្តធ្វើការរឿងជញ្ជីងនេះរហូត ។
លោកវរៈសេនីយទោ ភោគ សំអុន ប្រធានការិយាល័យនគរបាលទេសចរណ៍ និងប្រធានក្រុមចំរុះនគរបាលខេត្តការពារផ្សារក្ដាមនិយាយថា លោកឧត្តមសេនីយស្នងការនគរបាលខេត្តកែបលោកបានដាក់បទបញ្ជារួចហើយ នគរបាលត្រួតពិនិត្យរឿងជញ្ជីងថ្លឹងគ្រឿងសមុទ្រនៅផ្សារក្ដាមថ្លឹងឲ្យភ្ញៀវមិនបានគ្រប់គីឡូធ្វើឲ្យប៉ះពាល់ដល់វិស័យទេសចរណ៍នៅខេត្តកែប ។
លោកប្រធានការិយាល័យនគរបាលទេសចរណ៍រូបនេះបានប្រាប់ឲ្យដឹងថា ជញ្ជីងអាជីវករលក់ដូនៅផ្សារក្ដាមចំនួន៨០០ ត្រូវបានពិនត្យ និងជញ្ជីងមិនប្រក្រតីចំនួន៦ត្រូវបានដកពីអាជីវករហើយដែរ ៕ កែសម្រួលដោយ ៖ សុឃាក់
ចែករំលែកព័តមាននេះ