ខេត្តកោះកុង ៖ ថ្មីៗនេះ មានសេចក្តីរាយការណណ៍មកថា មានក្រុមហ៊ុនមួយ ដែលកំពុងតែធ្វើអាជីកម្មបូមខ្សាច់សំណង់ដោយបំពានក្នុងតំបន់មួយដែលគេថា ជាតំបន់ប្រភេទសត្វអណ្តើកកម្ររស់នៅ (អណ្តើកហ្លួង) ស្ថិតក្នុងដងព្រែកស្រែអំបិល ត្រង់ចំណុចភូមិព្រះអង្គកែវ…
ខេត្តកោះកុង ៖ ថ្មីៗនេះ មានសេចក្តីរាយការណណ៍មកថា មានក្រុមហ៊ុនមួយ ដែលកំពុងតែធ្វើអាជីកម្មបូមខ្សាច់សំណង់ដោយបំពានក្នុងតំបន់មួយដែលគេថា ជាតំបន់ប្រភេទសត្វអណ្តើកកម្ររស់នៅ (អណ្តើកហ្លួង) ស្ថិតក្នុងដងព្រែកស្រែអំបិល ត្រង់ចំណុចភូមិព្រះអង្គកែវ ឃុំបឹងព្រាវ ស្រុកស្រែអំបឹល ខេត្តកោះកុង។
តាមប្រភពច្បាស់ការណ៍បានបង្ហើបប្រាប់ថា ការធ្វើអាជីវកម្មបូមខ្សាច់នៅតំបន់មួយនេះជារបស់សហគ្រាស លឹម បុក ខនស្ត្រាក់សិន មេធៀរៀល (ទិញ និងលក់គ្រឿងសំណង់) ដែលមានទីតាំងនៅភូមិស្រែអំបិល ឃុំស្រែអំបឹល ស្រុកស្រែអំបិល ខេត្តកោះកុង ដោយអះអាងថា មានច្បាប់ត្រឹមត្រូវ។
ហើយព្រែកស្រែអំបឹលនេះ ត្រូវបានគេដឹងជាយូរលង់ណាស់មកហើយថា មានពូជអំបូរសត្វអណ្តើកកម្រមួយប្រភេទឈ្មោះថា អណ្តើកហ្លួង ដែលច្បាប់ហាមមិនឱ្យធ្វើអាជីវកម្មទីនេះទេ។
រហូតមកដល់សព្វថ្ងៃ អំបូរសត្វអណ្តើកហ្លួងនេះ វាស្ទើរដាច់ពូជទៅហើយ ហើយនៅចំណុចខាងលើនៃព្រែកស្រែអំបឹល ត្រង់ទីតាំងអាជីវកម្មរបស់សហគ្រាស លឹម បុក ខនស្ត្រាក់សិន មេធៀរៀល (ទិញ និង លក់គ្រឿងសំណង់) កំពុងបូមដឹកបង្កផលប៉ះពាល់យ៉ាងខ្លាំង ធ្វើឱ្យទីតាំងរស់នៅសត្វអណ្តើកដ៏កម្រមួយនេះ វានឹងវិនាសនាពេលឆាប់ៗ នេះមិនទាន់និយាយដល់ផល់ប៉ះពាល់ជីវចំរុះទូទៅផង។
យោងតាមប្រភពពីប្រជាពលរដ្ឋដែលរស់នៅក្នុងភូមិព្រះអង្គកែវ បានឱ្យដឹងថា សហគ្រាសមួយនេះ បានអនុញ្ញាត្តិឱ្យសាឡង់វៀតណាម ចូលបូម ហើយដឹកយ៉ាងអានាធិបតេយ្យ ។
ហើយកន្លងមក ធ្លាប់មានក្រុមហ៊ុនជាច្រើនក្នុងស្រុក និងក្រៅស្រុក មានចំណាប់អារម្មណ៍ចង់បានចំណុចនៃទីតាំងនេះ មកធ្វើអាជីវកម្មខ្សាច់សំណង់ដែរ ប៉ុន្តែពួកគេទទួលព័ត៌មានថា ទីតាំងនោះបើសុំការអនុញ្ញាតិ ក៏មិនបានដែរ ដោយហេតុថា មានការប៉ះពាល់បរិស្ថានយ៉ាងខ្លាំង គឺជាទីកន្លែងសត្វអណ្តើកហ្លួងពងកូន ឬបន្តពូជ។
ប៉ុន្តែមិនដឹងមូលហេតុអ្វីទេ ស្រាប់តែមានក្រុមហ៊ុនមួយឈ្មោះសហគ្រាស លឹម បុក ដូចជាមានសំណាងណាស់ បានទទួលសិទ្ធិបូមខ្សាច់តំបន់ប្រជែងគ្នាចង់បាននេះទៅវិញ?
ប្រការនេះហើយ ធ្វើឱ្យក្រុមហ៊ុនដែលសុំមុនៗថ្នាំងថ្នាក់ខ្លាំងណាស់ ព្រមទាំងបានចោទប្រកាន់ថា ក្រុមហ៊ុន លឹម បុក បើកដៃឱ្យសាឡង់វៀតណាមមកដឹកខ្សាច់យ៉ាងអនាធិបតេយ្យបំផុត ។
ចែករំលែកព័តមាននេះ