ខេត្តកំពង់ស្ពឺ ៖ ផ្ទះធ្វើពីឈើប្រក់ស័ង្កសីមួយខ្នង ត្រូវបានព្រះអគ្គីឆេះអស់គ្មានសល់ ដោយសារស្នាដៃរបស់បុរសជាប្តី ដែលមានកំហឹងទប់មិនជាប់ ក្រោយឈ្លោះជាមួយប្រពន្ធ សូម្បីគោ២ក្បាលនៅក្នុងក្រោលដែលជាប់ចំណងនៅក្រោមផ្ទះដូចដុតទាំងរស់ ព្រមទាំងខូចខាតសម្ភារប្រើប្រាស់មួយចំនួនធំ ចំណែកប្រពន្ធរត់ចុះដីទាន់ពេល…
ខេត្តកំពង់ស្ពឺ ៖ ផ្ទះធ្វើពីឈើប្រក់ស័ង្កសីមួយខ្នង ត្រូវបានព្រះអគ្គីឆេះអស់គ្មានសល់ ដោយសារស្នាដៃរបស់បុរសជាប្តី ដែលមានកំហឹងទប់មិនជាប់ ក្រោយឈ្លោះជាមួយប្រពន្ធ សូម្បីគោ២ក្បាលនៅក្នុងក្រោលដែលជាប់ចំណងនៅក្រោមផ្ទះដូចដុតទាំងរស់ ព្រមទាំងខូចខាតសម្ភារប្រើប្រាស់មួយចំនួនធំ ចំណែកប្រពន្ធរត់ចុះដីទាន់ពេល បានតែមួយចង្កេះជាប់ខ្លួនប៉ុណ្ណោះ ។
រឿងរ៉ាវដុតផ្ទះនេះ បានកើតឡើងកាលពីវេលាម៉ោង១៨និង៣០នាទីថ្ងៃទី២៩ តុលានៅភូមិវល្លិប្រេង ឃុំកាហែង ស្រុកសំរោងទង ។ប្តីដ៏អស្ចារ្យនេះឈ្មោះ ភឿន សម្ភស្ស អាយុ២២ឆ្នាំ និងប្រពន្ធឈ្មោះ អុីម ហេម អាយុ១៩ឆ្នាំ ។
ប្រភពពីសមត្ថកិច្ចបានឱ្យដឹងថា ហេតុការណ៍ប្តីដុតផ្ទះ ក្រោយពេលមានការឈ្លោះប្រកែកជាមួយប្រពន្ធ បណ្តាលឱ្យឆេះផ្ទះដែលមានទំហំ៥ម៉ែត្រគុណនឹង៦ម៉ែត្រ ធ្វើអំពីឈើប្រក់ស័ង្កសី សង់ផុតដី(ផ្ទះខ្ពស់) ឆេះគ្រែ២ ពូក១ ទូឈើ១ ងាប់គោ២ក្បាល និងសម្ភារប្រើប្រាស់ក្នុងផ្ទះមួយចំនួនទៀត ស្ទើរគ្មានសល់អ្វីទេ សូម្បីកណ្តុរក៏គ្មានសល់ដែរ ។
មូលហេតុដែលជំរុញឱ្យបុរសជាប្តីដុតបំផ្លាញផ្ទះខ្លួនឯងនេះ ត្រូវបានប្រភពនានាថា មកពីទំនាស់ក្នុងគ្រួសារ ។ ក្រោយកើតហេតុសមត្ថកិច្ចបានឃាត់ខ្លួនប្តីឈ្មោះ ភឿន សម្ភស្ស នាំទៅសាកសួរនិងចាត់វិធានការតាមផ្លូវច្បាប់ ។ សូមបញ្ជាក់ថា ប្តីប្រពន្ធនេះទើបតែរៀបការមិនទាន់បាន១ឆ្នាំផង ហើយក៏មិនទាន់មានកូន
ដែរ ។
បន្ទាប់ពីមានភ្លើងឆេះផ្ទះ សមត្ថកិច្ចប្រើប្រាស់រថយន្ដពន្លត់អគ្គិភ័យចំនួន៥គ្រឿង ធ្វើអន្តរាគមន៍ ក្នុងនោះរថយន្ដស្រុកសំរោងទង១គ្រឿង រថយន្ដស្រុកភ្នំស្រួច១គ្រឿង រថយន្ដការិយាល័យពន្លត់អគ្គិភ័យ៣គ្រឿង ដោយប្រើប្រាស់ទឹកអស់១រថយន្ដក៏រលត់ទៅ ៕
ចែករំលែកព័តមាននេះ