ប្រទេសជប៉ុន ៖ កីឡាករកីឡាការិនីប្រដាល់សាកលកម្ពុជាចំនួន៣រូប ដែលទៅធ្វើការហ្វឹក ហាត់នៅប្រទេសជប៉ុន មានការរីកចម្រើនខ្លាំង ។ នេះបើតាមការឱ្យដឹងពីលោក វ៉ែន សុផល គ្រូបង្វឹក
ជម្រើសជាតិដែលកំពុងស្ថិតនៅទីក្រុងអូសាកា ប្រទេសជប៉ុន ។
គួររំឭកថា កីឡាករកីឡាការិនីកម្ពុជាចំនួន៣ រូប និងគ្រូបង្វឹក១រូប ត្រូវបានបញ្ជូនឱ្យទៅហ្វឹក ហាត់នៅប្រទេសជប៉ុនរយៈពេលជិត១ខែមកហើយ ដើម្បីត្រៀមប្រកួតកីឡាស៊ីហ្គេមលើកទី៣០នៅប្រទេសហ្វ៊ីលីពីននាចុងឆ្នាំនេះ ហើយនិងបន្តហ្វឹកហាត់សម្រាប់ប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។ កីឡាករកីឡាការិនីប្រដាល់សាកលកម្ពុជាទាំង៣រូបនោះមាន កីឡាករ ណាត សៀកងិន ដែលគេស្គាល់ថា ពេជ្រ ម្ទេសខ្មាំង កីឡាកររិនី វី ស្រីខួច និងកីឡាការិនី នៅ ស្រីពៅ ។
លោក វ៉ែន សុផល ឱ្យដឹងទៀតថា អ្នកទាំង៣រូបនោះកំពុងខិតខំប្រឹងប្រែងហ្វឹកហាត់យ៉ាងខ្លាំង ជាពិសេសហ្វឹកហាត់ផ្នែកកម្លាំង ។ ម្យ៉ាង វិញទៀត អំឡុងពេលកំពុងហ្វឹកហាត់នេះ ពួកគេថែមទាំងមានឱកាសធ្វើការប្រកួតសាកល្បងដោយផ្ទាល់ជាមួយកីឡាករជប៉ុននៅតាមក្លិបនានាក្នុងទីក្រុងអូសាកាទៀតផង ។
តាមរយៈការប្រកួតនេះទៀតសោត លោកសង្កេតឃើញថាពួកគេពិតជាមានការរីកចម្រើនខ្លាំងហួសពីការរំពឹងទុកទៅទៀត ទាំងកម្លាំង ទាំងបច្ចេកទេស ជាពិសេសបច្ចេកទេស និងល្បិចវាយលុកទៅលើគូប្រកួត គឺបានល្អនិងលឿនជាងមុនឆ្ងាយ ហើយថែមទាំងចេះការពារខ្លួនបានល្អទៀតផង ។
កីឡាករកីឡាការិនីប្រដាល់សាកលកម្ពុជាទាំង៣រូបនេះ ហ្វឹកហាត់រហូតដល់ថ្ងៃចេញទៅ ប្រកួត ហើយចេញដំណើរពីប្រទេសជប៉ុនទៅ កាន់ប្រទេសហ្វ៊ីលីពីនតែម្ដង ។ ទោះជាយ៉ាង ណា លោកមានការជឿជាក់យ៉ាងខ្លាំងថា ពួកគេទាំង៣នាក់នឹងមានឱកាសដណ្ដើមយកមេដាយមកជូនជាតិឱ្យទាល់តែបាន ៕ (កែសម្រួលដោយ ៖ បុប្ផា)
ចែករំលែកព័តមាននេះ