ខេត្តព្រះសីហនុ ៖ ឧកញ៉ា ទៀ វិចិត្រ ដែលអ្នករស់នៅខេត្តមាត់សមុទ្រនិងអ្នកលេងហ្វេសប៊ុកបានស្គាល់យ៉ាងច្បាស់ថា លោកជាឧកញ៉ាចិត្តធម៌ម្នាក់ តែងតែជួយយកអាសាអ្នកក្រីក្រទន់ខ្សោយនោះ ពេលនេះលោកបានសម្រេចចូលរួមដោយផ្ទាល់ ព្រមទាំងបញ្ជូនអូប័រចំនួន៦គ្រឿង…
ខេត្តព្រះសីហនុ ៖ ឧកញ៉ា ទៀ វិចិត្រ ដែលអ្នករស់នៅខេត្តមាត់សមុទ្រនិងអ្នកលេងហ្វេសប៊ុកបានស្គាល់យ៉ាងច្បាស់ថា លោកជាឧកញ៉ាចិត្តធម៌ម្នាក់ តែងតែជួយយកអាសាអ្នកក្រីក្រទន់ខ្សោយនោះ ពេលនេះលោកបានសម្រេចចូលរួមដោយផ្ទាល់ ព្រមទាំងបញ្ជូនអូប័រចំនួន៦គ្រឿង រួមសហការជាមួយកម្លាំងសមត្ថកិច្ច ក្នុងការស្វែងរកស្ត្រីជនជាតិអង់គ្លេសដែលបាត់ខ្លួននៅកោះរ៉ុងសន្លឹម ដែលរហូតមកដល់ល្ងាច
ថ្ងៃទី២៩ ខែតុលា នៅតែរកមិនទាន់ឃើញនៅឡើយក្រោយពីរុករកអស់រយៈពេល៥ថ្ងៃកន្លងមក ។
លោកឧកញ៉ា ទៀ វិចិត្រ បានបង្ហោះសារក្នុងហ្វេសប៊ុករបស់លោកថា «ដើម្បីរួមចំណែកស្វែងរកស្ត្រីជនជាតិអង់គ្លេសឈ្មោះ Amelia Bambridge ដែលបាត់ខ្លួន ខ្ញុំសូមចូលរួមដោយផ្ទាល់ ព្រមទាំងបញ្ជូនអូប័រចំនួន៦គ្រឿង សម្រាប់រួមសហការជាមួយកម្លាំងសមត្ថកិច្ច ក្នុងការស្វែងរកស្ត្រីជនជាតិអង់គ្លេសនេះ ដែលបាត់ខ្លួនតាំងពីថ្ងៃទី២៤ ខែតុលា ឆ្នាំ២០១៩ ឱ្យអស់ពីលទ្ធភាពនូវអ្វីដែលខ្ញុំអាចធ្វើបាន»។
យោងតាមសេចក្តីរាយការណ៍ព័ត៌មាន សម្រាប់ការរុករកនៅថ្ងៃទី២៩ តុលា បើតាមមន្ត្រីរដ្ឋបាលក្រុងកោះរ៉ុងឱ្យដឹងថា គិតត្រឹមល្ងាចថ្ងៃ២៩ ខែតុលា ការស្វែងរកស្ត្រីជនជាតិអង់គ្លេសមួយរូប ដែលបាត់ខ្លួននៅកោះរ៉ុងនោះ មិនទាន់ប្រទះឃើញនៅឡើយទេ ហើយកម្លាំងសមត្ថកិច្ចចម្រុះគ្រប់ផ្នែក រួមជាមួយក្រុមអ្នកស្ម័គ្រចិត្តផង កំពុងធ្វើប្រតិបត្តិការស្វែងរកបន្តដោយថ្មើរជើងនៅលើដីគោកក្នុងតំបន់ព្រៃភ្នំផង ក្នុងនោះមានការប្រើប្រាស់កាមេរ៉ាដ្រូនពីលើអាកាស ហើយនៅក្នុងទឹកក្បែរឆ្នេរសមុទ្រក៏មានក្រុមអ្នកមុជទឹកស្វែងរកដែរ ។
ស្ត្រីជនជាតិអង់គ្លេសដែលបាត់ខ្លួននេះ ឈ្មោះAmelia Bambridge អាយុ២១ឆ្នាំ ដែលយោងតាមរបាយការណ៍ពីសមត្ថកិច្ចបញ្ជាក់ថា បានបាត់ដំណឹងក្នុងភូមិសាស្ត្រក្រុងកោះរ៉ុង ចាប់ពីវេលាម៉ោងជិត៤ទៀបភ្លឺថ្ងៃទី២៤ ខែតុលា ឆ្នាំ២០១៩ ដែលមិនទាន់ដឹងថាជាការវង្វេងដូចករណីជនបរទេសខ្លះដែលធ្លាប់វង្វេងបាត់ក្នុងព្រៃលើកោះកន្លងមក ឬដោយហេតុការណ៍ណាមួយនៅឡើយ ដែលអ្នកខ្លះដាក់ការសង្ស័យពីឧប្បត្តិហេតុលង់ទឹកសមុទ្រ ។នៅថ្ងៃនោះដែរ នៅលើបណ្តាញសង្គមមានការបង្ហាញវីដេអូឃ្លីបនានាដែលគេថតបានដោយចៃដន្យ មុនពេលស្ត្រីរូបនេះបាត់ខ្លួន ៕
ចែករំលែកព័តមាននេះ