រាជធានីភ្នំពេញ៖ គម្រោងស្តីពីការបែងចែកដីសង្គមកិច្ច និងការអភិវឌ្ឍសេដ្ឋកិច្ចជំហាន២ឬហៅថា LASED II ដែលទទួលបានថវិកាគាំំទ្រពីរាជរដ្ឋាភិបាលនិងដៃគូអភិវឌ្ឍន៍ប្រមាណ២៥លានដុល្លារអាមេរិកសម្រាប់អនុវត្តគម្រោងរយៈពេល៥ឆ្នាំចាប់ពីឆ្នាំ២០១៧ដល់២០២៣ ធ្វើឱ្យក្រុមប្រជាពលរដ្ឋ (សម្បទានិក) កំពុងអនុវត្តគម្រោងទទួលបានចំណូលផ្គត់ផ្គង់គ្រួសារកាន់តែរឹងមាំ ខណៈបច្ចុប្បន្នខេត្តចំនួន៥កំពុងអនុវត្ត។
ថ្លែងប្រាប់រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទនិងដៃគូគាំំទ្រគម្រោង LASED II កាលថ្មីៗនេះលោក ខាន់ ចំណាន អភិបាលរងនៃគណៈអភិបាលខេត្តក្រចេះ និងជាប្រធានគ្រប់គ្រងគម្រោង LASED II ប្រចាំខេត្តក្រចេះមានប្រសាសន៍ថា រាជរដ្ឋាភិបាលបានអនុម័តផ្តល់ដីសម្បទានសង្គមកិច្ចចំនួន ៣. ២៩៤ហិកតា ជូនដល់ឃុំសំបុក បច្ចុប្បន្នមានសម្បទានិកចំនួន ៥៥៤គ្រួសារកំពុងរស់នៅ រីឯឃុំចង្ក្រង់ មានសម្បទានិកចំនួន ៣៣១គ្រួសារ កំពុងរស់នៅលើផ្ទៃដីជាង ៦១២ហិកតា។លោកបានបញ្ជាក់ថា «កាលពីឆ្នាំ២០១៨ គិតជាមធ្យម ប្រាក់ចំណូលប្រចាំគ្រួសារសម្បទានិកនៅឃុំទាំងពីរ ស្មើជាង ២. ៣០០ដុល្លារអាមេរិក ដែលចំណូលនេះបានមកពីប្រកបមុខរបបកសិកម្មដូចជា ការដាំដុះដំណាំបន្លែ ឈើហូបផ្លែ និងការចិញ្ចឹមសត្វ»។
លោក វេងសាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា ស្ថានភាពជីវភាពរបស់សម្បទានិកមានលក្ខណ:ល្អប្រសើរជាបន្តបន្ទាប់ តាមរយ:ការកើនឡើងនូវផលិតផលកសិកម្មដែលពួកគាត់បានធ្វើការដាំដុះដំណាំដូចជាស្វាយចន្ទី ដំឡូងមី បន្លែបង្កា និងការចិញ្ចឹមគោ និងមាន់លើដីដែលទទួលបានគឺជាចំណូលដ៏រឹងមាំ ហើយបានកែប្រែកម្រិតជីវភាពរបស់ពួកគាត់ពីមួយជំហានទៅមួយជំហាន ពីគ្រួសារគ្មានលទ្ធភាពទៅជាគ្រួសារដែលមានជីវភាពសមរម្យ មានអាហារូបត្ថម្ភគ្រប់គ្រាន់ និងអាចផ្តល់ឱកាសដល់កូនៗទៅសិក្សារៀនសូត្រ។
តាមលោករដ្ឋមន្ត្រីសង្ឃឹម និងជឿជាក់ថា ដោយមានការយកចិត្តទុកដាក់ និងគាំទ្រខ្ពស់ពីរាជរដ្ឋាភិបាល រួមជាមួយកិច្ចសហប្រតិបត្តិការយ៉ាងប្រសើរពីដៃគូអភិវឌ្ឍន៍តាមអភិក្រម “រដ្ឋ-ឯកជន-ដៃគូអភិវឌ្ឍន៍-និងសហគមន៍” គ្រួសារសម្បទានិកក៏ដូចជាប្រជាកសិករគ្រប់រូបនឹងអាចឈានឆ្ពោះទៅសម្រេចបាននូវចក្ខុវិស័យរបស់រាជរដ្ឋាភិបាលក្នុងការប្រែក្លាយប្រទេសជាតិទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ២០៣០ និងកម្រិតខ្ពស់នាឆ្នាំ ២០៥០។ទាមទារឲ្យគ្រប់តួអង្គពាក់ព័ន្ធបន្តចូលរួម សហការឲ្យបានពេញលេញ មានឆន្ទ: ឧត្តមគតិ និងភាពទទួលខុសត្រូវខ្ពស់ ធ្វើយ៉ាងណាឱ្យសម្បទានិកទាំងអស់មានឱកាស និងលទ្ធភាពគ្រប់គ្រាន់ក្នុងការលើកស្ទួយសេដ្ឋកិច្ចគ្រួសារ។ ទន្ទឹមនឹងនេះ មន្ទីរកសិកម្ម រុក្ខាប្រមាញ់ និងនេសាទខេត្តត្រូវបន្តផ្តល់បច្ចេកទេសកសិកម្មទំនើប ការធ្វើផលិតកម្មកសិកម្មតាមកិច្ចសន្យា ការធ្វើជីវៈសុវត្ថិភាពដល់សត្វរបស់ពួកគាត់ជាប្រចាំ និងជាពិសេសត្រូវជំរុញការបង្កាត់ពូជគោសប្បនិមិត្ត ដើម្បង្កើនប្រាក់ចំណូលគ្រួសារ។
តាមក្រសួងកសិកម្ម គោលបំណងចំបងរបស់គម្រោង LASED II នេះគឺដើម្បីជួយលើកកម្ពស់កម្រិតជីវភាពរបស់គ្រួសារក្រីក្រ និងងាយរងគ្រោះ ដែលគម្រោងនេះបានជួយគាំទ្រដល់គម្រោងសម្បទានដីសង្គមកិច្ចរបស់រាជរដ្ឋាភិបាលក្នុងការចែកដីឱ្យកសិករគ្មាន និងមានដីតិចតួចដើម្បីប្រកបរបបកសិកម្មចិញ្ចឹមគ្រួសារ។
គម្រោងបានអនុវត្តលើខេត្តគោលដៅចំនួន៥ មានខេត្តត្បូងឃ្មុំ, ក្រចេះ, កំពង់ឆ្នាំ, កំពង់ស្ពឺ និងកំពង់ធំ ដោយបានផ្តល់ប្រយោជន៍ជូន ៤. ៤៤១ គ្រួសារ តាមរយ:ការរៀបចំប្រព័ន្ធធារាសាស្ត្រខ្នាតតូច និងផ្តល់សេវាគាំទ្របច្ចេកទេសកសិកម្មមូលដ្ឋានដើម្បីកែលម្អកម្រិតជីវភាពតាមរយ:ការបង្កើនប្រាក់ចំណូល។ គម្រោងនេះមានរយ:ពេល ៥ឆ្នាំ ដោយចាប់អនុវត្តពីឆ្នាំ ២០១៧-២០២២ ថវិកាសរុប ២៥លានដុល្លារ ដែលជាជំនួយឧបត្ថម្ភគាំទ្របដិភាគរវាងរាជរដ្ឋាភិបាលកម្ពុជា និងធនាគារពិភពលោក៕ កែសម្រួលដោយ ៖ សុឃាក់
ចែករំលែកព័តមាននេះ