ខេត្តឧត្តរមានជ័យ ៖ ក្រុមអាជ្ញាធរថៃបានដោះលែងអ្នកទោសខ្មែរម្នាក់ចេញពីពន្ធធនាគាស្រុកខាន់តាឡាក់ ខេត្តស៊ីសាកេត ប្រទេសថៃ នាំខ្លួនយកមកប្រគល់ឱ្យក្រុមអាជ្ញាធរកម្ពុជាវិញតាមមាត់ច្រកទ្វារអន្តរជាតិជាំ កាលពីព្រឹកថ្ងៃទី២៨ ខែតុលា ឆ្នាំ២០១៩ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
អ្នកទោសខ្មែរដែលក្រុមអាជ្ញាធរថៃដោះលែងឈ្មោះ ណេវ ហៀង ភេទប្រុស អាយុ១៨ឆ្នាំ រស់នៅភូមិស្នួល ឃុំទ័ពមាន ស្រុកស្ពង ខេត្តកំពង់ស្ពឺ ក្រុមទាហានថៃចាប់ខ្លួនកាលពីថ្ងៃទី២០ ខែមិថុនា ឆ្នាំ២០១៧ ដោយចោទពីបទឆ្លងដែនកាប់ឈើគ្រញួងខុសច្បាប់ចូលតាមច្រកត្រពាំងបី ។
មន្ត្រីបម្រើការងារមាត់ច្រកទ្វារអន្តរជាតិជាំបានឱ្យដឹងថា ក្រោយពីបានទទួលអ្នកទោសខ្មែរពីក្រុមអាជ្ញាធរថៃរួចសមត្ថកិច្ចបានធ្វើការអប់រំ និងឱ្យធ្វើកិច្ចសន្យាបញ្ឈប់ឆ្លងដែនដោយខុសច្បាប់ចូលក្នុងទឹកដីថៃបន្តទៀត ខណៈនេះបានឱ្យទៅស្រុកកំណើតជួបជុំក្រុមគ្រួសារវិញនៅក្នុងថ្ងៃដដែល ៕
កែសម្រួលដោយ ៖ សំណាង
ចែករំលែកព័តមាននេះ