រាជធានីភ្នំពេញ ៖ រាជធានីភ្នំពេញបានកំណត់រយៈពេល៩ថ្ងៃ គឺចាប់ពីថ្ងៃទី៥ដល់ថ្ងៃទី១៣ ខែវិច្ឆិកា ត្រូវពង្រឹងសន្តិសុខខ្ពស់បំផុត ដើម្បីធានាបានសន្តិសុខសណ្តាប់ធ្នាប់ និងសុវត្ថិភាពសង្គមក្នុងឱកាសពិធីបុណ្យជាប់ៗគ្នានេះ ។
លោកកើត ឆែ និងលោកមាន ចាន់យ៉ាដា អភិបាលរងរាជធានីភ្នំពេញបានដឹកនាំកិច្ចប្រជុំនៅសាលារាជធានីភ្នំពេញ នាថ្ងៃទី២៨ តុលានេះ ដើម្បីបន្តពង្រឹងការយកចិត្តទុកដាក់ទាំងថ្នាក់ក្រុង, ខណ្ឌ, សង្កាត់, មន្ទីរអង្គភាពជុំវិញរដ្ឋបាលរាជធានីភ្នំពេញ សំដៅត្រៀមលក្ខណៈទទួលជាម្ចាស់ផ្ទះរៀបចំពិធីបុណ្យធំៗដូចជា បុណ្យឯករាជ្យជាតិ, បុណ្យអុំទូកជាដើមដែលនឹងធ្វើឡើងចាប់ពីថ្ងៃទី៩-១០-១១-១២ ខែវិច្ឆិកា ខាងមុខនេះ ។
កិច្ចប្រជុំបានផ្តោតទៅលើបញ្ហាសន្តិសុខសណ្តាប់ធ្នាប់របៀបរៀបរយក្នុងឱកាសបុណ្យជាតិដោយកំណត់យកថ្ងៃទី៥ដល់ថ្ងៃទី១៣ វិច្ឆិកា ត្រូវរឹតបណ្តឹងសន្តិសុខឲ្យបានម៉ឺងម៉ាត់បំផុតជាងពេលណាណាទាំងអស់។
ក្នុងនោះត្រូវរៀបចំឲ្យមានទីបញ្ជាការស្រាលនៅរដ្ឋបាលរាជធានីភ្នំពេញ, រៀបចំទីបញ្ជាការស្រាលនៅគ្រប់ខណ្ឌទាំង១៤ដើម្បីប្រចាំបញ្ជា និងត្រូវមានមុខមន្ត្រីរង់ចាំដោះស្រាយបញ្ហាបន្ទាន់ៗ ដោយចាប់ពីថ្ងៃទី១ វិច្ឆិកា តទៅ ហាមមន្ត្រីរាជការអវត្តមានពីកន្លែងធ្វើការ រួមទាំងអាជ្ញាធរដែនដីផងដែរ ។
លោកកើត ឆែ បានអោយដឹងថា ពិធីទទួលទានអំបុកការពារជាតិ សាសនា ព្រះមហាក្សត្រនៅថ្ងៃទី៩ វិច្ឆិកា ខាងមុខនេះ រដ្ឋបាលរាជធានីភ្នំពេញបានរៀបចំទីតាំងជួបជុំទទួលទានអំបុកកំរិតសាលាក្រុងនៅរមណីយដ្ឋានវត្តភ្នំ និងមានរៀបចំតាមខណ្ឌ, សង្កាត់ , មន្ទីរអង្គភាព, វត្តអារាម, សាលារៀន សរុបចំនួន៨៨៩ទីតាំង ដែលនឹងមានប្រជាពលរដ្ឋចូលរួមជាង១០ម៉ឺននាក់ ដោយចាប់ផ្តើមជួបជុំគ្នាពីម៉ោង៧ព្រឹកដល់ល្ងាចថ្ងៃទី៩ វិច្ឆិកា។ លោកបន្តថា ការពង្រឹងសន្តិសុខក៏នេះគឺធ្វើយ៉ាងដាច់ខាតដោយមិនទុកឱកាសឲ្យពួកក្បត់ជាតិមកបំផ្លាញសេចក្តីសុខ និងភាពសប្បាយរីករាយរបស់ប្រជាពលរដ្ឋបានឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ