ខេត្តកំពង់ចាម ៖ ជនសង្ស័យប្លន់ប្រដាប់អាវុធចំនួន៣នាក់ក្នុងចំណោម៤នាក់ត្រូវបានចាប់ខ្លួនជាបន្តបន្ទាប់កាលពីវេលាម៉ោង២ និង៣០នាទីរសៀលថ្ងៃទី២ វិច្ឆិកា ស្ថិតនៅភូមិឡឥដ្ឋ សង្កាត់បឹងកុក ក្រុងកំពង់ចាមព្រមទាំងរឹប អូសបានម៉ូតូចំនួន៣គ្រឿង និងឧបករណ៍កាច់ សោ.កម៉ូតូ កាំភ្លើងខ្លី១ដើមម៉ាកK54 និងស្កុត ពណ៌ខ្មៅ សំរាប់បិទលើ ស្លាកលេខម៉ូតូដែល ពួកគេប្លន់បាន។ លោកវេសេនីយ៍ត្រីចាន់ ហោ នាយរងការិយាល័យកណ្តាលយុត្តិធម៌នៃស្នងការដ្ឋាននគរបាលខេត្តប្រាប់ឱ្យដឹងថា ក្រុមជនសង្ស័យ៣នាក់នោះ១-ឈ្មោះអ៊ិត សក្កដា ហៅមមីស ភេទប្រុស អាយុ២១ឆ្នាំ រស់នៅភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ២-ឈ្មោះព្រឹក ចាន់តារា ភេទប្រុស អាយុ២០ឆ្នាំ រស់នៅភូមិ ហួចកើត ឃុំក្រែក ស្រុកពញាក្រែក ៣-ឈ្មោះ សួរ ចាន់ថា ភេទប្រុស អាយុ២៧ឆ្នាំ រស់នៅភូមិ ត្រពាំងព្រីង ឃុំត្រពាំងផ្លុង ស្រុកពញាក្រែក។
វត្ថុតាងម៉ូតូ៣គ្រឿងមានC125 ពណ៌ខ្មៅ ស៊េរី២០០៧ មានលេខ ម៉ាស៊ីន៨២២៥៦២៩ ម៉ូតូC125 ស៊េរី២០១០ ពណ៌ខ្មៅ មានលេខតួ ៨៤៣៨៦៤០ និងម៉ូតូ ម៉ាកស្មាស់រីវ៉ូ ពណ៌ក្រហម ស៊េរីឆ្នាំ២០០៩ មានលេខតួ ១០៧៧៧៦។ លោកវរសេនីយ៍ត្រីចាន់ ហោ ប្រាប់បន្តថាជនសង្ស័យ៣នាក់ ជិះម៉ូតូ២គ្រឿងមានម៉ាកស្មាស់១គ្រឿង និងC125ស៊េរី២០១០ ទៅឈប់នៅភូមិឡឥដ្ឋសង្កាត់បឹងកុក ហើយយកម៉ូតូ C125 ផ្ញើនៅផ្ទះរបស់ប្រជាពលរដ្ឋនាវេលាម៉ោង១១ព្រឹក ទី២ វិច្ឆិកា រួចនាំគ្នាជិះម៉ូតូស្មាស់ ចេញទៅបាត់។ ដោយម្ចាស់ផ្ទះមានការសង្ស័យបានរាយការណ៍ប្រាប់ដល់សមត្ថកិច្ច ហើយលោកឧត្តមសេនីយ៍ត្រីនួន សាមិន ស្នងការនគរបាលខេត្តបានចាត់កំលាំងឱ្យទៅត្រៀមឃ្លាំមើល លុះម៉ោង២ និង៣០នាទីរសៀលថ្ងៃ ដដែលឃើញជនសង្ស័យ៤នាក់ជិះម៉ូតូ២គ្រឿងក្នុងនោះមានC125 ស៊េរី២០០៧ផង ទៅសុំយកម៉ូតូវិញ។ ខណៈនោះសមត្ថកិច្ចដែល ត្រៀមចាំជាស្រេចបានហៅពួកគេឱ្យឈប់ តែពុំព្រមឈប់ឡើយ ព្រមទាំងដកកាំភ្លើងខ្លីបាញ់ ទៅលើសមត្ថកិច្ចទៀតផង តែមិនបណ្តាលឱ្យ នរណាម្នាក់រងគ្រោះថ្នាក់ទេ។ ក្រុមជនសង្ស័យទាំង៤នាក់ប្រញាប់ប្រញាល់ឡើងជិះម៉ូតូគេចខ្លួន តែមានជនសង្ស័យម្នាក់ត្រូវចាប់ខ្លួនបានឈ្មោះចាន់ ដារ៉ា បញ្ជូនទៅកាន់ស្នងការដ្ឋាននគរបាលខេត្ត ដើម្បីសួរនាំ។
ក្នុងប្រតិបត្តិការដេញតាមចាប់ចោរគ្រាន់តែកន្លះម៉ោងក្រោយមក កំលាំងនគរបាលចរាចរត្រួតពិនិត្យយានយន្តលើសចំណុះដែលប្រចាំការនៅភូមិស្រែសៀម ឃុំជីរោទី២ ស្រុកត្បូង ឃ្មុំបានស្ទាក់ឃាត់ ដើម្បីសួរនាំ ព្រោះមាន
ការសង្ស័យ តែក្រុមនេះបានផ្តួលម៉ូតូចោល ហើយរត់ចូលទៅក្នុងព្រៃគេចខ្លួន។ ទោះជាយ៉ាងណាក្តីសមត្ថកិច្ចចាប់បានម្នាក់ទៀតឈ្មោះ អ៊ិត សក្កដា ភេទប្រុស ព្រមទាំងដកហូតបានវត្ថុតាងនៅជាប់ខ្លួនរួមមានឧបករណ៍កាច់សោ.កម៉ូតូ៤ សោខ្សៀ១ ស៊ីមកាតទូរស័ព្ទ២ និងស្កុត ខ្មៅ១បន្ទះសំរាប់បិទស្លាកលេខម៉ូតូដែលពួកគេប្លន់បានដើម្បីកុំឱ្យម្ចាស់ចំណាំបាន ព្រមទាំងម៉ូតូ៣គ្រឿងទៀតផង។ លោកវរសេនីយ៍ឯកជឹម សេងហុង ស្នងការ រងនគរបាលខេត្តទទួលផែនកណ្តាលយុត្តិធម៌ប្រាប់ឱ្យដឹងថា ក្រោមការចង្អុលបង្ហាញរបស់លោកឧត្តមសេនីយ៍ឯកកង សុខន អគ្គស្នងការរងនគរបាលជាតិឱ្យតាមដានមុខសញ្ញាចេញពីពន្ធនាគារ ទើបសមត្ថកិច្ចបង្រ្កាបបានជន សង្ស័យប្លន់ប្រដាប់អាវុធ៣នាក់ក្នុងចំណោម៤នាក់នាយប់ថ្ងៃទី២ វិច្ឆិកា។ សមត្ថកិច្ចបានតាម ចាប់ពួកចោរប្លន់ប្រដាប់អាវុធបានម្នាក់ទៀតឈ្មោះសួរ ចាន់ថា ភេទប្រុស ពេលកំពុងសំងំលាក់ខ្លួនក្នុងផ្ទះសំណាក់មួយនៅភូមិទី៦ សង្កាត់វាលវង់ ក្រុងកំពង់ចាម។
ជាមួយគ្នានោះជន សង្ស័យឈ្មោះមមីស បាននាំសមត្ថកិច្ចទៅយក កាំភ្លើងខ្លីម៉ាក K 54 មួយដើមជារបស់គេ ផ្ទាល់ដែលលាក់ទុកនៅកន្លែងកើតហេតុក្នុងភូមិឡឥដ្ឋបានបាញ់លើកំលាំងនគរបាលក្នុងពេលបង្រ្កាបនោះ ។ លោកស្នងការរងបញ្ជាក់ថា ឈ្មោះមមីស ធ្លាប់មានប្រវត្តិជាប់គុកចំនួន៣លើកមក ហើយក្នុងនោះនៅខេត្តកំពង់ចាម២លើក និងនៅខេត្ត ក្រចេះ១លើក។ ក្រោយពីបានដោះលែងចេញ ពីពន្ធនាគារខេត្តគេបានទៅរស់នៅមូលដ្ឋានរបស់គេវិញ ស្ថិតនៅស្រុកពញាក្រែក។ មួយរយៈចុងក្រោយនេះគេបាត់ពីមូលដ្ឋាន ហើយសមត្ថកិច្ចបានតាមដានស្រាវជ្រាវរករហូត ទទួលដំណឹងថា គេចូលក្រុងកំពង់ចាមរួម ជាមួយនឹងបក្សពួក៣នាក់ទៀត ដើម្បីរៀបចំ ផែនការប្លន់។ លោកជឹម សេង ហុង ប្រកាសរកម្ចាស់ម៉ូតូទាំង៣គ្រឿងដែលមានភិនភាគដូចបានរៀបរាប់ខាងលើយកឯកសារទៅស្នងការដ្ឋាននគរបាលខេត្ត ដើម្បីទទួលយកវិញដោយសមត្ថកិច្ច ប្រគល់ឱ្យមិនយកលុយទេ៕
ចែករំលែកព័តមាននេះ