ខេត្តបាត់ដំបង ៖ បច្ចុប្បន្នតំលៃផ្លែកែវស្វាយល្មៀត ហាក់កំពុងមានទីផ្សារល្អប្រសើរជាងឆ្នាំមុនៗ បើគិតរយៈពេលនៃការប្រមូលផលក្នុងរដូវកាលនាដើមឆ្នាំដូចគ្នា ។ នេះបើតាមការអះអាងរបស់កសិករនានា ដែលកំពុងញញឹមយ៉ាងរីករាយ ជាមួយនឹងការប្រមូលផលស្វាយ នាដើមរដូវស្ទើរគ្រប់ទីកន្លែងនៅក្នុងខេត្តបាត់ដំបង។
លោកសំ សារ៉ន ដែលជាកសិករម្នាក់នៅស្រុកភ្នំព្រឹកបានប្រាប់កោះសន្តិភាព នៅព្រឹកថ្ងៃទី២៩ តុលា ថា នេះជាពេលវេលានៃការចាប់ផ្ដើមប្រមូលផលស្វាយកែវល្មៀតនាដើមរដូវ ហើយទីផ្សារហាក់ត្រូវប៉ាន់ជាងឆ្នាំមុនៗ បើប្រៀបធៀបនឹងរដូចកាលដូចគ្នា ។ លោកបានបន្តទៀតថា ដំណាំស្វាយកែវល្មៀតរបស់លោក ចំនួន៣០០ដើម ក្នុងចំណោម៥០០ដើម ទើបចាប់ផ្ដើមទទួលផលជាលើកដំបូង នាប៉ុន្មានថ្ងៃមុននេះ សម្រាប់រយៈពេលនៃការដាំទើបបាន៣ឆ្នាំ។
កសិករវ័យ៥០ឆ្នាំរូបនេះបានបញ្ជាក់ថា ការប្រមូលផលស្វាយជាលើកដំបូងរបស់លោក ស្របពេលដែលទីផ្សារផ្លែស្វាយ កំពុងហក់ឡើងខ្ពស់គ្រាន់បើបើប្រៀបធៀបនឹងឆ្នាំទៅមិញ ។ ប៉ុន្មានថ្ងៃមុននេះ ស្វាយរបស់លោក បានបេះលក់ចំនួន២លើកជាបន្តបន្ទាប់ បានប្រហែលជាង៣តោន ហើយលក់ឲ្យឈ្មូញក្នុងតំលៃចន្លោះពី១,៣០០រៀន ដល់តំលៃ១,៧០០រៀល ក្នុង១គីឡូក្រាម ។ លោកសារ៉ន បានបញ្ជាក់ថា តំលៃនេះគឺយោងទៅតាមប្រភេទផ្លែស្វាយធម្មតា។ ប៉ុន្តែបើប្រភេទផ្លែស្វាយដែលថែទាំដោយច្រកកញ្ចប់នៅលើដើមបានល្អ អាចមានតំលៃខ្ពស់ជាងនេះ។ កសិករដែលត្រូវប្រមូលផលនាពេលនេះ គឺត្រូវប៉ាន់សម្បើមណាស់ ព្រោះសំបូរឈ្មូញស្វែងរកទិញច្រើន ហើយទីផ្សារក៏ល្អទៀត។
ដោយឡែក កសិករមួយរូបទៀត នៅស្រុកបាណន់ គឺលោកសែ ភាន អាយុ៤៨ឆ្នាំ បាននិយាយថា ដំណាំស្វាយកែវល្មៀតរបស់លោកមានចំនួនជាង២,០០០ដើម ហើយកាលពីថ្ងៃទី២៧តុលា លោកបានបេះលក់ឲ្យឈ្មួញបានចំនួន៥តោន ហើយលក់ក្នុងតំលៃស្មើចំនួន១,៥០០រៀល ក្នុង១គីឡូក្រាម ។
លោកបានប្រាប់ថា ដំណាំស្វាយរបស់លោកធ្លាប់ទទូលផលបានចំនួន២លើកកន្លងមកហើយ រីឯការប្រមូលផលលើកដំបូងនៅពេលនេះ គឺជាការប្រមូលផលនាដើមរដូវ សម្រាប់តែផលស្វាយដែលកសិករប្រើថ្នាំបញ្ជា ដែលមានរយៈពេលជាង៤ខែ តែការប្រមូលផលស្វាយដោយធម្មតាមិនប្រើថ្នាំបញ្ជា គឺនៅក្នុងអំឡងខែមីនា ឬ មេសា។ លោកសែ ភាន បានបញ្ជាក់អំពីតំលៃទីផ្សារដែរថា សម្រាប់ពេលនេះ ទីផ្សារផ្លែស្វាយល្អប្រសើជាងឆ្នាំមុនៗ បើប្រៀបធៀបពេលវេលានៃការប្រមូលផលដូចគ្នា។ គាត់និយាយថា ពួកឈ្មួញកណ្ដាលបានកុម្ម៉ង់ទិញយកទាំងអស់ មិនថា ផ្លែស្វាយប្រភេទណាទេ ហើយឈ្មួញខ្លះថែមទាំងដើរម៉ៅដើមតាំងពីស្វាយចាប់ផ្ដើមចេញផ្លែម្ល៉េះ ។
ពាក់ព័ន្ធនឹងទីផ្សារស្វាយដែលកសិករអ៊ួតថា ល្អគ្រាន់បើនេះ ឈ្មួញកណ្ដាលរស់នៅស្រុកភ្នំព្រឹកម្នាក់ គឺអ្នកស្រី សឿង ខេន អាយុ៣៥ឆ្នាំ បានប្រាប់កោះសន្តិភាព ស្របពេលជាមួយនឹងកសិករខាងលើនេះថា តំលៃផ្លែស្វាយនាពេលនេះ ពិតជាល្អជាងឆ្នាំមុនៗមែន បើប្រៀបធៀនក្នុងរយះពេលដូចគ្នា។ ឈ្មួញកណ្ដាលរូបនេះ បានឲ្យដឹងទៀតថា បច្ចុប្បន្នផ្លែស្វាយកែវល្មៀតត្រូវបានឈ្មួញកណ្ដាលនានា នាំចេញទៅកាន់ប្រទេសថៃ និង ប្រទេសវៀតណាម។
អ្នកស្រីសឿង ខេន បានប្រាប់ដូច្នេះថា «តំលៃស្វាយធម្មតាដែលខ្ញុំ ទិញសព្វថ្ងៃនេះ ចាប់ពី១,៣០០រៀលដល់១,៧០០រៀល ក្នុង១គីឡូក្រាម។ ប៉ុន្តែបើប្រភេទផ្លែស្វាយដែលអ្នកដាំបានច្រកថង់ ឬច្រកកញ្ចប់ត្រឹមត្រូវនៅលើដើម អាចមានតំលៃរហូតដល់ទៅ១,៨០០រៀល ដល់២,៣០០រៀល ក្នុង១គីឡូក្រាមឯណោះ។ ព្រោះផ្លែស្វាយដែលបានវេចខ្ចប់នៅលើដើមនេះ មានពណ៌និងគុណភាពល្អ»។ គាត់បានបញ្ជាក់ត្រង់ចំណុចនេះថា «ស្វាយប្រភេទវេខ្ចប់លើដើមនេះ ភាគច្រើនត្រូវបានថែទាំផ្ទាល់ដោយពួកឈ្មួញវៀតណាម លុះប្រមូលផល ពួកគេនាំចេញទៅប្រទេសវៀតណាមតែម្ដង។ ប៉ុន្តែសម្រាប់ខ្មុំ សព្វថ្ងៃនេះ គឺខ្ញុំទិញនាំចេញទៅប្រទេសថៃ តាមច្រកទ្វាអន្តរជាតិព្រំ ខេត្តប៉ៃលិន»។
ចែករំលែកព័តមាននេះ