ខេត្តកំពង់ឆ្នាំង ៖ អគ្គមេបញ្ជាការរង និងជាមេបញ្ជាការកងទ័ពជើងគោកឧត្តមសេនីយ៍ឯក ហ៊ុន ម៉ាណែត បានលើកឡើងថា យើងគ្មានជម្រើសណាផ្សេងនោះទេ គឺរាជរដ្ឋាភិបាលត្រូវតែអនុវត្តច្បាប់ចំពោះអ្នកណាដែលកៀងគរមនុស្ស ដើម្បីធ្វើឲ្យបាត់បង់ស្ថេរភាពបំផ្លាញសន្តិសុខសង្គម…
ខេត្តកំពង់ឆ្នាំង ៖ អគ្គមេបញ្ជាការរង និងជាមេបញ្ជាការកងទ័ពជើងគោកឧត្តមសេនីយ៍ឯក ហ៊ុន ម៉ាណែត បានលើកឡើងថា យើងគ្មានជម្រើសណាផ្សេងនោះទេ គឺរាជរដ្ឋាភិបាលត្រូវតែអនុវត្តច្បាប់ចំពោះអ្នកណាដែលកៀងគរមនុស្ស ដើម្បីធ្វើឲ្យបាត់បង់ស្ថេរភាពបំផ្លាញសន្តិសុខសង្គម ដើម្បីប្លន់អំណាចផ្តួលរំលំរាជរដ្ឋាភិបាល ដើម្បីមហិច្ឆិតានយោបាយផ្ទាល់ខ្លួន ។
លោកសង្កត់ធ្ងន់ថា កុំឲ្យមនុស្សមួយក្តាប់តូចបំផ្លាញសេចក្តីសុខប្រជាជនជាង១៦លាននាក់ ។ ឧត្តមសេនីយ៍ឯក ហ៊ុន ម៉ាណែត បានលើកឡើង ដូច្នេះក្នុងឱកាសចូលរួមក្នុងពិធីបិទវគ្គបំប៉ន ថ្នាក់បញ្ជាការសេនាធិការកាំភ្លើងធំជំនាន់ទី១ និងថ្នាក់មេបញ្ជាការកងអនុសេនាតូច និងធំខេត្តកំពង់ឆ្នាំងនាថ្ងៃទី២៧ តុលានេះ ។
ឧត្តមសេនីយ៍ឯក ហ៊ុន ម៉ាណែត ថ្លែងថា យើងត្រូវការពារ និងពង្រឹងសន្តិសុខ ដើម្បីឲ្យប្រជាជន សប្បាយរីករាយនៅក្នុងថ្ងៃបុណ្យទាន ហើយមិនត្រូវឲ្យមនុស្សមួយក្តាប់តូចបំផ្លាញសេចក្តីសុខប្រជាជនជាង១៦លាននាក់នោះឡើយ ។ ដូច្នេះយើងត្រូវថែរក្សាសុខសន្តិ ភាពស្ថេរភាព ការពាររាជរដ្ឋាភិបាលស្របច្បាប់ ត្រូវស្មោះ ត្រង់ចំពោះជាតិ សាសនា ព្រះមហាក្សត្រ ។ នេះ គឺជាកិច្ចការធំតែយើងត្រូវធ្វើ និងជាគោលដៅធំរបស់កងកម្លាំងប្រដាប់អាវុធ ។
អគ្គមេបញ្ជាការរងរូបនោះក៏បានបញ្ជាក់បន្ថែមថា ភារកិច្ចស្នូលរបស់កងទ័ព គឺការពារជាតិ និងប្រជាជនការពារសន្ដិសុខ និងការរីកចម្រើនដែលប្រជាជនចង់បានទាំងផ្លូវកាយ និងផ្លូវចិត្ត គឺសន្តិភាពដែលយើងមានរាល់ថ្ងៃ ។ ដូច្នេះសូមគាំទ្រចំពោះការប្ដេជ្ញាចិត្តរបស់នាយទាហាន នាយទាហានរង និងពលទាហានទាំងអស់ក្នុងការចូលរួមទប់ស្កាត់ មិនឲ្យបាត់បង់សុខសន្តិភាពដែលយើងមាន ។
លោកបន្តថា កងកម្លាំងប្រដាប់អាវុធ គឺជាកងកម្លាំងថែរក្សាសុខសន្តិភាព ។ ជាក់ស្ដែងសុខ សន្តិភាពដែលយើងរកបាននៅឆ្នាំ១៩៩៨ ដោយនយោបាយឈ្នះឈ្នះរបស់សម្តេចតេជោ ហ៊ុន សែន បើគ្មានការចូលរួមពីកងកម្លាំងប្រដាប់អាវុធខ្មែរក្រហមបើគាត់មិនទម្លាក់អាវុធឈប់ច្បាំងនោះទេ យើងប្រហែលនៅច្បាំងដល់សព្វថ្ងៃនេះ ។ ប៉ុន្តែយើងបានសុខដោយសារកងកម្លាំងប្រដាប់អាវុធក្រោមនយោបាយឈ្នះ ឈ្នះរបស់សម្ដេចតេជោ។
ឧត្តមសេនីយ៍ឯក ហ៊ុន ម៉ាណែត ក៏បានលើកឡើងផងដែរថា បញ្ហាសតិអារម្មណ៍បន្តិចបន្តួច មិនស្មើនឹងការបាត់បង់ផលប្រយោជន៍ធំរបស់ជាតិនោះទេ ។ លោកថា ជាធម្មតាបញ្ហាជីវភាពរស់នៅ បញ្ហាការងារនៅកន្លែងធ្វើការ គឺតែងតែកើតមានដោយចៀសមិនរួច ។ ប៉ុន្តែកុំឲ្យបាត់បង់នូវម្ចាស់ការត្រូវយល់ដឹងថា គោលការណ៍របស់រាជរដ្ឋាភិបាលយកចិត្តទុកដាក់ណាស់ចំពោះកងកម្លាំងប្រដាប់អាវុធការកសាងកងទ័ពក៏ដូចជា យកចិត្តទុកដាក់ដល់ប្រជាពលរដ្ឋទាំងអស់ ។
ផលប្រយោជន៍របស់យើង គឺការពារសន្តិសុខ សុខសន្តិភាព ដើម្បីទាំងអស់គ្នាបានសុខ និងផលប្រយោជន៍ដោយផ្ទាល់តាមរយៈការតម្លើងប្រាក់បៀវត្ស និងគោលនយោបាយផ្សេងៗសម្រាប់កងទ័ពគ្រួសារកងទ័ព និងអតីតយុទ្ធជន ។ ឧត្តមសេនីយ៍ឯក ហ៊ុន ម៉ាណែត ថ្លែងថា ប្រជាពលរដ្ឋចង់បានសេចក្តីសុខ ចង់បានសុខ សប្បាយ លុយមួយលានដុល្លារក៏មិន ស្មើនឹងការបាត់បង់តម្លៃនៃសេចក្តីសុខដែរ ។ លោកថា យកលុយមកមានន័យអ្វី បើប្រទេសយើង ច្បាំងគ្នា ភូមិឃុំយើងច្បាំងគ្នា កូនចៅស្លាប់ដោយសារគ្រាប់ផ្លោង យកមកមានន័យអ្វីទៅ ៕ កែសម្រួលដោយ ៖ សុឃាក់
ចែករំលែកព័តមាននេះ