រាជធានីភ្នំពេញ ៖ ក្រុមប្រឹក្សាធម្មនុញ្ញនៃព្រះរាជាណាចកម្ពុជាបានរៀបចំកិច្ចប្រជុំគណអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូន នៅខេត្តសៀមរាប ។ កិច្ចប្រជុំនេះបានធ្វើឡើងនៅថ្ងៃទី២៨ ខែតុលា នៅក្នុងទឹកដីខេត្តសៀមរាប ដោយបានធ្វើការពិភាក្សា និងសម្រេចលើរបៀបវារៈមួយចំនួនរួមមានការអនុម័តសេចក្ដីព្រាងកំណត់ហេតុប្រជុំនៃកិច្ចប្រជុំលើកមុន…
រាជធានីភ្នំពេញ ៖ ក្រុមប្រឹក្សាធម្មនុញ្ញនៃព្រះរាជាណាចកម្ពុជាបានរៀបចំកិច្ចប្រជុំគណអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូន នៅខេត្តសៀមរាប ។ កិច្ចប្រជុំនេះបានធ្វើឡើងនៅថ្ងៃទី២៨ ខែតុលា នៅក្នុងទឹកដីខេត្តសៀមរាប ដោយបានធ្វើការពិភាក្សា និងសម្រេចលើរបៀបវារៈមួយចំនួនរួមមានការអនុម័តសេចក្ដីព្រាងកំណត់ហេតុប្រជុំនៃកិច្ចប្រជុំលើកមុន ការបូកសរុបសមិទ្ធផលការងារ និងទិសដៅការងាររបស់សមាគម ការពិនិត្យសម្រេចលើកិច្ចសហប្រតិបត្តិការរវាងសមាគមតុលាការធម្មនុញ្ញហ្វ្រង់កូហ្វូន (ACCF) ជាមួយនឹងអង្គការអន្តរជាតិហ្វ្រង់កូហ្វូនី (Organisation Internationale de la Francophonie – OIF) ការពិនិត្យសម្រេចលើកិច្ចព្រមព្រៀងសហប្រតិបត្តិការជាមួយនឹងសន្និសីទយុត្តាធិការធម្មនុញ្ញអាហ្វ្រិក(Conférence des Juridictions Constitutionnelles Africaines – CJCA) និងបញ្ហាផ្សេងៗ ។
សូមជម្រាបថា ជារៀងរាល់ឆ្នាំសមាគមតុលាការធម្មនុញ្ញហ្វ្រង់កូហ្វូន (ACCF) ត្រូវរៀបចំកិច្ចប្រជុំគណៈអចិន្ត្រៃយ៍របស់ខ្លួន នៅតាមបណ្តាប្រទេសជាសមាជិកអចិន្ត្រៃយ៍ ។ ដោយឡែកសម្រាប់ឆ្នាំ២០១៩នេះក្រុមប្រឹក្សាធម្មនុញ្ញនៃព្រះរាជាណាចក្រកម្ពុជាមានកិត្តិយសត្រូវបានកិច្ចប្រជុំគណៈអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូនស្នើសុំឲ្យទទួលរៀបចំកិច្ចប្រជុំជាលើកទី១ ក្នុងនាមជាសមាជិកគណៈអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូន (ACCF) ។
នេះក៍ជាការប្រជុំលើកទី១ របស់សមាគម ACCF នៅទ្វីបអាស៊ីចាប់តាំងពីពេលសមាគមនេះត្រូវបានបង្កើតឡើង ។ សមាគមតុលាការធម្មនុញ្ញហ្វ្រង់កូហ្វូន (ACCF) នេះដែលទើបតែប្តូរពីឈ្មោះ ACCPUF នៅឆ្នាំ២០១៩ ត្រូវបានបង្កើតឡើងនៅឆ្នាំ១៩៩៧ ក្រោមការផ្តួចផ្តើមគំនិតពីក្រុមប្រឹក្សាធម្មនុញ្ញនៃប្រទេសបារាំង ។ ក្រុមប្រឹក្សាធម្មនុញ្ញនៃព្រះរាជាណាចក្រកម្ពុជាបានក្លាយជាសមាជិកនៃសមាគមតុលាការធម្មនុញ្ញហ្វ្រង់កូហ្វូន (ACCF) ក្នុងឆ្នាំ១៩៩៨ ។
បច្ចុប្បន្នសមាគមតុលាការធម្មនុញ្ញហ្វ្រង់កូហ្វូន (ACCF) មានសមាជិកសរុបចំនួន៤៨ប្រទេស ដែលសុទ្ធសឹងតែជាប្រទេសដែលនិយាយភាសាបារាំង ។
សូមបញ្ជាក់ថា បានទទួលរៀបចំកិច្ចប្រជុំគណៈអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូន ( ACCF) ដែលកិច្ចប្រជុំនេះដឹកនាំដោយឯកឧតុ្តមប្រធានតុលាការកំពូលនៃប្រទេសកាណាដា លោក Wagner Richard ដែលបានទទួលអាណត្តិជាប្រធានសមាគមតុលាការធម្មនុញ្ញហ្វ្រង់កូហ្វូន (ACCF) និងមានការចូលរួមពីសំណាក់ថ្នាក់ដឹកនាំចំនួន២២រូបនៃក្រុមប្រឹក្សាធម្មនុញ្ញតុលាការធម្មនុញ្ញ និងតុលាការកំពូលមកពីប្រទេសចំនួន១១ ។
ក្នុងនោះមានថ្នាក់ដឹកនាំកំពូលចំនួនប្រាំរូប រួមមានលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា ឯកឧត្តម Meyer ULRICH ប្រធានតុលាការសហព័ន្ធស្វីស លោកPapa Oumar SAKHO ប្រធានក្រុមប្រឹក្សាធម្មនុញ្ញនៃប្រទេសសេណេហ្គាល់ លោក François DAOÛT ប្រធានតុលាការធម្មនុញ្ញនៃប្រទេសប៊ែលហ្សិក និងលោកជំទាវ MANASSA DANIOKO ប្រធានតុលាការធម្មនុញ្ញនៃប្រទេសម៉ាលី ព្រមទាំងថ្នាក់ដឹកនាំក្រុមប្រឹក្សាធម្មនុញ្ញ តុលាការធម្មនុញ្ញ និងតុលាការកំពូលនៃប្រទេស រ៉ូម៉ានី បារាំង ម៉ារ៉ុក និងប្រទេសហ្គាបុង ៕
ចែករំលែកព័តមាននេះ