សហរដ្ឋអាមេរិក ៖ ទីភ្នាក់ងារព័ត៌មានរ៉យទ័ររាយការណ៍ថា ទីប្រឹក្សាសន្តិសុខជាតិអាមេរិកលោកROBERT O’BRIEN អះអាងនាថ្ងៃទី២៧ តុលាថា សាកសពរបស់ប្រមុខក្រុមរដ្ឋអ៊ិស្លាមABOU BAKR AL BAGHDADIនឹងកម្ទេចចោលដោយត្រឹមត្រូវ។ លោកពុំបានបញ្ជាក់ថា តើសពរបស់គេនឹងត្រួវដុតចោលឬយ៉ាងណាឡើយ?
ទីប្រឹក្សារូបនោះរបស់ប្រធានាធិបតីអាមេរិកលោកដូណាល់ត្រាំនៅបានឲ្យដឹងទៀតថាប្រតិបត្តិការតាមសម្លាប់AL BAGHDADIមានឈ្មោះរបស់នារីជនជាតិអាមេរិកលោកស្រី KAYIA MUELLERដែលជាអ្នករងទារុណកម្មដល់ស្លាប់ពីសំណាក់ពួកភេរវករកាលពីឆ្នាំ២០១៥។ សារព័ត៌មាននិយាយថា AL BAGHDADIជាអ្នកចូលរួមដោយផ្ទាល់ ក្នុងការធ្វើទារុណកម្មលោកស្រីKAYIA MUELLER។
យោងតាមប្រធានាធិបតីអាមេរិកថាAL BAGHDADIបានស្វះស្វែងរត់លាក់ខ្លួនក្នុងរូងក្រោមដីមួយ រួមជាមួយកូន៣នាក់ហើយពេលកងទាហានពិសេសអាមេរិកតាមទាន់ គេក៏បានចុចគ្រឿងផ្ទុះដាក់ជាប់នឹងខ្លួនឲ្យផ្ទុះ។ លោកត្រាំរៀបរាប់ថាគេស្លាប់យ៉ាងកំសាកដោយរត់គេចខ្លួនទាំងយំ់។ លោកបញ្ជាក់ថាអត្តសញ្ញាណរបស់ប្រមុខក្រុមរដ្ឋអ៊ិស្លាម ត្រូវបានបញ្ជាក់ភ្លាមៗជាមួយការធ្វើតេស្តNDA។ ក្នុងប្រតិបត្តិការនេះពុំមានបុគ្គលិកអាមេរិកណាម្នាក់រងគ្រោះឡើយ។
ចំណែកយុទ្ធជនមួយចំនួនធំនិងពួកអ្នកអមAL BAGHDADIបានត្រូវស្លាប់ជាមួយរូបគេ។ ចំណែកទីបញ្ចាការដ្ឋានយោធាអ៊ីរ៉ាក់ប្រកាសថា បានរាយការណ៍ប្រាប់ពីកន្លែងរស់នៅរបស់ប្រមុខក្រុមរដ្ឋអ៊ិស្លាមនៅស៊ីរី សម្រាប់ប្រតិបត្តិការនោះរបស់អាមេរិក។ កងកុំម៉ង់ដូអាមេរិកបានបញ្ជូនតាមឧទ្ធម្ភាគចក្រនាពេលយប់ ទៅកាន់តំបន់ខេត្តអ៊ីដលីបសម្រាប់ប្រតិបត្តិការតាមសម្លាប់ពួកមេដឹកនាំក្រុមរដ្ឋអ៊ិស្លាម។
កាលពីឆ្នាំ២០១១ ក្រោយការសម្លាប់អូសាម៉ាប៊ីនឡាដេនប្រមុខអាល់កៃដា សាកសពរបស់គេត្រូវបានទម្លាប់ចោលទៅក្នុងទឹកសមុទ្រ២៤ម៉ោងក្រោយពីសម្លាប់បាន៕ (កែសម្រួលដោយ ៖ បុប្ផា) (ប្រភពវីដេអូ ៖ قناة العراقية الإخبارية HD)
ចែករំលែកព័តមាននេះ